މިދިޔަ މަހު 195 ކައިވެންޏާއި 127 ވަރި؛ ގިނައީ ވަރީގެ މައްސަލަތައް

މިދިޔަ މަހު ފެމިލީ ކޯޓުގައި 195 ކައިވެނި ކުރިއިރު 127 މީހަކު ވަރިކޮށްފައިވާ ކަމަށް ތަފާސް ހިސާބުތަކުން ދައްކައިފި އެވެ.

ފެމިލީ ކޯޓުން އާންމުކުރި ތަފާސް ހިސާބުތައް ދައްކާ ގޮތުން މިދިޔަ މަހު ކުރި ކައިވެނީގެ އަދަދުގެ ދެ ބައި ކުޅަ އެއް ބަޔަށް ވުރެ ގިނަ އަދަދަކަށް ވަރި ކޮށްފައިވާއިރު، އެ ކޯޓަށް މިދިޔަ މަހު އެންމެ ގިނައިން ހުށަހެޅީ ވެސް ވަރީގެ މައްސަލަތަކެވެ.

ހިސާބުތައް ދައްކާގޮތުން ވަރީގެ 147 މައްސަލައެއް މިދިޔަ މަހު ހުށަހެޅިއިރު، ނުނިމި ހުރި މައްސަލަތަކާއެކު ވަރީގެ 166 މައްސަލައެއް މިދިޔަ މަހު ނިންމި އެވެ. އެންމެ ގިނައިން ހުށަހެޅީ ވަރިވުމަށް އެދި ހުށަހެޅި މައްސަލަތަކެވެ.

ދެވަނައަށް އެންމެ ގިނައީ ކޯޓުން ބޭރުގައި ވަރިކުރުމަށްފަހު ވަރި ސާބިތުކުރަން ހުށަހެޅި މައްސަލަތަކެވެ.

މައްސަލަތަކުގެ ބާވަތުން އެންމެ ގިނައިން ހުށަހެޅީ އާއިލީ އެހެނިހެން މައްސަލަތަކާއި ހަރަދުގެ މައްސަލަތަކެވެ. އެންމެ ގިނައިން ހުށަހެޅީ ސާބިތު ހަރަދުގެ މައްސަލަތަކެވެ.