އިންޓެލް ރިޕޯޓަކަށް ބިނާކޮށް ވަކިކުރި ޕީޖީގެ ވަކީލަކަށް ބަދަލު ދޭން ޖެހިއްޖެ

ފުލުހުންގެ އިންޓެލިޖެންސް ރިޕޯޓަކަށް ބިނާކޮށް ޕްްރޮސެކިއުޓާ ޖެނެރަލްގެ އޮފީހުން ވަކިކުރި ވަކީލަކަށް ބަދަލުގެ ގޮތުގައި ދޮޅު ލައްކަ ރުފިޔާ ދޭން ވަޒީފާއާބެހޭ ޓްރައިބިއުނަލުން އަމުރުކޮށްފި އެވެ.

މިދިޔަ އާދިއްތަ ދުވަހު އެ ޓްރައިބިއުނަލުން އެގޮތަށް އަމުރުކުރީ ޕީޖީ އޮފީހުގައި ވަކީލެއްގެ ގޮތުގައި އައިމިނަތު އަރީޖް ހުސައިނާ ބެހޭގޮތުން ފުލުހުން ތައްޔާރުކުރި އިންޓެލިޖެންސް ރިޕޯޓަކަށް ބިނާކޮށް މިދިޔަ ޑިސެމްބަރު މަހުގެ ތެރޭގައި އޭނާ ވަކިކުރި މައްސަލައިގަ އެވެ.

އެ މައްސަލަ ބެލުމަށް ފަހު ޓްރައިބިއުނަލުން ކުރި އަމުރުގައިވަނީ އެ މައްސަލާގައި އަރީޖް ވަކިކުރީ އެކަށީގެންވާ ހަމައެއް އޮވެގެން އަދުލުވެރިކަމާ އެކު ކަން ސާބިތުނުވާ ކަމަށާއި އެހެންވެ އޭނާ ވަކިކުރީ ގާނޫނާ ޚިލާފަށް ބަލަންޖެހޭ ކަމަށެވެ. އެހެންވެ ބަދަލުގެ ގޮތުގައި 153،000 އަށް ވުރެ ގިނަ ރުފިޔާ އޭނާއަށް ދޭން ވަނީ އަމުރުކޮށްފަ އެވެ.

އަރީޖް ކުރިން ހުރި ވަޒީފާ އަނބުރާ އިއާދަކޮށްދޭން އެދިފައި ވިޔަސް ދެ ފަރާތުގެ ދެމެދުގައި އިތުބާރު ގެއްލިފައިވާތީ ވަޒީފާ އަނބުރާ އިއާދަކުރަން އަމުރު ނުކުރެވޭނެ ކަމަށް ޓްރައިބިއުނަލުން ވަނީ ނިންމައިފަ އެވެ.