އުތުރު ކޮރެއާ އިން ނިއުކްލިއާ ގާބިލު މިސައިލެއް އަޖުމަ ބަލައިފި

ނިއުކްލިއާ ހަތިޔާރު އުފުލުމުގެ ގާބިލުކަން ލިބިފައިވާ ދެ މިސައިލެއް، އުތުރު ކޮރެއާ އިން އަޖުމަ ބަލައިފި ކަމަށް އެ ގައުމުން މިއަދު ބުނެފި އެވެ.

އުތުރު ކޮރެއާގެ ރަސްމީ ނޫސް އޭޖެންސީން ބުނި ގޮތުގައި މިއަދު އަޖުމަ ބެލި ދެ މިސައިލަކީ ވެސް ދުރު ރާސްތާގެ ކުރޫޒް މިސައިލެވެ. މި ހަތިޔާރުގެ އަޖުމަބެލީ އުތުރު ކޮރެއާގެ އަސްކަރިއްޔާގައި ހުރި ހަނގުރާމައިގެ ގާބިލުކަން އިތުރު ކުރުމުގެ ގޮތުންނާއި، ނިއުކްލިއާ ހަތިޔާރުގެ ބޭނުން ހިފަން ޖެހިއްޖެ ހާލަތެއްގައި އެކަން ކުރުމުގެ ގާބިލުކަން އަސްކަރިއްޔާ އަށް ލިބިދިނުމުގެ ގޮތުންނެވެ.

މިއަދު ހެނދުނު އަޖުމަބެލި މިސައިލް ދަތުރު ކުރީ ކޮރެއާގެ އިރުމަތިން ކަނޑުގެ ސަރަހައްދަށެވެ. އުތުރު ކޮރެއާ ސަރުކާރުން ބުނި ގޮތުގައި ދެ މިސައިލް ވެސް 2000 ކިލޯމީޓަރު ދުރަށް ދަތުރުކޮށް، އެއަށް ކަނޑައެޅިފައިވާ އަމާޒަށް ހަމަލާ ދިނެވެ. ނަމަވެސް އެ އަމާޒަކީ ކޮބައިކަމެއް އެ ގައުމުން ނުބުނެ އެވެ.

މިއަދު އަޖުމަ ބެލި ދެ މިސައިލާ ބެހޭ ގޮތުން އުތުރު ކޮރެއާގެ ރައީސް ކިމް ޖޮންގް-އުން ވިދާޅުވީ މިއީ އެ ގައުމުގެ އަދުއްވުންނަށް ދިން އިންޒާރެއް ކަމަށެވެ. ކޮރެއާ ސަރަހައްދުގައި ކޮންމެ ވަގުތެއްގައި ވެސް އުފެދިދާނެ އަސްކަރީ ހަމަނުޖެހުމަކުން ދުރުހެލިވެ އޮތުމަށްޓަކައި، އުތުރު ކޮރެއާގެ ނިއުކްލިއާ އަސްކަރީ ގާބިލުކަން އިތުރުކުރުން މަތީ ގައުމު ދެމިއޮންނާނެ ކަމަށް ވެސް އޭނާ ވިދާޅުވި އެވެ.

އުތުރު ކޮރެއާގެ ރަސްމީ ނޫސް އޭޖެންސީން ބުނި ގޮތުގައި ދެ ހަފުތާގެ މުއްދަތަށް މިހާރު ފަށާފައިވާ އަސްކަރީ ތަމްރީންތައް ހިނގާ ގޮތް އެ ގައުމުގެ ރައީސް ގެންދަވަނީ ވަރަށް ގާތުން ބައްލަވަމުންނެވެ. މި ތަމްރީންތަކުގައި، އެ ގައުމުގެ ނިއުކްލިއާ ފައުޖުގެ ސިފައިން ވެސް ބައިވެރިވެ އެވެ.

އެ ފަރިތަކުރުންތަކުގައި އުތުރު ކޮރެއާ އިން ވަނީ، މެދު ރާސްތާގެ ބެލިސްޓިކް މިސައިލެއްގެ އަޖުމަ ބެލުމުގެ ގޮތުން ޖަޕާނުގެ މަތިން ކަނޑުގެ ސަރަހައްދަށް ފޮނުވާލައިފަ އެވެ. މިއީ އެމެރިކާގެ މަތިންދާބޯޓު އުފުލާ މަނަވަރު ރޮނަލްޑް ރޭގަން ބައިވެރިކޮށްގެން އެމެރިކާ އާއި ދެކުނު ކޮރެއާގެ ސިފައިން ބޭއްވި އަސްކަރީ ތަމްރީންތަކަށް ރައްދު ދިނުމުގެ ގޮތުން އުތުރު ކޮރެއާ އިން ކުރި ކަމެކެވެ.