ސިއްހީ ދާއިރާގެ ސޯޝަލް ވޯކަރުންގެ މުސާރައިގެ ކަންބޮޑުވުމަށް ވެސް ރައީސް ހައްލު ގެނެސް ދެއްވައިފި

ސިއްހީ ދާއިރާގައި މަސައްކަތްކުރާ ސޯޝަލް ވޯކަރުންގެ މުސާރައިގައި ހުރި ބައެއް ކަންބޮޑުވުންތަކަށް ވެސް ރައީސް އިބްރާހިމް މުހައްމަދު ސޯލިހު މިއަދު ހައްލު ގެނެސް ދެއްވައިފި އެވެ.

ރައީސް އޮފީހުގެ ތަރުޖަމާނު މިއުވާން މުހައްމަދު މިއަދު ވިދާޅުވީ ދައުލަތުގެ ޕޭ ފްރޭމްވޯކަށް ހިޖުރަކުރި މުވައްޒަފުންގެ ތެރެއިން ހެލްތް އެންޑް ސޯޝަލް ހެލްތް ސެކްޓަރާއި ސޯޝަލް ސާވިސް މެޓްރިކްސްތަކުގައި ހިމެނޭ މުވައްޒަފުންގެ ފަރާތުން ހުށަހަޅާފައިވާ މައްސަލަތައް ދިރާސާކުރުމަށް ފަހު ބައެއް ބަދަލުތައް ގެނައުމަށް ރައީސް ނިންމަވާފައިވާ ގެނެސްފައިވާ ކަމަށެވެ.

އޭނާ ވިދާޅުވީ ސިއްހީ ދާއިރާގެ މުސާރައިގެ އޮނިގަނޑަށް ގެނެވުނު ބަދަލާ ގުޅިގެން ސޯޝަލް ސާވިސް މެޓްރިކްސްތަކުގައި ހިމެނޭ މުވައްޒަފުންގެ ތެރެއިން ރަސްމީ ބަންދު ދުވަހު އޮފީހަށް ހާޒިރުވާ މުވައްޒަފުންނަށް ހާޒިރީ އިނާޔަތް ލިބޭ ގޮތަށް ހަމަޖައްސާފައިވާ ކަމަށެވެ.

މީގެ އިތުރުން ހެލްތް އެންޑް ސޯޝަލް ހެލްތް ސެކްޓާ މުވައްޒަފުންގެ ތެރެއިން ޑިއުޓީ އުސޫލުން ރަސްމީ ބަންދު ދުވަހު އޮފީހަށް ހާޒިރުވާ މުވައްޒަފުންނަށް ވެސް ހާޒިރީ އިނާޔަތް ލިބޭ ގޮތަށް ރައީސް ހަމަޖައްސަވާފައިވާ ކަމަށް މިއުވާން ވިދާޅުވި އެވެ.

މި ދާއިރާގެ މުވައްޒަފުންގެ މުސާރައަށް ބަދަލު ގެނައިއިރު، ސަރުކާރުން އިއްޔެ ވަނީ ޓީޗަރުންނާއިި ނަރުހުންގެ މުސާރައިގައި ހުރި ބައެއް ކަންބޮޑުވުންތައް ހައްލުކޮށްދީފަ އެވެ.