ހުޅުމާލެ 2 ގައި ހަދާ ވަގުތީ މާރުކޭޓުން 30 ގޮޅި ކުއްޔަށް ދޫކުރަން ހުޅުވާލައިފި

އަންނަ މަހު ފަށާ މި އަހަރުގެ ރޯދަ މަހަށް ހާއްސަ ކޮށްގެން ހުޅުމާލެ 2 ގައި ހަދާ ވަގުތީ މާރުކޭޓުގެ ގޮޅި ކުއްޔަށް ދޫކުރަން މާލޭ ސިޓީ ކައުންސިލުން އިއުލާން ކޮށްފި އެވެ.

ހުޅުމާލެ 2 ގައި 30،000 އަށް ވުރެ ގިނަ މީހުން ދިރިއުޅެމުން އަންނައިރު، ރޯދަމަހަށް އެ ސަރަހައްދުގައި ވަގުތީ މާރުކޭޓެއް ހެދުމަކީ މުހިންމު ކަމެއް ކަމަށް ކައުންސިލުން ދެކެ އެވެ.

އެ ކައުންސިލްގެ ސްޕޯކްސްޕާސަން މަރިޔަމް ޝިއުނާ "މިހާރު" އަށް ވިދާޅުވީ ހުޅުމާލެ 2 ގައި ހަދަނީ 30 ގޮޅީގެ މާރުކޭޓެއް ކަމަށެވެ.

ވަގުތީ މާރުކޭޓުން ގޮޅި ދޫކުރުމާ ބެހޭ އުސޫލުގައިވާ ގޮތުން އެ ތަންތަން ދޫކުރާނީ ހުޅުމާލޭގެ ރަށްވެހިންނަށާއި ހުޅުމާލޭގައި ދިރިއުޅޭ މީހުންނަށެވެ. ގޮޅި ކުއްޔަށް ދިނުމާއި އެހެން ފަރާތަކަށް މަންފާ ލިބޭ ގޮތަށް ދީގެން ގޮޅި ހިންގުމާއި ބިދޭސީންނާ ހަވާލުކޮށްގެން ގޮޅީގެ އެއްވެސް މަސައްކަތެއް ހިންގުމަކީ ހުއްދަ ކަމެއް ނޫން ކަމަށް ކައުންސިލްގެ އުސޫލުގައިވެ އެވެ.

ގޮޅިތައް ހިންގުމަށް ދީފައިވާ އުސޫލާ ހިލާފު ކަމެއް ކުރާ ނަމަ 200ރ. އާއި 500ރ. އާ ދެމެދު އަދަދަކުން އެ ގޮޅިއެއް ޖޫރިމަނާ ކުރާނެ ކަމަށް ވެސް ކައުންސިލުން ބުންޏެވެ. އެފަދަ ކަމެއް އަލުން ތަކުރާރު ވެއްޖެ ނަމަ އިތުރު ފުރުސަތެއް ދިނުމަކާ ނުލައި ގޮޅިން މުދާ ހުސްކުރުމަށް އަންގާ ގޮޅި ވަކި ކުރުމުގެ ނޯޓިސް ދޭނެ އެވެ.

ގޮޅި ދޫކުރުމަށް ހަމަޖެހިފައިވަނީ 50 ދުވަހުގެ މުއްދަތަށެވެ. ގޮޅިއަށް އެދެން ބޭނުންވާ މީހުން ފޯމު ހުށަހަޅަން ޖެހެނީ ހުޅުމާލޭގެ އަމީން އެވެނިއު މޭޕްލް ބިލްޑިންގްގެ އެއްވަނަ ފްލޯގައި ހުންނަ އެ ކައުންސިލްގެ ހުޅުމާލޭ ސެކްޝަނަށެވެ.

ވަގުތީ މާރުކޭޓް ގާއިމުކުރަނީ ހުޅުމާލޭގެ 2 ގެ ކޮން ސަރަހައްދެއްގައި ކަމެއް އަދި ނޭނގެ އެވެ.

މާލެ ސިޓީ ކައުންސިލުން މިދިޔަ އަހަރު ވެސް ރޯދަމަހަށް ހާއްސަކޮށްގެން މާލެ އާއި ވިލިމާލޭގައި ވަގުތީ މާރުކޭޓް ހުޅުވަން މަސައްކަތްކުރި އެވެ. ނަމަވެސް އެކި ސަބަބުތަކާ ހުރެ މިދިޔަ އަހަރު އެކަމެއް ނުވި އެވެ.

ކަލަންޑަރުގައިވާ ގޮތުން މި އަހަރުގެ ރޯދަމަސް ފެށޭނީ މި މަހުގެ 23 ގަ އެވެ.