ވަކިކުރަން ފޮނުވިތާ އެތައް މަހެއް، އަލީ އާދަމަށް އިތުރު މައްސަލައެއްގައި ފިޔަވަޅު އަޅައިފި

ވަރިވާން ދިޔަ އަންހެނަކަށް ގުޅި ކަމަށް ތުހުމަތުވާ ހދ. ޖުޑިޝަލް ދާއިރާގެ އިސްމެޖިސްޓްރޭޓް އަލީ އާދަމް މަގާމުން ވަކިކުރުމާ މެދު ރައްޔިތުންގެ މަޖިލީހުން ގޮތެއް ނުނިމި އޮއްވައި، އެފަދަ އިތުރު މައްސަލައެއްގައި އެންމެ ފަހުން ޖުޑީޝަލް ސާވިސް ކޮމިޝަން (ޖޭއެސްސީ) އިން ފިޔަވަޅު އަޅައިފި އެވެ.

މީގެ ކުރިން އަލީ އާދަމްއާ ގުޅޭ ސުލޫކީ ދެ މައްސަލައެއް ޖޭއެސްސީން ބެލުމަށް ފަހު އެ ދެ މައްސަލަ ވެސް އޭނާގެ މައްޗަށް ސާބިތުވާތީ، އޭނާ ފަނޑިޔާރުކަމުން ވަކިކުރަން މަޖިލީހަށް ދެ ފަހަރެއްގެ މަތިން ވަނީ ފޮނުވައިފަ އެވެ.

ފަނޑިޔާރަކު މަގާމުން ވަކިކުރެވޭނީ، ޖޭއެސްސީން އެކަމަށް އެދި ފޮނުވުމުން ރައްޔިތުންގެ މަޖިލީހުގެ ތަޅުމުން ފާސްކޮށްގެންނެވެ.

އަލީ އާދަމް ފަނޑިޔާރު ކަމުން ވަކި ކުރުމަށް ޖޭއެސްސީން އެންމެ ފުރަތަމަ ހުށަހެޅީ މި އަހަރުގެ ޖުލައި މަހުގެ ތެރޭގަ އެވެ. ނަމަވެސް، މިހާތަނަށް އެކަމުގައި މަޖިލީހުން ގޮތެއް ނުނިންމަ އެވެ. މިކަމާ މެދު ޖޭއެސްސީން ކަންބޮޑުވުން ފާޅުކޮށްފައިވެ އެވެ.

ގިނަ ޝަކުވާތަކެއް އޮތް އަލީ އާދަމްއާ ގުޅޭ ގޮތުން ޖޭއެސްސީން މިފަހަރު ބެލި މައްސަލާގައި އޭނާ ވަކި ކުރުމަށް މަޖިލީހަށް ހުށަހެޅުމުގެ ބަދަލުގައި ނިންމީ، އޭނާގެ މަގާމު ދަށްކުރުމަށެވެ. އެ ފިޔަވަޅުގެ ދަށުން އިސް މެޖިސްޓްރޭޓްކަމުން މެޖިސްޓްރޭޓަކަށް އޭނާ ވަނީ ބަދަލުކޮށްފަ އެވެ.

އަލީ އާދަމްގެ މައްސަލައިގައި މަޖިލީހުގެ ޖުޑިޝަރީ ކޮމެޓީން ނިންމާފައި އޮތީ އެ މެޖިސްޓްރޭޓް ވަކިކުރުމުގެ ކުރިން މަޖިލީހުގައި ޖަވާބުދާރީވުމުގެ ފުރުސަތު ދިނުމަށެވެ. ނަމަވެސް މީގެކުރިން ފަނޑިޔާރުން ވަކިކުރި މައްސަލަތަކުގައި ކޮމެޓީން އެގޮތަށް ފުރުސަތު ދީފައެއް ނުވެ އެވެ.