އެމްޑީޕީއަކީ ގަދަ ކަނޑުގައި ދަތުރުކޮށް، ކުރި ހޯދާ ޕާޓީ: ފައްޔާޒު

މި އަހަރުގެ ރިޔާސީ އިންތިހާބުގައި އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ކުރި ތާއީދު އެމްޑީއޭ އިން ރޭ އަނބުރާ ގެނައުމާ ގުޅިގެން އެމްޑީޕީގެ ޗެއާޕާސަން ފައްޔާޒު އިސްމާއިލް ދެއްވީ ހިތްވަރުގެ މެސެޖެކެވެ.

ރައީސާއި އެމްޑީޕީ ދޫކޮށްލި ކަން އެމްޑީއޭ އިން އިއުލާން ކުރިތާ މާ ގިނައިރުތަކެއް ނުވަނީސް ކުރެއްވި ޓުވިޓެއްގައި ފައްޔާޒު ވިދާޅުވީ، އެމްޑީޕީއަކީ އަބަދުވެސް ގަދަ ކަނޑުގައި ދަތުރުކޮށް، ކުރި ހޯދާ ޕާޓީއެއް ކަމަށެވެ.

"ބަލިކޮށް ނުލެވުނު ހިތްވަރު. ގުޑާނުލެވުނު އަަޒުމް. ކުރިއަށް ކުރިއަށް ބާރަށް ކުރިއަށް،" މީދޫ ދާއިރާގެ މެމްބަރު އަހުމަދު ސިޔާމް މުހައްމަދުގެ އެމްޑީއޭގެ ނިންމުމަށް އިހުތިރާމް ކުރައްވައި އަދި ފުރަތަމަ ބުރުގައި ކުރި ކެމްޕެއިނާއި ބުރަ މަސައްކަތަށް ޝުކުރު ދަންނަވަމުން ފައްޔާޒު ވިދާޅުވި އެވެ.

އެމްޑީޕީއާ އެކު ދެ ވަނަ ބުރުގައި ކުރިއަށް ދިއުމުގެ ބަދަލުގައި ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރަން އެމްޑީއޭ އިން ނިންމީ ފުރަތަމަ ބުރުގެ ނަތީޖާ އަށް ބަލައި، ދެ ވަނަ ބުރުގައި މުއިއްޒު މާ ބޮޑު ތަނުން ވެސް ކާމިޔާބު ކުރާނެ ކަމަށް ފެންނާތީ ކަމަށް ޑެޕިއުޓީ ލީޑަރު އަލީ މައުރޫފް ވިދާޅުވި އެވެ.

އެމްޑީޕީގެ ކޯލިޝަން ރޫޅާލަން ހުށަހެޅުއްވީ ކައުންސިލް މެމްބަރު މުހައްމަދު އައްބާސް އެވެ. އެ ހުށަހެޅުމަށް ތާއީދު ކުރެއްވީ އަލީ މައުރޫފެވެ. ހުށަހެޅުން ފާސްވީ 33 މެމްބަރުންގެ އަަޣުލަބިއްޔަތުންނެވެ. އެއާ ދެކޮޅަށް ވޯޓު ދެއްވީ ދެ މެމްބަރެކެވެ.

ފުރަތަމަ ބުރުގައި ރައީސް އިބްރާހިމް މުހައްމަދު ސޯލިހަށް ލިބިވަޑައިގަތް ދަށް ނަތީޖާ އަށް ފަހު، ސިޔާމް ދެ ވަނަ ބުރުގެ ކެމްޕެއިނަށް ނުނިކުންނަވަ އެވެ.

ފުރަތަމަ ބުރުގައި މުއިއްޒު ލައްކައަކަށް ވުރެ ގިނަ ވޯޓު ހޯއްދެވި އެވެ. ރައީސް އިބްރާހިމް މުހައްމަދު ސޯލިހަށް ހޯއްދެވުނީ 86،000 ވޯޓެވެ.