ޔާމީނަށް ފުރުސަތު އެބައޮތް، އެހެން ކެންޑިޑޭޓަކު ނެރޭކަށް ނުޖެހޭ: ޕީޕީއެމް

ކުރީގެ ރައީސް އަބްދުﷲ ޔާމީނަށް މި އަހަރުގެ ރިޔާސީ އިންތިހާބުގައި ވާދަކުރުމުގެ ފުރުސަތު ބަންދު ނުވާ ކަމަށާއި އެހެންވެ، ޕީޕީއެމުން އެހެން ކެންޑިޑޭޓަކު ނެރުމުގެ ވާހަކަ މިހާރު ދައްކަން ނުޖެހޭ ކަމަށް އެ ޕާޓީން މިއަދު ބުނެފި އެވެ.

ވ. އާރަށް މައްސަލާގައި ރިޝްވަތާއި މަނީ ލޯންޑްރިންގެ ކުށުގައި ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވުމާ އެކު، މި އަހަރުގެ ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަކުރުމުގެ ފުރުސަތު އެ މަނިކުފާނަށް މިވަގުތު ވަނީ ގެއްލިފަ އެވެ.

ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ، ޔާމީންގެ ކެންޑިޑެސީ ދިފާއު ކުރެއްވީ އެ ކެންޑިޑެސީއާ ދެކޮޅަށް މާލެ ސިޓީ ކައުންސިލްގެ ޕީޕީއެމްގެ މެމްބަރު އާދަމް ރަމީޒް ވާހަކަތައް ދައްކަވާ ކަމަށް ވިދާޅުވެ، ސީދާ ޔާމީންގެ އެންގެވުމަކަށް ރަމީޒްގެ މައްސަލަ އެ ޕާޓީގެ ސުލޫކީ ކޮމިޓީން ބަލާފައި ވަނިކޮށެވެ. އެކަމަކު، ކޮމިޓީގައި މައްސަލަ ހިނގަމުން ދަނިކޮށް، އޭނާ ވަނީ މިދިޔަ އަންގާރަ ދުވަހުގެ ރޭ ކުއްލި ގޮތަކަށް ޕީޕީއެމުން ވަކިވެވަޑައިގެންގަ އެވެ.

އޭގެ ސަބަބެއް މިއަދާ ހަމައަށް ރަމީޒް ވިދާޅެއް ނުވެ އެވެ.

ޔާމީންގެ ރިޔާސީ ޓިކެޓާ ދެކޮޅަށް ރަމީޒް ވާހަކަ ދައްކަވާ ކަމަށް ބުނެ ކުރާ ތުހުމަތުތައް ސުލޫކީ ކޮމިޓީގައި އޭނާ ވަނީ އިންކާރު ކުރައްވައިފަ އެވެ.

އަބްދުއްރަހީމް މިއަދު ވިދާޅުވީ ޔާމީނަށް އިންތިހާބުގައި ވާދަކުރުމުގެ ފުރުސަތު ބަންދުވެފައި ނުވާ ކަމަށް އިލެކްޝަންސް ކޮމިޝަނުން ބުނެފައިވާ ކަމަށެވެ. އެހެންވެ، އެ ޕާޓީން އެހެން ކެންޑިޑޭޓަކު ނެރުމުގެ ވާހަކަ ދައްކަން ނުޖެހޭނެ ކަމަށް ވިދާޅުވި އެވެ. ޔާމީނަށް ޕީޕީއެމްގެ ރިޔާސީ ޓިކެޓް އެރުވީ މުޅި ކައުންސިލްގެ އިއްތިފާގުން ކަމަށް ވާތީ އެ ނިންމުން އެ ޕާޓީގެ މެމްބަރުން ވެސް ގަބޫލު ކުރަންޖެހޭ ކަމަށް އަބްދުއްރަހީމް ވިދާޅުވި އެވެ.

"އަޅުގަނޑުމެން ގަބޫލެއް ނުކުރަން ޕީޕީއެމް، ޕީއެންސީގެ ތެރޭގައި މިވަގުތު އެއްވެސް ބޭފުޅަކު ރިޔާސީ ޓިކެޓްގެ ވާހަކަ ދައްކަންޖެހޭ ހާލަތެއް އޮތް ކަމަކަށް. ޑިމޮކްރެޓިކް ހަމައަކުން ނެތް. އެއީ ޑިމޮކްރެޓިކް ހަމަތަކުގައި އޮންނަ އުސޫލުގެ މަތިން ޓިކެޓް މި އޮތީ ހަވާލު ކޮށްފައި،" އަބްދުއްރަހީމް ވިދާޅުވި އެވެ.

