އެމްޑީޕީން ޕީޕީއެމާ ހަދާނެ އެއްވެސް ޑީލެއް ނޯންނާނެ: ޝަރީފު

މި ސަރުކާރުން އިދިކޮޅު ޕީޕީއެމް/ޕީއެންސީއާ އެކު ހަދާނެ އެއްވެސް ޑީލެއް ނޯންނާނެ ކަމަށް މަރަދޫ ދާއިރާގެ އެމްޑީޕީގެ މެމްބަރު އިބްރާހިމް ޝަރީފް (މަވޯޓާ) ރޭ ވިދާޅުވެއްޖެ އެވެ.

ފޭދޫގައި އެމްޑީޕީގެ ޖަގަހައެއް ހުޅުވުމުގެ ރަސްމިއްޔާތަށް ފަހު ނޫސްވެރިއަކު، މި ސަރުކާރުން ޕީޕީއެމާ އެއްވެސް ޑީލެއް ހަދައިގެން އެއްވެސް ކަމެއް ކުރާނެ ހާލަތެއް އަތުވެދާނެތޯ ކުރި ސުވާލަށް ޖަބާވު ދެއްވަމުން ޝަރީފް ވިދާޅުވީ އެއީ ނުވާނެ ކަމެއް ކަމަށެވެ.

"... ޕީޕީއެމް ދެވަނަ ބުރަށް ނުދާ ކަމަށް ވަންޏާ، ދެން ދާ މީހަކާ ޕީޕީއެމުން ދެވަނަ ބުރަށް ޑީލް ހަދާނީ. ޕީޕީއެމް އަކުން ވެސް ޑީލެއް ނަހަދާނެ އެމްޑީޕީއަކާ. ޕީޕީއެމް ދެވަނަ ބުރަށް ދިއުމުގެ ފުރުސަތު ބޮޑީ. އެހެންވީމާ ދެން ތިބި މީހުން އަރާނީ ޕީޕީއެމްގެ ފަހަތަށް،" އޭނާ ވިދާޅުވި އެވެ.

"މިސާލަކަށް ]ރައީސް[ އިބޫ ސޯލިހަށް ލިބިވަޑައިގަތީ 49 ޕަސެންޓް ވޯޓް. އެފަދަ ހާލަތެއްގައި ގާސިމް ވެސް ރައީސް ނަޝީދު ވެސް ހިތް ނުރުހުނަސް އެމްޑީޕީ އަށް އެރުން ނޫން ޗޮއިސްއެއް ނޯންނާނެ."

ޝަރީފު ވިދާޅުވިގޮތުގައި، އެމްޑީޕީގެ ރައީސް މުހައްމަދު ނަޝީދު އަދި އެ ޕާޓީއާ މިހާރު ދުރުގައި ހުންނަވަނީ އަދިވެސް ފަހު ފުރުސަތެއްގެ އިންތިޒާރުގަ އެވެ.

ޝަރީފު އެހެން ވިދާޅުވިއިރު، މި އަހަރުގެ ރިޔާސީ އިންތިހާބަށް ކޯލިޝަން ހެދުމުގެ މަޝްވަރާ ކުރުމުގެ ދައުވަތު ޕީޕީއެމަށް ދެއްވަން ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް ނިންމެވުމުން ޕީޕީއެމުން ބުނެފައި ވަނީ އެކަން ގަބޫލު ކުރެވެން ނެތް ކަަމަށެވެ.

ޕީޕީއެމް ހިންގުމާ ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ކުރިން ވިދާޅުވެފައި ވަނީ، ޕީޕީއެމަކީ އެންމެ ބޮޑު ޕާޓީއަށް ވާތީ އެހެން ޕާޓީތަކުން އަރަން ޖެހޭނީ ޕީޕީއެމްގެ ފަހަތަށް ކަމަށެވެ.

"އެހެން ޕާޓީތަކުން ބޭނުމިއްޔާ އަޅުގަނޑުމެންނާ އެކު ކޯލިޝަން ހެދޭނެ. އެކަމަކު އެ ޕާޓީތަކުން އަންނަން ޖެހޭނީ އަޅުގަނޑުމެންގެ ފަހަތަށް. އަޅުގަނޑުމެންގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން. އެ ނޫން އެއްވެސް ކެންޑިޑޭޓަކަށް ޕީޕީއެމް/ޕީއެންސީގެ ތާއީދެއް ނުލިބޭނެ،" ފޮނަދޫ ދާއިރާގެ ކުރީގެ މެމްބަރު ވިދާޅުވެފައި ވެ އެވެ.