އައިފޯން 14 ދައްކާލައިފި؛ އެހީއަށް އެދެން ސެޓެލައިޓުން ކަނެކްޝަން ލިބޭނެ

އެޕަލްގެ އައިފޯން 14، 14 ޕްލަސް، 14 ޕްރޯ އަދި ޕްރޯ މެކްސް މިރޭ ދައްކާލައިފި އެވެ.

މި ފޯނުތަކުގެ ބެޓެރި އެއްފަހަރު ޗާޖުކޮށްގެން މުޅި ދުވަހު ހިފަހައްޓާނެ ކަމަށް އެޕަލް އިން ބުންޏެވެ. މި ފޯންތަކުގައި ހިމަނާފައިވަނީ އޭ15 ބަޔޮނިކް ޗިޕް އެވެ. އައިފޯން 14 އާއި 14 ޕްލަސްގައި 12 މެގަޕިކްސެލްގެ ކެމެރާ ހިމަނާފައި ވަނީ އެތައް ގުނައެއް ވަރުގަދަކޮށްފަ އެވެ. އަދި ލޯ ލައިޓް ކެޕްޗާ 49 ޕަސެންޓް ވަނީ ވަރުގަދަކޮށްފަ އެވެ.

އައިފޯން 14 ފަސް ކުލަޔަކުން ލިބޭނެ އެވެ. އެއީ މިޑްނައިޓް، ސްޓާލައިޓް، ބްލޫ، ޕާޕްލް އަދި ޕްރޮޑަކްޓް ރެޑް އެވެ.

އާ އައިފޯންގެ ޔޫއެސް މޮޑެލްތަކުގައި ސިމް ޓްރޭއެއް ނީންނާނެ އެވެ. ބޭނުންކުރެވޭނީ އީސިމް އެކަންޏެވެ.

އަލަށް އައިފޯންނަށް ގެނައި ސޭފްޓީ ފީޗާ އަކީ ސެޓެލައިޓް މެދުވެރިކޮށް އިމަޖެންސީ އެސްއޯއެސް ފޮނުވުމެވެ. މާނަ އަކީ، ފޯން ސިގްނަލް ނުލިބުނަސް ސެޓެލައިޓް މެދުވެރިކޮށް އެހީއަށް އެދެވުނެވެ.

އައިފޯން 14 ލިބޭނީ 799 ޑޮލަރަށެވެ. އަދި 14 ޕްލަސް ލިބޭނީ 899 ޑޮލަރަށެވެ. އައިފޯން 14 މި މަހުގެ 16 އިން ފެށިގެން ލިބޭނެ އެވެ. އަދި ޕްލަސް ލިބޭނީ އޮކްޓޫބަރު 7 އިން ފެށިގެންނެވެ.

މިރޭގެ އިވެންޓުގެ އެންމެ ހާއްސަ ޕްރޮޑަކްތަކީ އައިފޯން 14 ޕްރޯ އާއި ޕްރޯ މެކްސް އެވެ. މި ފޯނުގައި ނޮޗް ކުޑަކޮށްލުމާ އެކު "ޑައިނަމިކް އައިލެންޑް" ހިމަނައިފަ އެވެ. މިއީ ކޮންމެ އެލާޓަކަށް ވަކި ހާއްސަ ސިފަތަކެއް ދެވޭ ފޯނު ޕާސަނަލައިޒްކޮށްލެވޭ ފީޗާއެކެވެ. މި ފޯނުގައި ހިމަނާފައިވަނީ 48 މެގަޕިކްސެލް ކެމެރާއެކެވެ.

މެކްރޯ ފޮޓޯ ނެގުމާއި ޒޫމްކުރުމާއި ވީޑިއޯކުރުން މި ފޯނުގައި އެޕަލްގެ އެހެން އެއްވެސް ފޯނަކަށް ވުރެ ވެސް އެތައް ގުނައެއް ވަރުގަދަ އެވެ. މިއީ ޕްރޯ ކެމެރާ ސިސްޓަމެއް ހިމަނާފައިވާ ފޯނެކެވެ.

އައިފޯން 14 ޕްރޯ އާއި ޕްރޯ މެކްސް މި މަހުގެ 16 އިން ފެށިގެން ލިބޭނެ އެވެ. ޕްރޯގެ އަގަކީ 999 ޑޮލަރެވެ. އަދި ޕްރޯ މެކްސްގެ އަގަކީ 1،099 ޑޮލަރެވެ.

