ޓެކްސް ބޮޑު ކުރަން ވިޔަފާރިވެރިންނާއި ތަޖުރިބާކާރުންގެ ހިޔާލު ހޯދުމާ މެދު ދެބަސްވުމަކަށް!

މުދަލާއި ހިދުމަތުގެ އަގުން ނަގާ ޓެކްސް ބޮޑު ކުރަން ސަރުކާރުން ހުށަހަޅާފައިވާ ބިލަށް ވިޔަފާރިވެރިންގެ މަޝްވަރާ ހޯދުމަށް ރައްޔިތުންގެ މަޖިލީހުގެ އެމްޑީޕީ މެމްބަރުންގެ މެދުގައި ހިޔާލު ތަފާތު ވެއްޖެ އެވެ.

އެ ކަމުގައި މެމްބަރުންގެ ހިޔާލު ތަފާތުކަން އެނގުނީ ޖީއެސްޓީ 8 ޕަސެންޓަށް އަދި ޓީޖީއެސްޓީ 12 ޕަސެންޓަށް ބޮޑު ކުރަން ސަރުކާރުން ހުށަހެޅި ބިލާ މެދު މަޝްވަރާ ކުރަން މިއަދު މުޅި މަޖިލީހުގެ ކޮމިޓީގައި އޮތް ހޫނު ބަހުސްގަ އެވެ.

އެ މައްސަލައިގައި ވާހަކަ ދައްކަވަމުން މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ވިޔަފާރިތަކަށް ކުރާނެ އަސަރު ދެނެގަތުމަށް އެ މީހުންނާ މަޝްވަރާ ކުރުމުގެ ދޮރު ބަންދުވެފައިވާ ކަމަށް ތުހުމަތު ކުރައްވައިފަ އެވެ.

ސަބަބެއް ގޮތުގައި އާޒިމް ވިދާޅުވީ، މަޝްވަރާތައް ކުރުމުގެ ކުރިން ސަރުކާރުން ބިލު ފޮނުވި ގޮތަށް ފާސްކުރަން އެމްޑީޕީގެ ޕާލަމެންޓަރީ ގްރޫޕުން ތްރީ ލައިން ވިޕެއް ނެރުމެވެ.

އެހެން ވިދާޅުވުމާއެކު މަޖިލިސް ހޫނުވެފައި ވަނިކޮށް، ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ، މަޖިލީހުގެ އިޖުރާއަތުތައް އޮންނަނީ ތިން ކިޔުމެއްގެ މައްޗަށް ކަމަށާއި ފުރަތަމަ ކިޔުމަކީ މެމްބަރުން ތަޅުމުގައި ކުރައްވާ މަސައްކަތް ކަމަށެވެ.

ދެވަނަ ކިޔުމުގައި ކަމާ ގުޅޭ މާހިރުން މަޖިލިހަށް ގެނެސްގެން ކަންކަން ސާފުކުރުމުގެ މަސައްކަތް މެމްބަރުން ކުރައްވާނެ ކަމަށް ނަޝީދު ވިދާޅުވި އެވެ.

"މި ތަނަށް ކަމާ ގުޅޭ މާހިރުން ގެންނާނަން. ޑިމޮކްރެޓިކް އިޖުރާތުތައް އަޅުގަނޑު ހިފަހައްޓާނަން،" ނަޝީދު ވިދާޅުވި އެވެ.

އެކަމަކު، އެ މަނިކުފާނުގެ ވާހަކަފުޅަށް ރައްދު ދެއްވަމުން ތިނަދޫ އުތުރު ދާއިރާގެ މެމްބަރު އަބްދުﷲ ސަނީފު ވިދާޅުވި ގޮތުގައި، ކަމާ ގުޅޭ މާހިރުން ހާޒިރު ކުރަން ނަޝީދު ނިންމާފައި ވަނީ މެމްބަރުންގެ ރުހުމާ ނުލައި ކަމަށާއި އެއީ މަޖިލީހުގެ ރައީސަށް އަމިއްލަފުޅަށް ނިންމެވޭނެ ކަމެއް ނޫން ކަމަށެވެ.

މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވިދާޅުވީ، މުޅި މަޖިލީހުގެ ކޮމިޓީގެ ވަގުތު އިތުރު ކުރުމަށް ހުށަހަޅައި ތާއީދު ލިބިފައި ވަނިކޮށް، ވޯޓަށް ނާއްސަވަން ނަޝީދު ނިންމަވާފައިވާ ކަމަށާއި އެ ކަހަލަ ކަންކަން ނުކުރައްވަން އިލްތިމާސް ކުރައްވާ ކަމަށެވެ.

ޝަރީފު ވިދާޅުވިގޮތުގައި، ޓެކްސް ބޮޑުކުރުމާ ގުޅޭ ގޮތުން ލަފާ ހޯދަން މާހިރުން ގެންނަން ރިޔާސަތުން ނަޝީދު ނިންމާފައިވާ އިރު އެކަން ވެސް ކުރެވޭނީ މަޖިލީހުން ފާސް ކޮށްގެންނެވެ

"ރައީސަށް އިލްތިމާސެއް ދަންނަވަން ބޭނުން. އެއީ މަޖިލީހުގެ ގަވައިދާ އެއްގޮތަށް މަޖިލިސް ހިންގަމުން ގެންދެވުމަށް،" ޝަރީފު ވިދާޅުވި އެވެ.

މަޖިލިހަށް މީހުން ހާޒިރު ކުރުމާ ވެސް ސަރުކާރުގެ މެމްބަރުން ދެކޮޅު ހައްދަވާތީ އިދިކޮޅު ޕީޕީއެމްގެ މެމްބަރުން ވެސް ގެންދެވީ މިއަދުގެ ޖަލްސާގައި އަޑުގަދަކުރައްވައި އެކަމަށް ފާޑުވިދާޅުވަމުންނެވެ. ނަޝީދު ވެސް ވިދާޅުވަމުން ގެންދެވީ މަޖިލީހަށް ހާޒިރު ކުރަން ޖެހޭ ފަރާތްތައް ހާޒިރު ކުރައްވާނެ ކަމަށެވެ.

އެ މަނިކުފާނު ވިދާޅުވި ގޮތުގައި މާދަމާ މަޖިލީހުގެ މުޅި ކޮމިޓީ އަށް ފިނޭންސް މިނިސްޓަރު އިބްރާހިމް އަމީރާއި މަޓީ އާއި ޗެމްބާ އޮފް ކޮމާސް އަދި ގެސްޓް ހައުސް އެސޯސިއޭޝަންގެ ވެރިން ހާޒިރު ކުރާނެ އެވެ.