ނަޝީދު ވަކިކުރަން ޖަހާ "ސިޔާސީ ސަކަރާތުގައި" އެމްއެންޕީ ބައިވެރިއެއް ނުވާނެ: އުޝާމް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމަކީ އެމްޑީޕީން ޖަހާ "ސިޔާސީ ސަކަރާތެއް" ގެ ގޮތުގައި ސިފަކުރައްވައި، އެކަމުގައި އެމްއެންޕީން ބައިވެރި ނުވާނެ ކަމަށް އެ ޕާޓީގެ ނައިބު ރައީސް އަދި ވިލިމާލެ ދާއިރާގެ މެމްބަރު އަހުމަދު އުޝާމް ރޭ ވިދާޅުވެއްޖެ އެވެ.

އެމްޑީޕީގެ ރައީސްގެ މަގާމު ވެސް ފުރުއްވާ ނަޝީދުގެ އިތުބާރު ނެތްކަމުގެ މައްސަލައެއް އެ ޕާޓީގެ ޕާލަމެންޓްރީ ގުރޫޕުން އިއްޔެ ވަނީ 54 މެންބަރުންގެ ސޮޔާ އެކު މަޖިލިހަށް ހުށަހަޅައިފަ އެވެ.

މަޖިލިހުގެ ރައީސް ނަޝީދު މަގާމުން ވަކިކުރަން ކުރާ މަސައްކަތާ މެދު އެމްއެންޕީގެ ފަރާތުން އުޝާމް އުފެއްދެވީ ސުވާލެކެވެ.

އޭނާ ވިދާޅުވީ، ރިޔާސަތުގައި އިންނަވައިގެން ނަޝީދު ގޯސްކޮށް ކުރެއްވި ކަންކަމުގެ ޝަކުވާ އެތައް ފަހަރެއްގެ މަތިން އެމްއެންޕީން އުފުލި ކަމަށާއި އެކަމަކު މަޖިލީހުގެ ފުރިހަމަ އަޣުލަބިއްޔަތު އޮތް ދުވަސްވަރު އެމްޑީޕީން އޭރު އަޑު ނޭހި ކަމަށެވެ.

"ދެން މިހާރު ސިޔާސީ ގޮތުން ކަންތައްތައް ބަދަލުވެގެން އެކަން ކުރަން އުޅުނީމާ އެކަމުގައި އެމްއެންޕީން އިންވޯލްވްވާކަށް ބޭނުމެއް ނޫން. ސިޔާސީ ގޮތުން މިހާރު ޖަހަން މި އުޅޭ ސަކަރާތުގެ ތެރެއަށް އަޅުގަނޑުމެން ވަންނަން ބޭނުމެއް ނުވޭ،" ޗާގޯސްގެ މައްސަލާގައި ސަރުކާރާ ދެކޮޅަށް ހަރަކާތްތެރިވާ ކޯލިޝަންގައި އެމްއެންޕީ ތަމްސީލް ކުރައްވާ އުޝާމް ވިދާޅުވި އެވެ.

އެމްއެންޕީގެ އިތުރުން، ނަޝީދު ވަކިކުރުމަށް އިދިކޮޅު ޕީޕީއެމް/ޕީއެންސީން ވެސް ތާއީދުނުކުރާނެ ކަމަށް ވަނީ ބުނެފަ އެވެ.

ނަޝީދު ވަކިކުރަނީ ކީއްވެ؟

ނަޝީދު މަގާމުން ވަކިކުރަން ހުށަހެޅި ގަރާރުގައި ބުނެފައި ވަނީ މަޖިލިހުގެ ރައީސްގެ މަގާމަށް ނަޝީދު އިންތިހާބު ކޮށްފައި ވަނީ ގިނަ މެންބަރުންތަކެއްގެ ވޯޓާއެކުގައި ކަމަށާއި ވޯޓު ދީފައި ވަނީ ދިވެހިން އެދޭ ކަންކަން ހާސިލް ކޮށްދިނުމަށް ކަމަށެވެ.

ނަމަވެސް އެ މަގާމުގައި ނަޝީދު އިތުރަށް ހުންނަވައިފި ނަމަ މަޖިލީހުން އަދާކުރަން ޖެހޭ ގާނޫނީ ޒިންމާ އަދާ ކުރުމުގެ ފުރުސަތު ގެއްލި މަޖިލީހުގެ ގަދަރު ދިވެހިންގެ ކުރިމަތީ ކުޑަވެގެން ދާނެ ކަމަށް އެ މައްސަލާގައި ބުނެފައިވެ އެވެ.

"...އިސްވެ ބަޔާން ކުރެވުނު ކަންކަމާއި ސަބަބުތައް އެހެން ހުރުމުން ރައީސް މުހައްމަދު ނަޝީދަށް ކުރަމުން އައި އިތުބާރު ގެއްލިއްޖެ ކަމަށް އަހަރުމެންނަށް ފެނުނު ހިނދު، ރައްޔިތުންގެ މަޖިލީހުގެ ރައީސްގެ މަގާމުން ރައީސް މުހައްމަދު ނަޝީދު ވަކި ކުރެއްވުމަށް އަހަރުމެން ސޮއި ކޮށް ހުށަހަޅަމެވެ،" އެ މައްސަލާގައި ބުނެފައިވެ އެވެ.

ނަޝީދު ވަކި ކުރަން ތާއީދު ކޮށް އެމްޑީޕީގެ ޕާލިމެންޓަރީ ގްރޫޕުން ސޮއި ކުރީ 51 މެމްބަރެކެވެ. އެ ޕާޓީގެ ފަރާތުން ސޮއި ކުރަން އެއްބަސް ނުވީ ކުޅުދުއްފުށީ ދެކުނު ދާއިރާގެ މެންބަރު ޖަމްޝީދު މުހައްމަދާއި ބިލެއްދޫ ދާއިރާގެ މެންބަރު އަހުމަދު ހަލީމް (ދޮންބިލެއް) އާއި ހިތަދޫ މެދު ދާއިރާގެ މެންބަރު އަހުމަދު ރަޝީދު (ޗެކްމާކް) އާއި ފޮނަދޫ ދާއިރާގެ މެންބަރު މޫސާ ސިރާޖު އަދި އިނގުރައިދޫ ދާއިރާގެ މެމްބަރު ހަސަން އަހުމަދެވެ.

ނަޝީދު މައްސަލާގައި އެމްޑީޕީގެ ބޭރުން ސޮއި ކުރެއްވީ މީދޫ ދާއިރާގެ މެންބަރު އަހުމަދު ސިޔާމް މުހައްމަދާއި ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ (މޮސްޓާ) އާއި ކާށިދޫ ދާއިރާގެ މެންބަރު އަބްދުﷲ ޖާބިރު އަދި ތުލުސްދޫ ދާއިރާގެ މެންބަރު އިބްރާހިމް ނަސީމެވެ.