އާ ޕާޓީއެއް އުފެއްދުމުގެ މަސައްކަތާއެކު، ޖާބިރު ޑީއާރުޕީން އިސްތިއުފާދެއްވައިފި

އާ ސިޔާސީ ޕާޓީއެއް އުފެއްދުމުގެ މަސައްކަތާއެކު، ޑީއާރުޕީގެ މެމްބަރުކަމުންނާއި ލީޑަރު ކަމުން ވެސް، އެ ޕާޓީގެ ހިންގަވަމުން ގެންދެވި ކާށިދޫ ދާއިރާގެ މެމްބަރު އަބްދުﷲ ޖާބިރު އިސްތިއުފާ ދެއްވައިފި އެވެ.

ޖާބިރު މިއަދު "މިހާރު" އަށް ވިދާޅުވީ އޭނާ ހުންނެވީ ޑީއާރުޕީއާއެކު ކުރިއަށް ވަޑައިގަންނަވަން ކަމަށް ވިޔަސް އެ ޕާޓީ "އެކްޓީވް" ނުވުމުން ދަތިތަކާ ކުރިމަތިލާން ޖެހިވަޑައިގެންނެވި ކަމަށެވެ. އަދި ދެ ފަހަރެއްގެ މަތިން ޕާޓީ އަށް މީހުން ހަމަކުރައްވަން އުޅުއްވުމުން އެކަން ވެސް ކާމިޔާބު ނުވި ކަމަށް ޖާބިރު ވިދާޅުވި އެވެ.

"[ޑީއާރުޕީގެ] ދަރަނި އިޝޫތައް ހަމަ ކޯޓުގައި ދަނީ ކުރިއަށް. އަޅުގަނޑު ހުރި އިރެއްގައި ދަރަނި ހުރީކީއެއް ނޫން. ދެން އެ ކަހަލަ ބައިވަރު ކަންތައްތައް އޮތީ. އެހެންވީމާ ކުރިއަށް ދެވޭނެ އެއްވެސް ގޮތެއް އެ ދިމާލުން ނެތީ،" އޭނާ ވިދާޅުވި އެވެ.

ޖާބިރު އުފައްދަވާ ސިޔާސީ ޕާޓީގެ ނަމަކީ "ގްރީން ޕާޓީ އޮފް މޯލްޑިވްސް (ޖީޕީއެމް)" އެވެ. އެ ޕާޓީގެ ރަޖިސްޓަރީ މިއަދު އިލެކްޝަން ކޮމިޝަން (އީސީ) އިން ދޭނެ ކަމަށް ވެސް އޭނާ ވިދާޅުވި އެވެ.

ޖާބިރު ވިދާޅުވީ އެ ޕާޓީން މި އަހަރުގެ ރިޔާސީ އިންތިހާބުގައި ވާދަކުރުމުގެ ވިސްނުން ގެންގުޅޭ ކަމަށެވެ. އެކަމަކު މި ވަގުތު އެންމެ އިސްކަމެއް ދޭނީ އާ ޕާޓީ އަށް މެމްބަރުން ރަޖިސްޓަރީކުރުމަށް ކަމަށާއި ޑީއާރުޕީގައި ތިބި ބައެއް މެމްބަރުން ވެސް ގުޅޭ ކަމަށް އޭނާ ވިދާޅުވި އެވެ.

ޖާބިރު ވިދާޅުވީ، ޑީއާރުޕީ ދޫކޮށްލެއްވިއިރު، ގާނޫނުގައި ބުނާ އަދަދަށް އެ ޕާޓީގައި މެމްބަރުން ހަމަނުވާތީ އީސީން ވަނީ ޕާޓީ އުވާލަން ވެސް ނިންމާފައި ކަމަށެވެ. ޑީއާރުޕީގައި 3،000 މެމްބަރުން ހަމަނުވާތީ ސިޔާސީ އެއްވެސް ހަރަކާތެއް ނުހިންގަން އީސީން އެ ޕާޓީއަށް އޮތީ އަންގައިފަ އެވެ. އެ މައްސަލަ ހައި ކޯޓުން ބޭރުކޮށްލުމުން އަނެއްކާ ވެސް މިދިޔަ ހަފުތާގައި ވަނީ ދުސްތޫރީ މައްސަލައެއްގެ ގޮތުގައި އެ މައްސަލަ ކޯޓަށް ހުށަހަޅައިފަ އެވެ.

ޑީއާރުޕީއަކީ ރާއްޖޭގެ ސިޔާސީ ޕާޓީތައް ހަދަން ގާނޫނު ހުއްދަކުރުމުން ދެވަނައަށް އުފެއްދި އަދި ކުރީގެ އެންމެ ބޮޑު އެއް ޕާޓީ އެވެ. ކުރީގެ ރައީސް މައުމޫން އަބްދުލްގައްޔޫމް އިސްކޮށް ހުންނަވައިގެން ޑީއާރުޕީ އުފެއްދެވީ ޖުލައި 21، 2005 ގަ އެވެ.