ޔާމީންގެ ޝަރީއަތްތަކާ ގުޅޭގޮތުން ހިތްހަމަޖެހޭ ޖަވާބެއް ޖޭއެސްސީން ނުލިބުނު: ޕީޕީއެމް

މަނީ ލޯންޑަރިން އާއި ރިޝްވަތުގެ ކުށުގައި މިހާރުވެސް 11 އަހަރަށް ޖަލަށް ލާފައިވާ ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާތަކުގެ ޝަރީއަތްތައް ކުރިއަށްދާ ގޮތުން، އިދިކޮޅު ޕީޕީއެމުން ޖުޑީޝަލް ސާވިސް ކޮމިޝަން (ޖޭއެސްސީ) އާ މިއަދު ބައްދަލުކޮށްފި އެވެ.

އެ ބައްދަލުވުމަށްފަހު ޕީޕީއެމް/ޕީއެންސީގެ އޮފީހުގައި ބޭއްވި ނިއުސް ކޮންފަރެންސްގައި، ޕީއެންސީގެ ލީޑަރު އަބްދުއްރަހީމް އަބްދުﷲ ވިދާޅުވީ ޔާމީނަށް "ދެމުންދާ އަނިޔާތަކުގައި" ޖޭއެސްސީގެ ނުފޫޒު އޮތީ ކިހާ ވަރަކަށްތޯ އަދި އެ ކޮމިޝަން މެދުވެރިކޮށް ޝަރީއަތަށް ނުފޫޒު ފޯރުވާތޯ ސުވާލު އުފައްދާފައިވާ ކަމަށެވެ. އެކަމަކު ހިތްހަމަޖެހޭ ޖަވާބެއް ނުލިބުނު ކަމަށް ވިދާޅުވި އެވެ.

އޭގެ އިތުރުން ޔާމީނަށް ގާނޫނުން ލިބިދީފައިވާ ހައްގެއް ބޭނުންކޮށްފައި ވަނިކޮށް، އެއަށް ބެލުމެއް ނެތި އެ މަނިކުފާނުގެ މައްސަލަތައް އަވަސް އަރުވާލައިގެން ކުރިއަށްގެންދާ ސަބަބާ ގުޅޭގޮތުން ވެސް ސުވާލު ކުރެއްވި ކަމަށް އަބްދުއްރަހީމް ވިދާޅުވި އެވެ.

އެކަމަކު، އޭނާ ވިދާޅުވީ، އެއިން އެއްވެސް ސުވާލަކަށް ޖޭއެސްސީން އެކަށީގެންވާ ގޮތުގައި ޖަވާބެއް ނުދޭ ކަމަށެވެ.

"ކޮންމެ ކަމެއް ވެސް ބައްލަވާނެ ކަމަށް، ތި ކަމަށް ޖަވާބެއް ނުދެވި އޮތިއްޔާ ޖަވާބެއް ދެއްވާނެ ކަމަށް [ޖަވާބު ދިން]، އަބްދުއްރަހީމް ވިދާޅުވި އެވެ.

އިދިކޮޅު ލީޑަރުގެ ޝަރީއަތަށް ނުފޫޒު ފޯރުވާ ކަމުގެ އެކި ހެކިތައް ދައްކާފައިވާނެ ކަމަށް ވިދާޅުވެ، އޭގެ ފުރަތަމަ މިސާލެއްގެ ގޮތުން ނެންގެވީ ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމްގެ މައްސަލަ އެވެ.

ދަށު ކޯޓުގައި ޔާމީންގެ ފުރަތަމަ މައްސަލައިގެ ހުކުމާ ކައިރިވެފައި ވަނިކޮށް އޭނާގެ ސުލޫކީ މައްސަލައެއްގައި، ސަސްޕެންޑުކުރި އެވެ. އެއާ އެކު އިސްތިއުފާ ދެއްވައި ހައިލަމް ނެރުއްވި ބަޔާނުގައި ވިދާޅުވީ މައްސަލަ ސާބިތުވާ ކަމަށް ހުކުމް ކުރުން ނޫން ގޮތެއް ނޯންނާނެ ކަމަށް އޭނާ ކައިރީގައި ބައެއް މިނިސްޓަރުން ވިދާޅުވި ކަމަށެވެ.