އޭނާ ވިދާޅުވިގޮތުގައި، ޕީޕީއެމްގެ ކެންޑިޑޭޓަކު އިންތިހާބުގައި ވާދަ ކުރާނެ އެވެ. އެހެންވެ، ޕާޓީން އެހެން ކެންޑިޑޭޓަކާ މެދު ވިސްނާނީ ޔާމީނަށް އިންތިހާބުގައި ވާދަކުރުމުގެ ފުރުސަތު ގެއްލުމުން ކަމަށް ވިދާޅުވި އެވެ. ނަމަވެސް މިވަގުތު އެ ފުރުސަތު އެބައޮތް ކަމަށް އޭނާ ވިދާޅުވި އެވެ.

އަބްދުއްރަހީމް ވިދާޅުވީ ޕީޕީއެމްގެ ރިޔާސީ ކެމްޕެއިންގެ މަސައްކަތް ޔާމީންގެ ލަފާފުޅުގެ މަތިން މި ރޯދަ މަސް ނިމުމާ އެކު މުޅި ރާއްޖޭގައި ފަށާނެ ކަމަށެވެ. އެ ހުރިހާ މަސައްކަތްތައް ވެސް ކުރާނީ ޔާމީންގެ ލަފާފުޅުގެ މަތިން ކަމަށާއި މި އަހަރުގެ އިންތިހާބު އެ މަނިކުފާނު ކާމިޔާބު ކުރައްވާނެ ކަމަށް ވެސް ވިދާޅުވި އެވެ.

"ރަމަޟާން މަސް ނިންމާފައި އިރާދަކުރެއްވިއްޔާ އަޅުގަނޑުމެން ކެމްޕެއިން މި ފަށްޓަނީއޭ. އެ މަނިކުފާނު މިނިވަންވެގެން ވަޑައިގަންނަވާއިރު އަޅުގަނޑުމެން ތިބޭނީ އެ މަނިކުފާނަށް މި ގޮނޑި ކަށަވަރުވާ ވަރަށް ކެމްޕެއިންގެ މަސައްކަތް ކުރިއަށް ގެންގޮސްފައި،" އަބްދުއްރަހީމް އޭނާ ވިދާޅުވީ އެވެ.

އަބްދުއްރަހީމް ވިދާޅުވީ އާރަށް މައްސަލާގައި ޔާމީނަށް އިއްވި 11 އަހަރުގެ ޖަލު ހުކުމުގެ އިސްތިއުނާފް އަޑުއެހުންތައް ނުފެށި ލަސްވަމުންދާ ކަމަށެވެ. ޔާމީނަކީ އިދިކޮޅު ލީޑަރު ކަމަށް ވާއިރު، އިސްތިއުނާފް ލަސްވުމަކީ ގިނަ ބައެއްގެ ކަންބޮޑުވުން އޮތް ކަމެއް ކަމަށް އޭނާ ވިދާޅުވި އެވެ.

ރ. ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ޔާމީނަށް ކުރާ ދައުވާގެ އަޑުއެހުންތައް ކްރިމިނަލް ކޯޓުން އަވަސް އަރުވާލައިގެން ކުރިއަށް ދާތީ އެކަމުގެ ކަންބޮޑުވުން ވެސް އަބްދުއްރަހީމް ފާޅުކުރެއްވި އެވެ. އަންނަ ހަފުތާއިން ފެށިގެން އަޑުއެހުންތައް ކުރިއަށް ގެންދަން ތާވަލް ކޮށްފައިވާ ކަމަށާއި އެކަން ކުރަނީ އެ މައްސަލައާ ގުޅޭ ބައެއް ނިންމުންތައް ސުޕްރީމް ކޯޓުގައި އިސްތިއުނާފް ކުރުމުގެ ފުރުސަތު އޮއްވައި ކަމަށާއި އެއީ އިންސާފު ގެއްލިގެންދާ ކަމެއް ކަމަށް އޭނާ ވިދާޅުވި އެވެ.