މަސްވެރިކަމަށް ހާއްސަ ކްލަބެއް އިހަވަންދޫ ސްކޫލުގައި އުފައްދައިފި

ހއ. އިހަވަންދޫ ސްކޫލުގެ ކުދިން މަސްވެރިކަމަށް ޝައުގުވެރި ކުރުވަން ހާއްސަ ކްލަބެއް އެ ސްކޫލުގައި އުފައްދައިފި އެވެ. މިއީ މަސްވެރިކަމާ ގުޅޭގޮތުން ސްކޫލެއްގައި އުފެއްދި ފުރަތަމަ ކްލަބެވެ.

އެ ސްކޫލުގައި މިދިޔަ ހުކުރު ދުވަހު ބޭއްވި ރަސްމިއްޔާތެއްގައި "ޔަންގް ފިޝާސް ކްލަބް" އިފުތިތާހު ކޮށްދެއްވީ ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަނެވެ.

އިހަވަންދޫ ސްކޫލުގެ ޑެޕިއުޓީ ޕްރިންސިޕަލް މުހައްމަދު އަބްދުއްސަމަދު "މިހާރު" އަށް ވިދާޅުވީ، މަސްވެރިކަމަށް ހާއްސަ ކްލަބެއް އުފެއްދުމާއި އެ ކަމަށް އެހީތެރިކަން ދިނުމަށް މަސްވެރިންގެ ޖަމިއްޔާ އިން ޝައުގުވެރިކަން ފާޅުކުރި ކަމަށެވެ.

އެ ފަރާތުގެ ހުށަހެޅުން ބެލުމުން އޭގައި ކުދިންނަށް ބޭނުންތެރި އަދި ގައުމީ މަންހަޖުގައި ބުނާ ކަންކަން ހާސިލު ކުރެވޭނެތީ އެ ކްލަބު އުފައްދަން ނިންމީ ކަމަށް އޭނާ ވިދާޅުވި އެވެ.

ޔަންގް ފިޝާސް ކްލަބްގެ ހަރަކާތްތައް ގެންދާނީ މަސްވެރިންގެ ޖަމިއްޔާގެ އެހީތެރިކަމާއެކުގަ އެވެ.

"ހަމައެކަނި ދޮށިއަޅައިގެން މަސްވެރިކަން ކުރުމެއް ނޫން މި ހިމެނެނީ. މަސްވެރިކަމަށް ނުކުންނަ ޒުވާނުންނަށް ޖީޕީއެސް ބޭނުންކުރާނެ ގޮތްތަކާއި މޫސުން ބަލާނެ ގޮތާއި މޫސުން ލަފާކުރާނެ ގޮތް ވެސް ކިޔައިދޭނެ،" ސަމަދު ވިދާޅުވި އެވެ.

އެ ކްލަބުގައި އުޅެނީ ގްރޭޑު 6،7 އަދި 8 ގެ ކުދިންނެވެ. މަސް ބޭނުމުގައި އަމަލީގޮތުން ފިރިހެނުން އުޅުނަސް އެ ކްލަބުގައި އަންހެން ދަރިވަރުން ބައިވެރިވާކަން އިހަވަންދޫ ސްކޫލުން ފާހަގަކުރެ އެވެ.

ސަމަދު ވިދާޅުވީ މަސްވެރިކަމުގައި ރާއްޖެއިން ވެސް ފާހަގަކުރެވޭ އިހަވަންދޫގެ ދޯނިތަކުން މަސްބާނައިގެން ރަށަށް ދިއުމުން އެ ކެއްކުމުން ފެށިގެން ދެން ހުރި އެހެން ކަންކަމުގައި އެންމެ އިސް ސަފުގައި ބައިވެރިވަނީ އަންހެނުން ކަމަށެވެ.

އެހެންވެ، މިއީ މުހިއްމު މަސައްކަތަކަށް ވާނެ ކަމެއް ކަމަށް އޭނާ ގަބޫލުކުރައްވަ އެވެ.

ފައުންޑޭޝަނުން ފެށިގެން ގްރޭޑު 12 އާ ހަމައަށް ކިޔަވައިދޭ އިހަވަންދޫ ސްކޫލުގައި 850 އަށް ވުރެ ގިނަ ކުދިން ކިޔަވަ އެވެ.