ގުދަން ހުރި ބިން ޔޫތު މިނިސްޓްރީއަށް ދިން ކަމުގެ އެއްވެސް ލިޔެކިޔުމެއް ނެތް: ސިޓީ ކައުންސިލް

ޔޫތު މިނިސްޓްރީގެ ގުދަން ހަދާފައިވާ ބިމުގެ އެއްވެސް މިންވަރެއް އެ މިނިސްޓްރީއަށް ދިނުމަށް އެއްބަސްވުމެއް ހަދާފައި ނުވާ ކަމަށާއި އެކަމުގެ އެއްވެސް ލިޔެކިޔުމެއް ވެސް ފެންނަން ނެތް ކަމަށް މާލޭ ސިޓީ ކައުންސިލުން މިއަދު ބުނެފި އެވެ.

މިނިސްޓްރީން ހަދާފައިވާ ގުދަނަކަށް މާލެ ސިޓީ ކައުންސިލުން އިއްޔެ ރޭ ވަދެ، އެތަން ހުސްކުރި މައްސަލާގައި އެއީ ކައުންސިލްގެ ބިމެއް ކަމަށް ދައުވާ ކުރަނިކޮށް، އެ ތަން އެ މިނިސްޓްރީއަށް ދޫކޮށްފައި ވަނީ ހައުސިން މިނިސްޓްރީން ކަން އަންގައިދޭ ލިޔެކިޔުންތަކާއި ކައުންސިލާއެކު ކޮށްފައިވާ މުއާމަލާތުތަކެއް ޔޫތު މިނިސްޓްރީން މިއަދު ނެރުނު ނޫސްބަޔާނާއެކު އާންމުކުރި އެވެ.

އެ ބަޔާނަށް ރައްދު ދީ، ސިޓީ ކައުންސިލުން ނެރުނު ނޫސްބަޔާނުގައި ބުނީ މާލޭގެ 353 ނަންބަރު ކޮށީގައި ހިމެނޭ ބިމަކީ އެ ކައުންސިލްގެ ނަމުގައި ރަޖިސްޓްރީ ކޮށްފައިވާ ތަނެއް ކަމަށެވެ. އަދި އެއީ މާލޭ ހިޔާ ފްލެޓްތައް ހުރި ބިމަކަށްވާއިރު، އެ ބިން ނުވަތަ އެ ބިމުގެ ބައެއް ޔޫތު މިނިސްޓްރީއަށް ދީފައިވާ ކަމަށް ބުނެ ނެރެފައިވާ ނޫސްބަޔާނަކީ ކަމުގެ ހަގީގަތް އޮޅުވާލަން ކުރި ކަމެއް ކަމަށް ސިޓީ ކައުންސިލުން ތުހުމަތުކުރި އެވެ.

"... ޔޫތު މިނިސްޓްރީއަށް އެ ބިމުގެ އެއްވެސް މިންވަރެއް ދީ އަދި އެ ބިން ހަވާލުކޮށްފައި ވެސް ނުވާނެ އެވެ،" އެ ބަޔާނުގައިވެ އެވެ.

ސިޓީ ކައުންސިލުން ބުނީ އެއްވެސް ކަމެއް ކުރުމަށް، އެއްބަސްވުމެއްގެ ދަށުން ވިޔަސް، އެ ބިމުގެ އެއްވެސް މިންވަރެއް ޔޫތު މިނިސްޓްރީއާ ހަވާލުކުރިކަމުގެ ލިޔުމެއް އެ ކައުންސިލުގައި ފެންނަން ނެތް ކަމަށެވެ.

ސިޓީ ކައުންސިލުން އިއްޔެ ބުނެފައިވާ ގޮތުގައި، އެ ގުދަން ހިމެނޭ ސަރަހައްދު ނުވަތަ މާލޭގެ 353 ވަނަ ކޮށްޓަކީ އެ ކައުންސިލްގެ ރަޖިސްޓަރީގައި އޮތް ބިމެކެވެ. އަދި އެ ގުދަނުގެ ވެރިފަރާތެއް ހޯދުމަށް މިދިޔަ އަހަރުގެ ޑިސެމްބަރު މަހު އިއުލާނުކޮށް، މިދިޔަ މަހުގެ ނިޔަލަށް ވެސް އެއްވެސް ބަޔަކު އެ ގުދަނާ ހަވާލު ނުވުމުން ތަން ހުސްކުރަން ފެށީ އެވެ.

އެކަމަކު، އެ އަށް ރައްދު ދީ، ޔޫތު މިނިސްޓްރީން މިއަދު ނެރުނު ނޫސްބަޔާނުގައި ބުނީ، އެ ކޮށްޓަކީ ކުޅިވަރުގެ ބޭނުންތަކަށް ކަނޑައަޅައި މޭ 15، 2019 ގައި އެ މިނިސްޓްރީއަށް، ޕްލޭނިން މިނިސްޓްރީން ދޫކޮށްފައިވާ ބިމެއް ކަމަށެވެ. އެ ބިމުގެ "ޑިވެލޮޕްމަންޓް ކޮންޓްރޯލް" ނޮވެމްބަރު 27، 2019 ގައި ޕްލޭނިން މިނިސްޓްރީން ޔޫތު މިނިސްޓްރީއަށް ދީފައިވާ ކަމަށް އެ ބަޔާނުގައި ބުންޏެވެ.

ޕްލޭނިން މިނިސްޓްރީން ބިން ހަވާލުކުރި ކަމުގެ ސިޓީގެ އިތުރުން، އެ ބިމުގައި ހަދަން ނިންމާފައިވާ ސްޕޯޓްސް ސެންޓަރުގެ ކުރެހުން ފާސްކުރުމާ ގުޅޭ ގޮތުން ޔޫތު މިނިސްޓްރީ އާއި ސިޓީ ކައުންސިލާ ދެމެދު އެކި ތާރީހުތަކުގައި ބަދަލުކޮށްފައިވާ ސިޓީތައް ވެސް ޔޫތު މިނިސްޓްރީން މިއަދު އާންމުކުރި އެވެ. އޭގެ ތެރޭގައި ސްޕޯޓްސް ސެންޓަރުގެ ކުރެހުން ފާސްކުރުމަށް ބޭނުންވާ އިތުރު ލިޔުންތައް ފުރިހަމަ ކުރަން އަންގައި ސިޓީ ކައުންސިލުން އޭޕްރީލް 18، 2021 ގައި ޔޫތު މިނިސްޓްރީއަށް ފޮނުވި ސިޓީއެއް ވެސް ހިމެނެ އެވެ.

ޔޫތު މިނިސްޓްރީން ބުނިގޮތުގައި، މާލެ ސިޓީ ކައުންސިލާ ދެމެދު 2019 އިން ފެށިގެން ކޮށްފައިވާ މުއާމަލާތުތަކަށް ބެއްޔަސް އެއީ މިނިސްޓްރީގެ ބިމެެއްކަން ކައުންސިލަށް އެނގޭނެ އެވެ.