މިރޭގެ އިވެންޓްގައި އެންމެ ފުރަތަމަ ދައްކާލީ އާ އެޕަލް ވޮޗެވެ. އެއީ ސީރީޒް 8 އެވެ. މި ގަޑީގައި ވަނީ ހެލްތާއި ކަނެކްޓިވިޓީ އިތުރަށް ތަރައްގީކޮށްފަ އެވެ. އެންމެ ހާއްސަ ކަމަކީ އަންހެނުންގެ ސިއްހަތަށް ހާއްސަކޮށް ހިމަނާފައިވާ ޓެމްޕަރޭޗާ ސެންސާ އެވެ. މި ފީޗާއާ އެކު މައްސަރު ކަންތައް މޮނިޓަކުރުމުގެ އިތުރުން ދަރިމައިވުމުގެ ފުރުސަތު ބޮޑު ދުވަސްތައް ނުވަތަ އޮވިއުލޭޝަންގެ ހާލަތު ގަޑިން ދެނެގަނެވޭނެ އެވެ. މި މައުލޫމާތު އެޕަލް ވޮޗުގައި، ހާއްސަ ޕްރައިވަސީއާ އެކު ރައްކާކޮށްދޭނެ އެވެ.

މިފަހަރު އެޕަލް ވޮޗްގެ ސޭފްޓީ ފީޗާސްތަކަށް ވަނީ "ކްރޭޝް ޑިޓެކްޝަން" އިތުރުކޮށްފަ އެވެ. މިއީ ކާރެއް ފަދަ އެއްޗެއްގައި ދަނިކޮށް އެކްސިޑެންޓެއް ވެއްޖެ ނަމަ އެކަން ދެނެގަނެ އިމަޖެންސީ ނަންބަރަކަށް އެ މީހެއްގެ ލޮކޭޝަން ފޮނުވައިދޭ ފީޗާއެކެވެ.

މި ގަޑީގެ ބެޓެރި 18 ގަޑިއިރު ހިފަހައްޓާނެ އެވެ. އަދި ލޯޕަވަ މޯޑްގައި ނަމަ 36 ގަޑިއިރު ހުންނާނެ އެވެ.

ވޮޗް ސީރީޒް 8 ގެ އަގު އުޅެނީ ޖީޕީއެސް ވާޝަން 399 ޑޮލަރަށެވެ. އަދި ޖީޕީއެސް އާއި ސެލިއުލާ ނަމަ 499 ޑޮލަރެވެ.

އެޕަލް ވޮޗް އެސްއީގެ ފެންވަރު ރަނގަޅުކޮށްފައި ވާއިރު ޖީޕީއެސް ވާޝަންގެ އަގަކީ 249 ޑޮލަރެވެ. ޖީޕީއެސް އަދި ސެލިއުލާ ހިމެނޭ ގަޑި 299 ޑޮލަރަށެވެ.

މި މަހު 16 އިން ފެށިގެން މި ގަޑިތައް ބާޒާރުން ގަންނަން ލިބޭނެ އެވެ.

މިފަހަރު ވަނީ މުޅިން އަލަށް "އެޕަލް ވޮޗް އަލްޓްރާ" ނެރެފަ އެވެ. މިއީ އެކްސްޓްރީމް ސްޕޯޓްސް އަށް އަދި އެތުލީޓުންނަށް ހާއްސަ ގަޑިއެކެވެ. އަނެއް ދެ ގަޑިއަށްވުރެ ހުރިހާ ގޮތަކުން ވެސް ވަރުގަދަ މި ގަޑީގެ ބެޓެރީ 60 ގަޑިއިރު ހިފަހައްޓަ އެވެ. މިއީ 100 ފޫޓު އަޑީގައި ވެސް ބޭނުންކުރެވޭ، ފެނުގެ ޓެމްޕަރޭޗާ އާއި ފުންމިން ފަދަ އެތައް ފީޗާއެއް ހިމެނޭ، ޑައިވިން ކޮމްޕިއުޓާއާ އެކު ވޯޓާ ސްޕޯޓްސް އަށް ހާއްސަ ގަޑިއެކެވެ. އެހެންވެ މިއީ ސްކޫބާ ޑައިވިންގައި ވެސް ހާއްސަ އުފެއްދުމަކަށް ވާނެ ކަމަށް އެޕަލް އިން ބުންޏެވެ.

މި ގަޑީގެ އަގަކީ 799 ޑޮލަރެވެ. މި ގަޑި މި މަހުގެ 23 އިން ފެށިގެން ގަންނަން ލިބޭނެ އެވެ.

އެޕަލް ވޮޗަކީ މިދިޔަ ހަތް އަހަރު ވެސް ދުނިޔޭގައި ވިޔަފާރި އެންމެ ރަނގަޅު ސްމާޓް ވޮޗެވެ.

މިރޭ ދައްކާލި އެއާޕޮޑް ޕްރޯގެ ސެކަންޑް ޖެނެރޭޝަންގައި ވެސް އެކްޓިވް ވޮއިސް ކެންސަލޭޝަން އާއި ސްޕޭޝަލް ސައުންޑް ވަނީ ހިމަނަައިފަ އެވެ. މީގެ ޗާޖިން ކޭސްއާ އެކު 30 ގަޑިއިރުގެ ޗާޖު ހުންނާނެ އެވެ. އަދި ޗާޖިން ކޭސް ގެއްލިއްޖެ ނަމަ ފޯނުން ލޮކޭޓްކުރެވޭނެ އެވެ. އަދި ކޭސްގައިވާ ސްޕީކަލުން އެލާޓް ވެސް ކޮށްލެވޭނެ އެވެ.