މޮޅަދޫ ޕްރޮފައިލް

މިއީ ހއ. އަތޮޅުގެ ރަށްތަކުގެ ތެރެއިން ސައިޒުގެ ގޮތުން އެންމެ ބޮޑު އެއް ރަށެވެ. އެކަމަކު އަތޮޅުގެ ނިސްބަތުން އާބާދީ އެންމެ މަދު ރަށެވެ. މިއީ 118 ހެކްޓަރުގެ ރަށެކެވެ. ރީތި ތުނޑިއެއް އޮވެ އެވެ. މިއީ ވެސް ގޮނޑުދޮށް ހިތްގައިމު ރަށެކެވެ.

އާބާދީ

މި ރަށުގެ އާބާދީ އަކީ 377 އެވެ. އެއީ 180 އަންހެނުންނާއި 197 ފިރިހެނުންނެވެ. ރަށުގައި އުޅޭ މީހުންގެ އަދަދު މިއަށްވުރެ ވެސް މަދެވެ.

ތައުލީމު

މޮޅަދޫ ސްކޫލްގައި ނާސަރީން ފެށިގެން ގްރޭޑް 10 އާ ހަމަޔަކަށް ކިޔަވައިދެ އެވެ. މި ސްކޫލްގައި އުޅޭ 55 ދަރިވަރުންނަށް ކިޔަވައިދޭން 17 ޓީޗަރުން އުޅެ އެވެ.

އެހެނިހެން ހިދުމަތްތައް

މި ރަށުގައި ހިންގަނީ ދެ ފިހާރަ އެވެ. ގެސްޓް ހައުސްއެއް ނުހުރެ އެވެ. ބޭންކިންގެ ހިދުމަތެއް އަދި ފުލުހުންގެ ހިދުމަތެއް ވެސް އަދި ގާއިމުކޮށްފައެއް ނުވެ އެވެ. ސިއްހީ ހިދުމަތް ދިނުމަށް ސިއްހީ މަރުކަޒެއް އަދި ބޭސް ފިހާރައެއް ހުރެ އެވެ.

ދަތުރުފަތުރު

މޮޅަދޫއާ އެންމެ ކައިރި އެއާޕޯޓަކީ ހަނިމާދޫ އިންޓަނޭޝަނަލް އެއާޕޯޓެވެ. މޮޅަދޫ އާއި ހަނިމާދޫއާ ދެމެދު ސްޕީޑް ލޯންޗެއްގައި 50 މިނެޓުން ދަތުރުކުރެވޭނެ އެވެ. މި ރަށުގައި ބަނދަރެއް ނޯވެ އެވެ. ލަފާފުރުމަށް ބޭނުންކުރަނީ ފާލަމެކެވެ.