ހިލޭ ގޯތި ދިނުން ރަނގަޅެއް ނޫން، އެކަމަކު ސިޔާސީ ލީޑަރުން އެ ގޮތް ބަދަލުކުރަން ބޭނުމެއް ނުވޭ: އަސްލަމް

ހިލޭ ގޯތި ދިނުމަކީ ދެމެހެއްޓެނިވި ގޮތެއްގައި ކުރެވޭނެ ކަމެއް ނޫން ކަމަށާއި ނަމަވެސް އެ ގޮތް ބަދަލު ކުރަން ސިޔާސީ ލީޑަރުން ބޭނުން ނުވާ ކަމަށް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރު މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.

މާލެ ސަރަހައްދުން ހިލޭ ގޯތި ދިނުމަކީ ގިނަ ބަޔަކު ދެކޮޅު ހަދާ ކަމެކެވެ. މައިގަނޑު ސަބަބަކީ މާލެ ސަރަހައްދުގައި ރާއްޖޭގެ ހުރިހާ ރަށްރަށުގެ މީހުން ދިރިއުޅެމުން އައުމާއި ބިމުގެ އަގު ބޮޑުވުމެވެ.

ނަމަވެސް ހުޅުމާލެ، ގުޅިފަޅު އަދި ގިރާވަރު ފަޅު ހިއްކުމަށް ފަހު މާލޭގެ މީހުންނަށް ހިލޭ 3،000 ގޯތި ދިނުމަކީ މި ސަރުކާރުގެ ވައުދެކެވެ.

އެކަމާ ބެހޭ ގޮތުން ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އަސްލަމް މިއަދު ވިދާޅުވީ، ބަންޑާރަ ގޯތި ދިނުމަކީ އެންމެ ރަނގަޅު ގޮތް ނޫން ކަމަށް އޭނާ ކުރިން ވެސް ދަންނަވާފައިވާ ކަމަށާއި އެއީ ދެމެހެއްޓެނިވި ގޮތަކަށް ކުރެވޭނެ ކަމެއް ނޫން ކަމަށެވެ.

"އެއީ ސަސްޓެއިނަބަލް ކަމެއް ގޮތުގައި ކުރެވޭނެ ކަމެއް ކަމަށް އަޅުގަނޑަކަށް ނުފެނޭ. ތާ އަބަދު ބަންޑާރަ ގޯތި ނުއެއް ދެވޭނެ،" އަސްލަމް ވިދާޅުވި އެވެ.

ނަމަވެސް މާލެ އާއި ރާއްޖޭގެ ހުރިހާ ރަށަކުން އެ ރަށެއްގެ ބަޔަކަށް ބަންޑަރަ ގޯތި ދޫކުރުމަކީ ބޯދާ ޒަމާނުއްސުރެ އެކަން ކުރަމުން އައި އުސޫލު ކަމަށާއި ސިޔާސީ ލީޑަރުން ތިބީ އެކަން ހުއްޓާލާ ގޮތަކަށް ނޫން ކަމަށް އަސްލަމް ވިދާޅުވި އެވެ.

"އެ އުސޫލަކީ އެއީ އެންމެ މީހެއްގެ ވިސްނުމަށް ބަދަލު ކުރެވޭ ކަމެއް ނޫން. އެ އަށް ވުރެ ފުޅާ މަޝްވަރާއެއް ކުރެވި އެންމެންނަށް ގަބޫލު ކުރެވޭ ކަމެއް ވަންޏާ އެކަން ކުރަން ޖެހޭ،" އޭނާ ވިދާޅުވި އެވެ.

ސަރުކާރުން 3،000 ގޯތި ހޯދުމަށް މާލޭގެ މީހުންނަށް ފުރުސަތު ހުޅުވާލީ މިދިޔަ އަހަރު އެވެ. އެ އަހަރުގެ އޮކްޓޯބަރު މަހަށް މުއްދަތު ހަމަވީ އިރު 15،000 އަށް ވުރެ ގިނަ މީހުން ވަނީ ގޯތި ހޯދަން ކުރިމަތިލައިފަ އެވެ.

ހައުސިން މިނިސްޓްރީން މިހާރު ކުރަމުން އަންނަނީ ލިބިފައި ހުރި ހުށަހެޅުންތައް ބަލައި އިވެލުއޭޓް ކުރުމުގެ މަސައްކަތެވެ.

އަސްލަމް ވިދާޅުވި ގޮތުގައި ގޯތި ދިނުމުގެ މަސައްކަތް އަންނަ މަހު ކުރިއަށް ގެންދާނެ އެވެ.