ރާއްޖޭގައި ދިވެހިންނަށްވުރެ ބިދޭސީން ދެ ގުނަ އިތުރު ރަށެއް

ވ. ތިނަދޫގައި ދިވެހިންނަށް ވުރެ ގިނައިން ބިދޭސީން އުޅޭ ކަމަށް ބޯހިމެނުމުގެ ތަފާސް ހިސާބުތަކުން ދައްކައިފި އެވެ.

މިދިޔަ ހަފްތާގައި ހާމަކުރި މިދިޔަ އަހަރުގެ ބޯހިމެނުމުން އެނގޭ ގޮތުގައި ތިނަދޫގައި އުޅެނީ 75 ދިވެހިންނެވެ. އެރަށުގައި 184 ބިދޭސީން އުޅެ އެވެ. އެއީ ރަށުގައި އުޅޭ ދިވެހިންގެ އާބާދީއާށް ވުރެ ދެ ގުނަ އިތުރު އަދަދެކެވެ.

އެރަށުގައި ބިދޭސީން އެހާ ބޮޑަށް އިތުރުވީ، ގެސްޓްހައުސް ވިޔަފާރި އެހާ ބޮޑަށް ފުޅާވުމުންނެވެ. އެ ރަށުގައި ދިވެހިންނަށް ވުރެ ބިދޭސީން ގިނަވެފައި އޮންނަތާ ފަސް ވަރަކަށް އަހަރުވެއްޖެ އެވެ.

ވ. އަތޮޅަކީ ރާއްޖޭގެ އެންމެ އާބާދީ ކުޑަ އަތޮޅެވެ. އެ އަތޮޅުގައި މިވަގުތު ދިރިއުޅެނީ 1،900 މީހުންނެވެ.

ވޭތުވެދިޔަ 10 އަހަރު ރާއްޖޭގެ އާބާދީއަށް ބިދޭސީން ދެ ގުނަ އިތުރުވި އެވެ. އަދި ރަށްރަށުގައި ދިރިއުޅޭ ބިދޭސީން ވެސް ވަނީ ވަރަށް ބޮޑަށް އިތުރުވެފަ އެވެ. އެންމެ ބޮޑަށް ބިދޭސީން އިތުރުވީ، ޓޫރިޒަމް ދާއިރާގެ ވަޒީފާތަކަށް އަންނަ ބިދޭސީންގެ އަދަދު އިތުރުވުމުންނެވެ.

ބޯހިމެނެމުގެ ތަފާސް ހިސާބުތަކުން ދައްކާ ގޮތުގައި ރާއްޖޭގައި ބައި މިލިއަން މީހުން މިހާރު ދިރިއުޅެ އެވެ. އޭގެ ތެރޭގައި ހިމެނެނީ 338,434 ދިވެހިންނާއި 63,637 ބިދޭސީންނެވެ. މިއީ ރާއްޖޭގެ ކޮންމެ ތިން މީހަކުން އެކަކަށް ބިދޭސީއެކެވެ.