އާބާދީގެ 46 ޕަސެންޓް މީހުން އުމުރުގެ ކޮންމެވެސް ހިސާބެއްގައި ހިޖުރަކޮށްފައިވޭ

ރާއްޖޭގެ އާބާދީގެ 46 ޕަސެންޓް މީހުންނަކީ އުމުރުގެ ކޮންމެވެސް ހިސާބެއްގައި، ރަށްވެހިވެފައިވާ ރަށް ނޫން އެހެން ރަށަކަށް ހިޖުރަކޮށްފައިވާ މީހުންކަން ބޯހިމެނުމުގެ ރިޕޯޓުން ދައްކައިފި އެވެ.

ދުނިޔޭގެ އާބާދީ ދުވަސް ފާހަގަކުރުމަށް މިއަދު ބޭއްވި ރަސްމިއްޔާތުގައި ވަނީ، ބޯހިމެނުމުގެ މިދިޔަ އަހަރުގެ ރިޕޯޓު ނެރެފަ އެވެ.

އެ ރިޕޯޓުން ބުނީ ރާއްޖޭގައި އާއްމުކޮށް ދިރިއުޅޭ ދިވެހިންގެ ތެރެއިން 46 ޕަސެންޓަކީ އުމުރުގެ ކޮންމެވެސް ހިސާބެއްގައި، ރަށްވެހިވެފައިވާ ރަށް ނޫން އެހެން ތަނަކަށް ހިޖުރަކޮށްފައިވާ މީހުން ކަމަށެވެ. ހިޖުރަކުރި 40 ޕަސެންޓަކީ 25-39 އަހަރާ ދެމެދުގެ މީހުންނެވެ.

ހިޖުރަކުރި ކަމަށް، ބޯހިމެނުމުގައި ބަލަނީ އެ މީހަކު އާއްމުކޮށް ދިރިއުޅޭ ރަށް ނޫން އެހެން ރަށެއް ނުވަތަ ގައުމެއްގައި އެއް އަހަރަށް ވުރެ ގިނަ ދުވަހު ދިރިއުޅެފައިވާ ނަމަ ނުވަތަ ދިރިއުޅެން ގަސްތުކޮށްފައިވާ ނަމަ އެވެ.

ހިޖުރަކޮށްފައިވާ އާބާދީއަށް ބަލާއިރު ގިނަ މީހުން ބަދަލުވެފައިވަނީ ތައުލީމާއި ވަޒީފާ ހޯދުމަށް އަދި އާއިލާ އެކުގައި ދިރިއުޅުމަށެވެ.

މާލެއަށް ހިޖުރަކުރި 37 ޕަސެންޓް ބަދަލުވެފައިވަނީ ތައުލީމް ހޯދުމަށެވެ. އާއިލާ އެހެން ރަށަކަށް ބަދަލުވުމުން އެ މީހުންނާ އެކު ދިރިއުޅުމަށް 21 ޕަސެންޓް މީހުން ހިޖުރަކުރިއިރު ވަޒީފާ ހޯދުމަށް/އަދާކުރުމަށް 14 ޕަސެންޓް މީހުން ބަދަލުވެފައިވެ އެވެ.

މައިގަނޑު ގޮތެއްގައި ރަށްރަށަށް އަލުން އަނބުރާ ބަދަލުވެފައިވަނީ، ރަށުގައި އަލުން ދިރިއުޅެން ބޭނުންވާތީ ކަމަށް 29 ޕަސެންޓް މީހުން ބުންޏެވެ. އާއިލާ ހިޖުރަކުރުމުން އާއިލާއާ އެކު ދިރިއުޅުމަށް 21 ޕަސެންޓް އަދި ކައިވެންޏާ ގުޅިގެން 13 ޕަސެންޓް މީހުުން ބަދަލުވެފައިވެ އެވެ.