ރިޔާސީ އިންތިހާބުގެ ފެށުމަށް އެމްޑީޕީ އާއި ޕީޕީއެމްގެ ބޮޑު ރެއެއް!

ސިޔާސީ ޖަލްސާތަކުގެ ފޯރި ފަނޑުވެފައި އޮތުމަށް ފަހު މިރެއަކީ ރާއްޖޭގެ އެންމެ ބޮޑު ސިޔާސީ ދެ ޕާޓީ އެމްޑީޕީ އާއި ޕީޕީއެމަށް ބޮޑު ރެއެކެވެ. މާލޭގެ ދެކޮޅުގައި ސިޔާސީ ހަރަކާތް ދެ ޕާޓީން ހިންގާނީ އެއްވަގުތެއްގަ އެވެ.

މިއީ، ކުރިއަށް އޮތް ރިޔާސީ އިންތިހާބަށް ދެ ޕާޓީގެ ވެސް ފެށުމެވެ.

އެމްޑީޕީގެ އެންމެ އިސް ގުނަން، 1،200 އަށް ވުރެން ގިނަ މެމްބަރުންނާ އެކު އެއްވާނީ ސޯޝަލް ސެންޓަރަށެވެ. ކޮންގްރެސް ފެށުމުގެ މި އެއްވުމުގައި އެމްޑީޕީގެ އިސް ލީޑަރު، ރައީސް އިބްރާހިމް މުހައްމަދު ސޯލިހް އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބައިވެރިވެވަޑައިގަންނަވާނެ އެވެ.

ރިޔާސީ އިންތިހާބަށް ޕާޓީގެ ގަވާއިދުތައް އިސްލާހުކޮށް ޕްރައިމަރީއަށް ތައްޔާރުވާން ކޮންގްރެސް ފަށާ ޖަލްސާ ކުރިއަށް ގެންދާއިރު، ކާނިވާ ސަރަހައްދުގައި އޮންނާނީ ޕީޕީއެމާއި ޕީއެންސީން ރިޔާސީ އިންތިހާބުގެ ޓިކެޓް ހަވާލުކުރުމެވެ. ޕްރައިމަރީއެއް ނުބާއްވާ ގޮތަށް ނިންމައި ޕީޕީއެމާއި ޕީއެންސީގެ ރިޔާސީ ޓިކެޓް ހަވާލުކުރާނީ ކުރީގެ ރައީސް އަބްދުﷲ ޔާމީންއާ އެވެ.

ދެ ޕާޓީގެ ސިޔާސީ މި ބޮޑު ހަރަކާތްތަކަށް ރަށްރަށުން ވެސް މާލެއަށް މީހުން ވަނީ ޖަމާވެފަ އެވެ.

ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އިއްޔެ "މިހާރު" އަށް ވިދާޅުވި ގޮތުގައި "ހަވާލޭ ވަތަން"ގެ ނަމުގައި މިރޭ ބާއްވާ ޖަލްސާއަކީ އެ ޕާޓީން މި ފަހުން ބާއްވާ އެންމެ ބިޔަ ޖަލްސާއަށް ވާނެ ކަމަށެވެ.

އޭނާ ވިދާޅުވި ގޮތުގައި ކާނިވާ ފުރާލާ މި ޖަލްސާއިން ކުރިއަށް އޮތް ރިޔާސީ އިންތިހާބަށް ގައުމުގެ ރައްޔިތުން ތިބި ގޮތް ހާމަވާނެ އެވެ.

"ޕާޓީން މިހާތަނަށް ބާއްވާ އެންމެ ބިޔަ އެއް ޖަލްސާއަށް ވާނެ،" އަދުރޭ ވިދާޅުވެފައިވެ އެވެ.

ޕީޕީއެމްގެ އޮފިޝަލަކު ވިދާޅުވި ގޮތުގައި 4،000އާ ގާތްކުރާ އަދަދަކަށް ކާނިވާ ސަރަހައްދުގައި މިހާރު ވަނީ ގޮނޑި ޖަހައިފަ އެވެ.

ނިޒާމް ބަދަލުކުރުމުގެ އަރައިރުންވުމާ އެކު އެމްޑީޕީގެ ކޮންގްރެސް!

އެމްޑީޕީން މިރޭ ފަށާ ކޮންގްރެސް އަންނަ އާދީއްތަދުވަހުގެ ނިޔަލަށް ކުރިއަށްދާނެ އެވެ.

ކުރިން ބެލެވިފައި އޮތީ މި ކޮންގްރެސްގައި ރިޔާސީ ޓިކެޓާ ގުޅޭ ނިންމުން ނިންމާނެ ކަަމަށެވެ. އެކަމަކު ކޮންގްރެސް އެޖެންޑާކުރި އިރު އެފަދަ ހުށަހެޅުމެއް ނެތެވެ. އެ ޕާޓީން ބުނެފައި ވަނީ، ކޮންގްރެސްއަށް ފަހު ރިޔާސީ ޕްރައިމަރީ އޮންނާނެ ކަަމަށެވެ.

