ނެޓްބޯޅަ ކުޅުންތެރިޔާ ރަބާބްގެ ލިގަމެންޓް ސާޖަރީ ޓްރީ ޓޮޕް އިން ކާމިޔާބުކޮށްފި

ގައުމީ ނެޓް ބޯޅަ ކުޅުންތެރިޔާ އައިމިނަތު ރަބާބްގެ އެންޓީރިއާ ކްރޫޝަލް ލިގަމެންޓް (އޭސީއެލް) ރިކޮންސްޓްރަކްޝަން ސާޖަރީ ޓްރީ ޓޮޕް ހޮސްޕިޓަލުން ކާމިޔާބުކަމާ އެކު ކޮށްފި އެވެ.

އެ ހޮސްޕިޓަލުން ނެރުނު ނޫސްބަޔާނެއްގައި ވާގޮތުން، ސާޖަރީ ފުރިހަމަކުރީ ކަށީގެ އޮޕަރޭޝަނަށް ހާއްސަ ކޮންސަލްޓެންޓް ޑރ. ކަނިރާޖް މަރިމުތުލުގެ ލަފާއާ އެއްގޮތަށެވެ. އޭނާ އަކީ ހުޅު ބަދަލުކުރާ ސާޖަރީ، ސްޕޯޓްސް މެޑިސިން ސާޖެރީ، ކޮނޑުގެ ސަޖަރީ އަދި ކަކުލުގެ ސަޖަރީ ކުރުމަށް ހާއްސަ ތަޖުރިބާކާރު ކޮންސަލްޓެންޓެކެވެ.

އުމުރުން 23 އަހަރުގެ ރަބާބް އަކީ ގައުމީ ނެޓް ބޯޅަ ޓީމަށް ކުޅެ، ރާއްޖެ ތަމްސީލުކޮށް ގިނަ ކާމިޔާބުތައް ހޯދާފައިވާ ކުޅުންތެރިއެކެވެ. އޭނާ ވަނީ މި އަހަރުގެ "ނެޝަނަލް ސްޕޯޓްސް އެވާޑްސް"ގައި ރާއްޖޭގެ އެންމެ މޮޅު އަންހެން ކުޅުންތެރިޔާގެ މަގާމު ވެސް ހޯދައިފަ އެވެ.

ރާބާބް އެ ސާޖަރީ ކުރަން މެދުވެރިވީ މިދިޔަ އަހަރު އޮތް ގައުމީ ނެޓްބޯޅަ މުބާރާތުގެ ފައިނަލް މެޗުގެތެރެއިން އޭނާގެ ވައަތު ކަކޫ އެނބުރި، މައި ލިގަމެންޓް އިރައިގެން ދިޔުމާ ގުޅިގެންނެވެ.

ސާޖަރީ ކާމިޔާބުކުރުމުން ރަބާބް ވަނީ ޓްރީ ޓޮޕް ހޮސްޕިޓަލުގެ ޓީމަށާއި، ޑރ. ކަނިރާޖު އަދި އޭނާއަށް އެހީވި އެންމެނަށް ޝުކުރުއާދަކޮށްފަ އެވެ.

"ރަބާބް އަކީ ހިތްވަރުގަދަ ކުޅުންތެރިއެއް. އޮޕަރޭޝަނަށް ފަހު ހެދި ފިޒީއޯތެރަޕީގައި ރަބާބް ވަނީ ފައިގެ ބާރު ރަނގަޅުކުރުމަށް ވަރަށް މަސައްކަތްކޮށް، ނަތީޖާ ނެރެ ކުރިއެރުމާއި ހިތްވަރު ދައްކައިފައި،" ޑރ. ކަނިރާޖް ވިދާޅުވި އެވެ.

އުމުރުން 13 އަހަރުގައި ނެޓް ބޯޅަ ކުޅެން ފެށި ރަބާބްގެ 10 އަހަރުގެ ކެރިއާ ހުއްޓުމަކަށް އައިނަމަވެސް، އޭނާ ދަނީ އެނބުރި ކުޅުމަށް ނުކުތުމަށްޓަކައި ރިކަވަރީގެ މަސައްކަތް ކުރަމުން ކަމަށް ޓްރީ ޓޮޕުން ބުންޏެވެ.

މިދިޔަ މަހުގެ ތެރޭގައި ވެސް އެ ހޮސްޕިޓަލުން ވަނީ ހިތުގެ ބަލި ހުންނަ 19 އަހަރުގެ އަންހެނެއްގެ އޭސީއެލް ސާޖަރީ ކާމިޔާބުކަމާއެކު ފުރިހަމަކޮށްފަ އެވެ.