ހޮޓެލް އޭޝިއާ، 150 އަށް ވުރެ ގިނަ ސްޓޯލާ އެކު ފަށައިފި

ރާއްޖޭގައި ބާއްވާ އެންމެ ބޮޑު އެގްޒިބިޝަން، ހޮޓެލް އޭޝިއާ މިއަދު ފަށައިފި އެވެ.

ޓުއަރިޒަމް މިނިސްޓަރު ޑރ. އަބްދުﷲ މައުސޫމް މި އެގްޒިބިޝަން ހުޅުއްވައިދެއްވުމަށް ފަހު ވިދާޅުވީ މިއީ ރާއްޖޭގެ ޓޫރިޒަމް ތަރައްގީކޮށް ހިދުމަތްތަށް އިތުރަށް ފުޅާކުރުމަށް ފަހިވެގެންދާ ފުރުސަތެއް ކަމަށެވެ.

މިނިސްޓަރު ވިދާޅުވީ އެކި ކަންކޮޅުތަކުން ޓޫރިސްޓުން އަންނަ އިރު، އެ މީހުންނަށް ބޭނުންވާ ކާބޯތަކެތި ތައްޔާރުކުރުމަށް ބޭނުންވާ ތަކެތި ހޯދައި، ފުޑް އެންޑް ބެވަރެޖް ދާއިރާ އިތުރަށް ފުޅާ ކުރުމަށް މި އެގްޒިބިޝަނުން މަގުފަހިވެގެން ދާނެ ކަމަށެވެ.

އެ ރަސްމިއްޔާތުގައި، ހޮޓެލް އޭޝިއާ އިންތިޒާމު ކުރާ މޯލްޑިވްސް އެގްޒިބިޝަން އެންޑް ކޮންފަރެންސް ސާވިސް (މެކްސް)ގެ ޑިރެކްޓަރު އާސިމް މުހުތާރު ވިދާޅުވީ، މިއީ އިންޓަނޭޝަނަލް މިންގަނޑުތަކާ އެއްގޮތަށް ފަރުމާކޮށްފައިވާ އެގްޒިބިޝަނެއް ކަމަށެވެ. އަދި ކޮވިޑުގެ ބަލިމަޑުކަމާ ހެދ މެދު ކެނޑުމަށް ފަހު ބާއްވާ މި އެގްޒިބިޝަނަށް ތަރުހީބު ބޮޑު ކަމަށް ވިދާޅުވި އެވެ.

"މި އަހަރުގެ އެގްޒިބިޝަންގެ ފެށުން ވަރަށް ކާމިޔާބު. ކޮވިޑަށް ފަހު ބާއްވާ އެންމެ ފުރަތަމަ ހޮޓެލް އޭޝިއާ އަކީ ވެސް ހައުސްފުލް އިވެންޓެއް. އެގްޒިބިޝަނުގެ ހުރިހާ ސްލޮޓެއް ވަނީ ފުރިފައި. 150 އަށް ވުރެ ގިނަ ސްޓޯލު މި އަހަރު އެބަ ހުރި." އޭނާ ވިދާޅުވި އެވެ.

އެކްސްޕޯ ހުޅުވުމަށް ބޭއްވި ރަސްމިއްޔާތުގައި، މިނިސްޓަރު މައުސޫމަށް މެކްސްގެ ފަރާތުން ހަނދާނީ ފިލައެއް ވަނީ ދީފަ އެވެ. އަދި ރާއްޖޭގެ ޓޫރިޒަމަށް 50 އަހަރު ފުރުން ފާހަގަކުރުމަށް ކޭކެއް ފެޅި އެވެ.

އެގްޒިބިޝަން ފެށުމަށް ބޭއްވިި ރަސްމިއްޔާތަށް ފަހު މިނިސްޓަރު ވަނީ އެކި ސްޓޯލްތަކަށް ޒިޔާރަތްކުރައްވައިފަ އެވެ.

މި އަހަރުގެ ހޮޓެލް އޭޝިއާގައި ރާއްޖޭގައި ފުޑް އެންޑް ބެވަރެޖުގެ ދާއިރާގެ ގިނަ ކުންފުނިތަކަކާއި، ރިސޯޓުތަކަށް މުދާ ސަޕްލައިކުރާ ގިނަ ކުންފުނިތަކަކުން ވަނީ ބައިވެރިވެފަ އެވެ. އަދި ދެކުނު އޭޝިއާ ސަރަހައްދުގެ ބައެއް ކުންފުނިތަކުން ވެސް ބައިވެރިވި އެވެ.

ހޮޓެލް އޭޝިއާގެ މެއިން ސްޕޮންސަރަކީ ބެސްޓް ބައި މޯލްޑިވްސް އެވެ. އަދި ޑިޖިޓަލް ޕާޓްނަރަކީ ދިރާގެވެ. އެ އެގްޒިބިޝަނަކީ ޓޫރިޒަމް މިނިސްޓްރީ އާއި ނެޝަނަލް ޗެމްބާ އޮފް އެކްސްޕޯޓާސް އިން ސްރީ ލަންކާއިން އެންޑޯސްކޮސްފައިވާ އިވެންޓެކެވެ.

އެ އެގްޒިބިޝަން ކުރިއަށް ދާނީ މި މަހުގެ 12 ވަނަ ދުވަހުގެ ނިޔަލަށެވެ. އެގްޒިބިޝަން ހުޅުވާފައި ހުންނާނީ ހެނދުނު 10 އިން ރޭގަނޑު 7 އަށެވެ.