ޝިމާޒަށް ދިން ހަމަލާގައި ނަހުލާގެ އެއްވެސް ބައިވެރިވުމެއް ނެތް: ޖޭޕީ

ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީ އަށް މިރޭ މަގުމަތިން ބަޔަކު ދިން ހަމަލާގައި ޖުމްހޫރީ ޕާޓީގެ ކައުންސިލް މެމްބަރު އަދި ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު އައިޝަތު ނަހުލާގެ އެއްވެސް ބައިވެރިވުމެއް ނޯނާނެ ކަމަށް އެ ޕާޓީން ބުނެފި އެވެ.

ކޮރަޕްޝަންގެ މައްސަލަތަކެއްގައި ޝިމާޒު ހިމެނޭ ކަމަށް ތުހުމަތު ކުރެވިގެން އޭނާގެ މައްސަލަ ޓްރާންސްޕޯޓް މިނިސްޓްރީން ދަނީ ތަހުގީގު ކުރަމުންނެވެ. އެ މައްސަލަތަކުގެ ތެރޭގައި ގަވާއިދާ ހިލާފަށް ވެހިކަލް ރަޖިސްޓްރީކޮށްދިން ކަމަށް ތުހުމަތުވާ މައްސަލަތަކެއް ވެސް ހިމެނެ އެވެ. އެކަމަކު އޭނާ ވަނީ އެ ތުހުމަތުތައް އެތައް ފަހަރަކު ދޮގު ކުރައްވައިފަ އެވެ.

މި މައްސަލަތައް ތަހުގީގު ކުރަމުން ދަނިކޮށް ޝިމާޒަށް މިރޭ ހަމަލާދީފައިވާ އިރު، މިދިޔަ ހަފުތާގެ ތެރޭގައި ބަޔަކު ވަނީ އޭނާގެ ސައިކަލަށް ވެސް ގެއްލުން ދީފަ އެވެ. އަދި އޭނާ އަށް ވަނީ އިންޒާރުދީ މެސެޖު ކޮށްފަ އެވެ. އެ މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.

ޝިމާޒަށް ހަމަލާދިން މައްސަލައާ މިނިސްޓަރު ނަހުލާއާ ގުޅުމެއް އޮތް ކަމަށް ދެއްކެވޭ ވާހަކަތަކަށް ރައްދު ދެއްވައި ޖުމްހޫރީ ޕާޓީގެ ސްޕޯކްސްޕާސަން އަލީ ސޯލިހު "މިހާރު" އަށް މިރޭ ވިދާޅުވީ ޝިމާޒަށް ހަމަލާ ދިނުމަކީ އެ ޕާޓީން ވެސް ކަންބޮޑުވާ ކަމެއް ކަމަށެވެ.

އެކަމުގައި ނަހުލާގެ ބައިވެރިވުން އޮތް ކަމަށް ދެއްކެވޭ ވާހަކަތައް އަލީ ސޯލިހު ދޮގުކުރެއްވި އެވެ. ޖޭޕީ އަކީ އެއްވެސް އިންސާނަކަށް އަނިޔާ ދިނުމަށް ބާރުއަޅާނެ ޕާޓީއެއް ނޫން ކަމަށް ވިދާޅުވި އެވެ.

"ގާސިމް ވެސް ވިދާޅުވީ އެ ބޭފުޅާ އަދި އާއިލާގެ އެއްވެސް ޝާމިލް ވުމެއް ނޯނާނެ ކަމަށް މި ހަމަލާގެ ފަހަތުގައި. މިނިސްޓަރު ނަހުލާގެ ވެސް އެއްވެސް ބައިވެރިވުމެއް ނޯނާނެ. މިއީ ޒާތީ ގޮތުން [ނަހުލާގެ] އަބުރު ކަތިލުމަށް ފަތުރާ ދޮގު ޚަބަރެއް،" އަލީ ސޯލިހު ވިދާޅުވި އެވެ.

ޝިމާޒް "މިހާރު" އަށް ކުރިން ވިދާޅުވި ގޮތުގައި ވެހިކަލް ރަޖިސްޓްރޭޝަނާއި ޓްރާންސްޕޯޓް މިނިސްޓްރީގެ ތެރޭގައި ހިނގާ އެހެން މައްސަލަތަކުގެ ތުހުމަތު އެޅުވިޔަސް ގާނޫނާއި ގަވާއިދާ ޚިލާފަށް އެއްވެސް ކަމެއް ކުރައްވާފައެއް ނޯންނާނެ އެވެ. ހުރިހާ ޒިންމާއެއް އަދާކުރައްވަނީ މިނިސްޓަރު ނަހުލާ އަށް އެނގިވަޑައިގެން ކަމަށް ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމްގެ ސްލޮޓްގައި ސަރުކާރުގެ މަގާމަށް ވަޑައިގެންނެވި ޝިމާޒް ވިދާޅުވި އެވެ. މަގާމުގެ ނުފޫޒު ބޭނުންކޮށްގެން، ރާއްޖޭގައި ދުއްވާ ހުރިހާ ވެހިކަލްތަކުގެ ނަމްބަރު ޕްލޭޓް ބަދަލުކުރަން ވަސާޖިއޯ ނަމަކަށް ކިޔާ ކުންފުންޏާ ހަވާލުކުރި މައްސަލައިގައި އެމްއާރުއެމުން ވެސް އޭނާގެ މައްސަލަ ބެލި އެވެ. އެކަމަކު ޕާޓީން އޭނާއާ މެދު ފިޔަވަޅެއް ނާޅަން ނިންމީ ޕީޖީން ދައުވާނުކޮށް މައްސަލަ އަނބުރާ އޭސީސީއަށް ފޮނުވާލުމުންނެވެ. ޝިމާޒަށް މިރޭ ދިން ހަމަލާ އެމްއާރްއެމުން ކުށްވެރި ކުރި އެވެ.