ވެއިޓިން ލިސްޓު ދިގުވެ ނަފްސާނީ ފަރުވާދޭ މަރުކަޒުން އެޕޮއިންޓްމަންޓް ނެގުން މެދުކަނޑާލައިފި

ވެއިޓިން ލިސްޓު ދިގުވުމުން ނަފްސާނީ ބަލިތަކަށް ފަރުވާ ހޯދުމަށް އެޕޮއިންޓްމަންޓް ނެގުން މެދުކަނޑާލައިފި އެވެ.

އައިޖީއެމްއެޗުގައި ގާއިމްކޮށްފައިވާ ސެންޓަރަށް މިރޭ ގުޅުމުން ބުނީ، ކިއު ދިގުވުމުން މި ދުވަސްކޮޅު އެޕޮއިންޓްމަންޓް ނެގުން މަޑުޖައްސާލާފައިވާ ކަމަށެވެ. ކިއުގައި ތިބި މީހުންގެ އަދަދެއް އަދި އަލުން ނަން ނޯޓުކުރަން ފަށާނެ ސީދާ ތާރީހެއް ނުބުނެ އެވެ.

އަލަށް ޑޮކްޓަރަށް ދެއްކުމަށް އެޕޮއިންޓްމަންޓް ނުނެގިއަސް މީގެ ކުރިން އެ ތަނަށް ދައްކާފައި ތިބި މީހުންނަށް ފޮލޯއަޕް ހެދުމަށް، އެ ޑިޕާޓްމަންޓަކުން ނަން ނޯޓުކުރެވޭނެ އެވެ.

ނަފްސާނީ ބައްޔަށް ހާއްސަ ސަމާލުކަމެއް ދީ އެފަދަ ފަރުވާދޭނެ ވަކި މަރުކަޒެއް ހެދުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. އެކަމަކު ބަލީގެ ހާލަތު އޮތް މިންވަރާ ގާތަށް ވެސް ފަރުވާ ނުދެވޭ ކަމުގެ ޝަކުވާ ވަރަށް ބޮޑެވެ.

ކިއުގައި އެތައް ދުވަހަކު މަޑުކުރަން ޖެހުމަކީ އޭގެ އެއް މިސާލެވެ.

އެ ސެންޓަރުން މިދިޔަ ޑިސެމްބަރު މަހު "މިހާރު" އަށް ހިއްސާކުރި މައުލޫމާތަށް ބަލާއިރު، ފަރުވާ ހޯދަން ހާހަކަށް ވުރެ ގިނަ މީހުން ކިއުގައި އޭރު ތިއްބެވެ. މާޗު 25، 2019 ގައި ހުޅުވި ސެންޓަރުން މިދިޔަ އަހަރު އެކަނި ވެސް 14،365 ކޮންސަލްޓޭޝަންގެ ހިދުމަތް ހޯދި އެވެ. އެއީ، އޭގެ ކުރީ އަހަރާ އަޅާ ބަލާއިރު ތިން ގުނަ އިތުރުވުމެވެ.

މެންޓަލް ހެލްތު ސެންޓަރު ހުޅުވި އަހަރު މުޅި ޖުމްލަ 7،053 ކޮންސަލްޓޭޝަން ހިދުމަތް ދިނެވެ.

ރާއްޖޭގައި ކޮވިޑް-19 ގެ ހާލަތު އިތުރަށް ގޯސްވެ އެތައް ބައެއްގެ ދިރިއުޅުމަށް އަސަރުކުރުމުގެ ނަތީޖާއަކީ ނަފްސާނީ މައްސަލަތައް އިތުރުވުމެވެ. ނަމަވެސް މި ފަދަ ހާލަތެއްގައި ފަސޭހައިން ޑޮކްޓަރަށް ނުދެއްކެވޭތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.