"މި ހުރިހާ ކަންތައްތަކެއް ހުރީމަ އެކަމާ ގުޅިގެން އަޅުގަނޑުމެން މައްސަލަތަކެއް ހުށަހެޅިން ކަމާބެހޭ ފަރާތްތަކަށް. އެކަން ތަހުގީގުކޮށްދިނުމަށް ވެސް އަޅުގަނޑުމެން ވާނީ ދަންނަވާފައި. މިއިން، އެއްވެސް ކަމަށް ބަލާލުމެއް ނެތި ރައީސް ޔާމީންގެ މައްސަލަ ކުރިއަށް ގެންދިޔައީ." އޭނާ ވިދާޅުވި އެވެ.

ހައިލަމް ސަސްޕެންޑުކުރުމަށްފަހު އެ މައްސަލަ ހަވާލުކުރެއްވީ، ކްރިމިނަލް ކޯޓު ހިންގުމާ އޭރު ހަވާލުވެވަޑައިގެން ހުންނެވި އަލީ ރަޝީދު ހިމެނޭހެން ފަސް ފަނޑިޔާރުންގެ ބެންޗަކަށެވެ. އިސް ފަނޑިޔާރަކީ އަލީ ރަޝީދެވެ. ނަމަވެސް، އެ މައްސަލަ ނިންމި ފަހުން އޭނާ ސުޕްރީމް ކޯޓުގެ ބެންޗަށް އައްޔަންކުރުމަކީ ވެސް ޝަރީއަތަށް ނުފޫޒު ފޯރުވަން ކުރި ކަމެއް ކަމަށް ޖޭއެސްސީގައި ބުނެފައިވާނެ ކަމަށް އަބްދުއްރަހީމް ވިދާޅުވި އެވެ.

އޭގެ ފަހުން، ޔާމީންގެ ޝަރީއަތަކާ ގުޅިގެން ފަނޑިޔާރުންގެ އޯޑިއޯތަކެއް ލީކްވިއިރު، އެއީ ކިހިނެއް ލީކްވި އެއްޗެއްތޯ ބެލުމަށް އެދިފައިވާ ކަމަށާއި އަދި ފޮރިންސިކް ތަހުގީގެއް ކުރަން މެލޭޝިޔާއަށް ފޮނުވުމަށްފަހު ފަހުންވި ގޮތެއް ނޭނގުނު ކަމަށް ވިދާޅުވި އެވެ. އޭނާ އެހެން ވިދާޅުވި ނަމަވެސް އޯޑިއޯތައް ސައްހަ ނޫން ކަމަށް ތަހުގީގަށް ފަހު ވަނީ ބުނެފަ އެވެ.

އަބްދުއްރަހީމް ވިދާޅުވީ ކްރިމިނަލް ކޯޓުގައި ޔާމީންގެ މައްސަލަ ބެއްލެވި ގާޒީ އަހުމަދު ޝަކީލްގެ ދެ މައްސަލައެއް ހުށަހަޅާފައި ވަނިކޮށް އޭނާ އައްޔަންކުރެއްވީ ހައި ކޯޓަށް ކަމަށެވެ. އޭރު ވެސް ސިޓީއަށް ޖަވާބެއް ނުލިބޭކަން އޭނާ ފާހަގަކުރެއްވި އެވެ.

"ރުން ކުރުކޮށް ޖަވާބެއް ދެއްވީ. ޖަދަލު ކުރާ އުސޫލުން ވާހަކަދެއްކުމަކީ ޖޭއެސްސީގައި އިންނަވާ ބޭފުޅުން ވާހަކަދައްކަވާ ގޮތެއް ނޫން... އެކަށީގެންވާ ޖަވާބެއް ނުލިބުނު... އެކަމަކު، ބައްދަލުވުމުން އެނގުނީ ޔާމީންގެ ޝަރީއަތަށް ޖޭއެސްސީ މެދުވެރިކޮށް ނުފޫޒު ފޯރުވާތީ އެކަށީގެންވާ ޖަވާބެއް ނުލިބުނީ ކަމަށް." އަބްދުއްރަހީމް ވިދާޅުވި އެވެ.

މި ބައްދަލުވުން ބޭއްވިކަން ފިޔަވައި ޖޭއެސްސީން ތަފްސީލެއް ނުދެ އެވެ.