ޝާޒް، މެންބަރު ކަމުގެ ހުވާ ކުރައްވައި، މަޖިލިހަށް

ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަން ކާމިޔާބު ކުރެއްވި އިބްރާހިމް ޝާޒް މަޖިލިހުގެ މެންބަރެއްގެ ހުވާ ކުރައްވައި މިއަދު ޖަލްސާގައި ބައިވެރިވެވަޑައިގެންފި އެވެ.

އޭނާ ހުވާ ކުރެއްވީ މަޖިލީހުގެ އިދާރާގައި މިއަދު ހެނދުނު 10:00 ގައި ބޭއްވި ހަފުލާއެއްގަ އެވެ. ޝާޒަށް މެމްބަރުކަމުގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އައިޝަތު ސުޖޫން އެވެ.

މި މަހުގެ 15 ގައި ބޭއްވި ގުރައިދޫ ދާއިރާގެ ބައި އިލެކްޝަން ޝާޒް ކާމިޔާބު ކުރެއްވީ 1،346 ވޯޓުންނެވެ. އޭނާއާ ވާދަކުރެއްވި އިދިކޮޅު ޕީޕީއެމްގެ ކެންޑިޑޭޓް ހުސައިން ރިޒާ އަށް ލިބިވަޑައިގަތީ 1،226 ވޯޓެވެ. އެމްއެންޕީގެ އަރީފަށް ހޯއްދެވުނީ 122 ވޯޓެވެ.

މިއީ ގުރައިދު އާއި މާފުއްޓާއި ގުޅި ހިމެނޭ ދާއިރާގެ މަޖިލިހުގެ ގޮނޑި މިދިޔަ 14 އަހަރުގެ ތެރޭގައި އެމްޑީޕީ އަށް ކާމިޔާބު ކުރެވުނު ފުރަތަމަ ފަހަރެވެ.

އެ ދާއިރާގައި މީގެ ކުރިން އަބަދުވެސް ކާމިޔާބު ކުރައްވަނީ ޕީޕީއެމްގެ މެންބަރު އިބްރާހިމް ރިޒާ އެވެ. އެ ގޮނޑި ހުސްވީ ރިޒާ އަވަހާރަވުމުންނެވެ.