ވެހިކަލް ރަޖިސްޓްރީ ކޮށްދިން މައްސަލާގައި ސަސްޕެންޑްކުރި މުވައްޒަފު ވަޒީފާއަށް

ވެހިކަލް ރަޖިސްޓްރީކޮށްދިނުމުގައި ކޮރަޕްޝަން ހިންގާ ކަމަށް ތުހުމަތުކުރި މައްސަލައާ ގުޅިގެން ސަސްޕެންޑްކުރި ޓްރާންސްޕޯޓް މިނިސްޓްރީގެ އެސިސްޓެންޓް ޑިރެކްޓަރު ރުޝޫނާ ރަޝާދު އަލުން ވަޒީފާއަށް ނުކުމެއްޖެ އެވެ.

ސިވިލް ސާވިސް ކޮމިޝަނުން ބެލި މައްސަލައަކާ ގުޅިގެން އޭނާ ސަސްޕެންޑްކުރީ މިދިޔަ މަހުގެ 16 ގަ އެވެ. އޭގެ މަހެއްހާ ދުވަސް ފަހުން މިދިޔަ ހަފުތާގައި އޭނާގެ ސަސްޕެންޝަން ވަނީ އުވާލައިފަ އެވެ.

ޓްރާސްޕޯޓް މިނިސްޓްރީގެ ސްޓޭޓް މިނިސްޓަރު ހިދާޔާ ނަސީރު ވިދާޅުވީ ރުޝޫނާގެ ސަސްޕެންޝަން އުވާލުވުމުން މިދިޔަ އާދީއްތަދުވަހުން ފެށިގެން ވަޒީފާއަށް ނިކުންނަން ފަށާފައިވާ ކަމަށެވެެ.

އެކަމަކު ސަސްޕެންޝަން އުވާލި ސަބަބެއް ވިދާޅެއް ނުވެ އެވެ.

ބޮޑެތި އަދަދުތަކުން ފައިސާ ނަގައިގެން ވެހިކަލް ރަޖިސްޓަރީ ކޮށްދިނުމުގައި މިނިސްޓަރު އައިޝަތު ނަހުލާ އާއި އެ މިނިސްޓްރީ ތެރޭގައި ތިބި ބަޔަކު ހިންގާ ކަމަށް ތުހުމަތުކުރާ ހިޔާނާތާއި އެ ނޫން ވެސް މައްސަލަތަކެއް އޭސީސީއަށް ވަނީ ހުށަހަޅައިފަ އެވެ. އެ ތުހުމަތުތައް ތަހުގީގުކުރަމުން އަންނަ ކަމަށް ވެސް އެ ކޮމިޝަނުން ބުންޏެވެ.

ޓްރާންސްޕޯޓް މިނިސްޓްރީ ތެރޭގައި ހިންގި ހިޔާނާތުގެ މައްސަލަތަކަކާ ގުޅިގެން އެތަނުގެ އިސްވެރިންތަކެއްގެ މައްސަލަ ބަލައި މީގެ ކުރިން ދައުވާ އުފުލަން ޕީޖީއަށް ވެސް ފޮނުވި އެވެ. އެކަމަކު، އެކަށީގެންވާ ހެކި ނެތި ކަމަށް ބުނެ އެ މައްސަލަތަކުގައި ޕީޖީން ދައުވާއެއް ނުކުރެ އެވެ.