މާލޭގެ ވިޔަފާރި ބަނދަރު ބޮޑުކުރުމުގެ ހުއްދަ އީވައިސީ އިން ދީފި

މާލޭގެ ވިޔަފާރި ބަނދަރު ބޮޑުކުރުމަށް އިކޮނޮމިކް އެންޑް ޔޫތު ކައުންސިލް (އީވައިސީ) އިން ހުއްދަ ދީފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޗީފް އެގްޒެކްޓިވް އޮފިސަރު މުހައްމަދު ޖުނައިދު މިރޭ ވިދާޅުވެއްޖެ އެވެ.

އެމްޕީއެލް އަށް އަލަށް ގެނައި ވެހިކަލްތައް އިފްތިތާހު ކުރުމަށް ވިޔަފާރި ބަނދަރުގައި ބޭއްވި ހަފުލާގައި ވާހަކަ ދައްކަވަމުން ޖުނައިދު ވިދާޅުވީ އެ ބަނދަރު ބޮޑުކުރުމަށް ކަމާއި ބެހޭ ޕްރެޒެންޓޭޝަނެއް އީވައިސީ އަށް ހުށަހެޅުއްވި ކަމަށެވެ.

"އަޅުގަނޑުމެންނަށް އެތަނުން ލެޓާ އައިސް އޮތީ. އެކަން ކުރުމަށް ހުއްދަ ލިބިފައި އޮތީ. އަޅުގަނޑުމެން އެކަން ވަރަށް އަވަހަށް ކުރާނަން،" އޭނާ ވިދާޅުވި އެވެ.

ބަނދަރު ބޮޑުކުރުމުގެ ޕްލޭނާ ބެހޭ ތަފުސީލެއް ޖުނައިދު މިރޭ ނުދެއްވަ އެވެ.

އޭނާ ވިދާޅުވި ގޮތުގައި އެމްޕީއެލް އަށް ރަނގަޅު ވެހިކަލެއް ނުގެންނަތާ 15 ވަރަކަށް އަހަރުވެއްޖެ އެވެ. އެކަމަކު ބަނދަރަށް މިހާރު އެންމެ ބޮޑަށް ބޭނުންވާ ވެހިކަލްތައް ލިބިފައިވާ ކަމަށް ސީއީއޯ ވިދާޅުވި އެވެ.

"މިހާރު ވިޔަފާރިވެރިންނަށް ބަނދަރުން ދިމާވެފައި އޮތް މައްސަލަ ވަރަށް ބޮޑަށް ހައްލުވެގެން މިދިޔައީ. ބަނދަރަކީ ވަރަށް ކުޑަ ތަނެއް. އެންމެ ބޯޓެއް ބަނދަރުކުރެވެނީ. ހަސަތޭކަ ކޮންޓެއިނަރު ހިފައިގެން އަންނަ ބޯޓު ހުސްކުރުމަށް ފަހު، ހުސް ކޮންޓެއިނަރު ލާނެ ތަނެއް ނުހުރޭ،" ބަނދަރަށް ދިމާވެފައިވާ މައްސަލަތަކާ ބެހޭ ގޮތުން އޭނާ ވިދާޅުވި އެވެ.

ޖުނައިދު ވިދާޅުވީ އާ ވެހިކަލްތައް ގެނައުމަށް ފަހު، ބަނދަރުގައި އޮތް އެމްވީ ވެގަ ކައްޕާ 18 ގަޑިއިރުގެ ތެރޭގައި ހުސްކޮށްފައިވާ ކަމަށެވެ. އަދި އިތުުރު 90 ކޮންޓެއިނަރު އެ ބޯޓަށް ލޯޑުކުރި ކަމަށް ވެސް އޭނާ ވިދާޅުވި އެވެ.

"މީގެ ކުރިން އަޅުގަނޑުމެން މީގެ ބޯޓެއް ހުސްކުރަން 15 ވަރަކަށް ދުވަސް ނަގާ. މި އުޅަނދުތައް އައީމަ އަޅުގަނޑު އެންމެ ބޮޑު އިސްކަމެއް ދޭނީ މި އުޅަނދުތައް ބެލެހެއްޓުން. އެއީ އެންމެ މުހިންމު ކަމަކީ،" ޖުނައިދު ވިދާޅުވި އެވެ.

ގާތްގަނޑަކަށް 10 މިލިއަން ޑޮލަރުގެ ވެހިކަލްތައް އިފްތިތާހުކުރުމަށް ބޭއްވި ރަސްމިއްޔާތުގައި ޖުނައިދު ވިދާޅުވީ، އެމްޕީއެލްގައި މިހާރު ކޮންޓެއިނަރު އުފުލުމަށް ހަ ރީސްޓިކާ އެބަ އޮތް ކަމަށެވެ. އަދި އެއް ރީސްޓިކާ ހުޅުމާލެ އަށް ފޮނުވަން ނިންމާފައިވާ ކަމަށް ވެސް އޭނާ ވިދާޅުވި އެވެ.