ކޮންގްރެސް މި ފަށަނީ ވެރިކަން ހިންގުމުގެ ނިޒާމު ބަދަލުކުރުމުގެ އަރައިރުންވުންތަކާ އެކުގަ އެވެ.

ނިޒާމް ބަދަލުކުރަން ގާނޫނުއަސާސީއަށް ގެންނަން ފެނިވަޑައިގަންނަވާ އިސްލާހުތަކާ އެކު ޕާޓީގެ ރައީސް މުހައްމަދު ނަޝީދު ވަނީ ގަރާރެއް ހުށަހަޅުއްވައިފަ އެވެ. އެކަމަކު މިވަގުތަށް ނިޒާމް ބަދަލުކުރުމުގެ އެއްވެސް ކަމެއް ކުރިއަށް ގެންދަން ރައީސް އިބްރާހިމް މުހައްމަދު ސޯލިހް ބޭނުންފުޅެއް ނުވެ އެވެ.

ކުރިއަށް އޮތް ރިޔާސީ އިންތިހާބު މި ނިޒާމުގައި ދެމިތިބެ ކުރިއަށް ގެންދަން ފެނިވަޑައިގަންނަވާ ކަމަށާއި އެހެންވެ ގަރާރު އަނބުރާ ގެންދަވަން ރައީސް އެދިވަޑައިގަތެވެ. އެކަމަކު ނިޒާމު ބަދަލުކުރުމާ މެދު ހިޔާލު ހޯދުމަކީ އެއްވެސް ބޭފުޅަކަށް ހުއްޓުވޭނެ ކަމެއް ނޫން ކަމަށާއި އެމްޑީޕީގެ ގިނަ މެމްބަރުން ތިބީ ރިޔާސީ ނިޒާމުގައި ކުރިއަށްދާން ކަމަށް ނަޝީދު ވަނީ ވިދާޅުވެފަ އެވެ.

އެ ގަރާރުގައި ބުނެފައިވަނީ ގާނޫނުއަސާސީގައި ވެރިކަމުގެ ނިޒާމާއި އިންތިާބީ އުސޫލުތައް ކަނޑައަޅާފައިވާ ގޮތުން ރިޔާސީ އިންތިހާބެއްގައި އެއް ޕާޓީން އެ އިންތިހާބު ކާމިޔާބުކޮށް މުތުލަގު ބާރުތަކާ އެކީ ސަރުކާރު ހިންގުން ނާދިރު ކަމަށެވެ.

ބަރުލަމާނީ ނިޒާމަކަށް ބަދަލުކުރަން ނަޝީދު ހުށަހެޅުއްވި ނަމަވެސް، އިދިކޮޅު ކޯލިޝަންގައި ހިމެނިވަޑައިގަންނަވާ އެހެން ހުރިހާ ލީޑަރުން ވަނީ އެ ގަރާރާ ދެކޮޅު ކަމަށް ވިދާޅުވެފަ އެވެ. އެ ގަރާރަށް އެމްޑީޕީގެ ޗެއާޕާސަން ފައްޔާޒު އިސްމާއިލްގެ ތާއީދު ބޭނުންވާކަމަށް ނަޝީދު ވިދާޅުވި ނަމަވެސް، ފައްޔާޒު ވަނީ އޭނާ އަބަދުވެސް ތާއީދު ކުރައްވަނީ ރިޔާސީ ނިޒާމަކަށް ކަމަށް ވިދާޅުވެފަ އެވެ.

ކޮންގްރެސްގައި މި ނިޒާމަށް ބަދަލުވާން ފެނޭތޯ ބަލަން ވޯޓަށް އަހާނެ އެވެ. އޭގެކުރިން ގަރާރަށް ބަހުސްކުރަން ހުޅުވާލާ ވަގުތުގައި ހިޔާލުތަފާތުވުން ބޮޑުވެ، ދެ ފަޅިވެފައިވާ ޕާޓީގެ ކޯޅުން ފެންނާނެ ކަމަށް ބެލެވެ އެވެ.

ޕީޕީއެމްގެ ޖަލްސާ އޮމާންކަމާ އެކު މިރޭ ނިމުނަސް ކުރިމަގުގައި އެމްޑީޕީއަށް ވާނެ ގޮތާ މެދު އުފެދިފައިވާ ސުވާލުތަކަށް ޖަވާބެއް ލިބޭނީ ބަރުލަމާނީ ނިޒާމުގެ ގަރާރުގެ ވޯޓު ނިމޭ ގޮތަކުންނެވެ.