ސައުދީގެ އަގުބޮޑު ހުށަހެޅުން ޑެހެއާ ދޫކޮށްލީ އަންހެނުނަށްޓަކައި

މެޑްރިޑް (ނޮވެމްބަރު 20) - ސައުދީ އަރަބިއާގެ އައް ނަސްރުން ހުށަހެޅި އަގުބޮޑު އެއްބަސްވުން، ކީޕަރު ޑޭވިޑް ޑެހެއާ ދޫކޮށްލީ އޭނާގެ އަންހެނުނާ ހެދިކަން ހާމަވެއްޖެ އެވެ.

މެންޗެސްޓާ ޔުނައިޓެޑަށް 12 އަހަރު ކުޅުމަށް ފަހު މިދިޔަ ސީޒަނަށް ފަހު އެ ކްލަބް ދޫކޮށްލި ޑެހެއާ، އޭގެ ފަހުން އެއްވެސް ކްލަބަކާ ނުގުޅެ އެވެ. ޔުނައިޓެޑްގައި ޑެހެއާ އާއެކު ކުޅުނު ކްރިސްޓިއާނޯ ރޮނާލްޑޯ ވެސް ކުޅޭ އައް ނަސްރުން، ސްޕެއިންގެ ގައުމީ ޓީމުގެ ކުރީގެ ކީޕަރަށް، ހަފުތާ އަކު 500،000 ޑޮލަރުގެ އާމުދަނީއެއް ލިބޭ މުސާރައެއް ހުށަހެޅި އެވެ.

އެކަމަކު ސައުދީ ލީގަށް ބަދަލުވާން ޑެހެއާ ބޭނުން ނުވީ، އޭނާގެ އަންހެނުން، އެޑާން ގާސިއާ ސައުދީ އަށް ދިރިއުޅުން ބަދަލުކުރަން ބޭނުން ނުވުމުން ކަމަށް އިނގިރޭސި މީޑިއާތަކުން ބުނެ އެވެ.

އިނގިރޭސި މިޑީއާތަކުން ބުނާ ގޮތުގައި ޑެހެއާ އުންމީދުކުރަނީ، އެމެރިކާގެ މޭޖާ ލީގަށެވެ. ބެލޮންޑިއޯ އެވޯޑް އަށްވަނަ ފަހަރަށް ހޯދި ލިއޮނެލް މެސީގެ އިންޓަ މަޔާމީން ޑެހެއާ އަށް ހުށަހެޅުމެއް އަތުވެދާނެ ކަމަށް ބެލެވެ އެވެ.

މާޔާމީގައި ދިރިއުޅެން، ސްޕެއިންގެ ސެލްބްރިޓީ ލަވަކިޔުންތެރިޔާ އެޑާން ދެކޮޅު ހަދާނެކަމަކަށް ނުބެލެވެ އެވެ.