އައިޖީއެމްއެޗުގެ މެންޓަލް ހެލްތު ސެންޓަރުގެ ކިއު 500 އަށް ދަށްވެއްޖެ

ނަފުސާނީ އެކި މައްސަލަތަކަށް ފަރުވާ ހޯދުމަށް އައިޖީއެމްއެޗުގެ މެންޓަލް ހެލްތު ސެންޓަރުގެ ވެއިޓްލިސްޓުގައި ތިބި މީހުންގެ އަދަދު 500 އަށް ދަށްވެއްޖެ އެވެ.

ސަރުކާރުގެ މައި ހޮސްޕިޓަލުން ފަރުވާ ހޯދަން އަބަދު ވެސް ދިގު ކިއުއެއް އޮވެ އެވެ. އެކަމަކު، ހިންގުމަށް މި ފަހުން ގެނައި ބަދަލާއެކު ވެސް، ނަފުސާނީ ބަލިތަކަށް ފަރުވާ ހޯދަން އޮތް ކިއު ކުޑައެއް ނުވެ އެވެ. އެކަމާ ގުޅިގެން ގިނަ ބައެއްގެ ފާޑުކިޔުން އަމާޒުވެފައިވެ އެވެ.

މެންޓަލް ހެލްތު ސެންޓަރުގެ ހެޑް، ޑރ. ޝަނޫހާ މަންސޫރު "މިހާރު" އަށް މިއަދު ވިދާޅުވީ މި ފަހަކާ ޖެހެންދެން ވެސް އެ ސެންޓަރުގައި މަސައްކަތްކުރީ ހަތަރު ސައިކޭޓްރިސްޓަކު ކަމަށެވެ. އެކަމަކު، އިތުރު ސައިކޭޓްރިސްޓުންނާއެކު އެ އަދަދު 8 އަށް އިތުރުވެ، ގިނަ މީހުން ބަލަން ފެށުމުން ކިއު ކުޑަވީ ކަމަށް އޭނާ ފާހަގަކުރެއްވި އެވެ.

ފަރުވާ ހޯދަން މިދިޔަ މާޗު-އޭޕްރީލް މަހާ ހަމައަށް ވެސް 3،500 އެއްހާ މީހުން ލިސްޓުގައި ތިއްބެވެ. ނަމަވެސް، މިދިޔަ މަސް ނިމުނުއިރު އެ އަދަދު ވަނީ 510 އަށް ދަށްވެފަ އެވެ.

އެ ސެންޓަރުން ފަރުވާ ހޯދަން މީގެ ކުރިން އެވްރެޖުކޮށް އަހަރެއް ހޭދަވެ އެވެ.

ޝަނޫހާ ވިދާޅުވީ މިހާރު އެ މަރުކަޒުން ގުޅަމުން އަންނަނީ މިދިޔަ ޖޫން މަހު ނަން ނޯޓު ކުރި މީހުންނަށް ކަމަށެވެ. އޭގެ މާނައަކީ، ކިއުގައި ހޭދަވާ މުއްދަތު އެއް އަހަރުން ތިން މަހަށް ކުޑަވީ އެވެ.

މީގެ ތިން އަހަރު ކުރިން، މާޗު 2019 ގައި ހުޅުވި ސެންޓަރުން މިދިޔަ މަހުގެ ނިޔަލަށް 55،608 ކޮންސަލްޓޭޝަން ހަދާފައިވެ އެވެ.

ޝަނޫހާ ވިދާޅުވި ގޮތުގައި ނަފުސާނީ އުނދަގޫތަކުން އަރައިގަތުމަށް އަމިއްލަ އަށް އަދި މުޖުތަމައަށް ކުރެވޭނެ ބައިވަރު ކަންކަން އެބަހުއްޓެވެ. ސްޒިފްރެނިއާއާ ބައިޕޯލާ ފަދަ ސީރިއަސް ބަލިތައް ހުންނަ މީހުންނަށް ހުރިހާ ދިމާލަކުން ވެސް ސަޕޯޓު ބޭނުންވާކަން އޭނާ ފާހަގަކުރެއްވި އެވެ.