ނަޝީދަށް ދިން ހަމަލާގެ ޝަރީއަތް ލަސްވާ ސަބަބު ބަލައެއް ނުގަނެވޭ: އައްބާސް

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ޓެރަރިސްޓް ހަމަލާގެ ބައިވެރިންގެ މައްޗަށް ހިންގާ ޝަރީއަތް ލަސްވާ ކަމަށް އިދާރާތަކުން ބުނާ ސަބަބު ބަލައި ނުގަނެވޭ ކަމަށް އެ މައްސަލައިގެ ތަހުގީގަށް ރައީސް އިބްރާހިމް މުހައްމަދު ސޯލިހު އައްޔަން ކުރެއްވި މަންދޫބު، އިނގިރޭސި ވިލާތުގެ އައްބާސް ފާއިޒް ރޭ ވިދާޅުވެއްޖެ އެވެ.

އޭނާ ކުރެއްވި ޓުވީޓެއްގައި ވިދާޅުވީ، އެ މައްސަލައާ ގުޅޭ ގޮތުން މަޝްވަރާކުރުމަށް މިދިޔަ ހަފުތާގައި ކްރިމިނަލް ކޯޓުގެ ރަޖިސްޓްރާ ހުސައިން ރަޝީދާ ބައްދަލުކުރެއްވި ކަމަށެވެ. އެ ބައްދަލުކުރެއްވުމުގައި، ހަމަލާއާ ގުޅިގެން ހައްޔަރުކޮށްފައިވާ މީހުންގެ ޝަރީއަތް ލަސްވަމުން ދާތީ އެކަމުގެ ކަންބޮޑުވުން ފާޅުކުރެއްވި ކަމަށް އޭނާ ވިދާޅުވި އެވެ.

"މި މައްސަލައިގެ ޝަރީއަތް ލަސްވާން ޖެހޭ ކަމަށް ގަބޫލުކުރެވޭ ސަބަބުތަކެއް ރާއްޖޭގެ ޝަރުއީ އިދާރާތަކަށް ދެއްކިފައެއް ނެތް," އައްބާސް ވިދާޅުވި އެވެ.

މީގެ ކުރިން ވެސް ޝަރީއަތް ލަސްވާތީ އައްބާސް ކަންބޮޑުވުން ފާޅުކުރެއްވި އެވެ.

މިދިޔަ އަހަރުގެ ނޮވެމްބަރު މަހު އެ މައްސަލައިގެ ޝަރީއަތް ބަލާ ގާޒީންގެ ބެންޗު އުވާލުމަށް ފަހު، މިހާރު އެ މައްސަލަ ވަނީ ގާޒީ ސޮފްވަތު ހަބީބާ ހަވާލުކޮށްފަ އެވެ. ބެންޗު އުވާލުމުގެ ކުރިން ވެސް އެ ބެންޗަށް ދެ ފަހަރެއްގެ މަތިން ބަދަލު ގެނަ އެވެ.

މީގެ ދެ އަހަރެއްހާ ދުވަސް ކުރިން، ނަޝީދު އަވަހާރަކޮށްލުމަށް ދިން ބޮމުގެ ހަމަލައިގެ މައްސަލައިގައި މިހާރު ޝަރީއަތް ކުރިއަށް ދަނީ، އެ މައްސަލައިގައި ހައްޔަރުކޮށްފައިވާ އިސްހާގުގެ އިތުރަށް ތަހުމީން އަހުމަދާއި މުޖާޒް އަހްމަދާއި އަލީ ހައިޝަމާއި މުހައްމަދު ނާޒިމް އަދި ފަހުމީ އަލީގެ ބައެވެ. އެ އެންމެންގެ މައްޗަށް ވެސް ޓެރަރިޒަމްގެ ދައުވާ އުފުލައި، ޝަރީއަތް ނިމެންދެން ވަނީ ބަންދުކޮށްފަ އެވެ.

މި މައްސަލައިގެ ތަހުގީގަށް ރައީސް އިބްރާހިމް މުހައްމަދު ސޯލިހު އައްޔަންކުރެއްވި މަންދޫބު، ފާއިޒް އަކީ ދެކުނު އޭޝިޔާގެ ގައުމުތަކުގެ އިންސާނީ ހައްގުތަކަށް ވަކާލާތު ކުރައްވުމުގައި ފާހަގަކޮށްލެވޭ ބޭފުޅެކެވެ. އޭނާ ވަނީ މީގެ ކުރިން އެމްނެސްޓީ އިންޓަނޭޝަނަލްގައި ވެސް މަސައްކަތް ކުރައްވައިފަ އެވެ.