މާލެ ސަރަހައްދަށް ކެންސަރު ހޮސްޕިޓަލް ބަދަލުކުރުން ގަމު ކައުންސިލުން ކުށްވެރިކޮށްފި

ލ. ގަމުގައި އަޅަން ނިންމި ކެންސަރު ހޮސްޕިޓަލް، މާލެ ސަރަހައްދަށް ބަދަލުކުރަން ނިންމުމުން، ގަމު ކައުންސިލުން އެކަން މިއަދު ކުށްވެރިކޮށްފި އެވެ.

އެ ރަށު ކައުންސިލުން ނެރުނު ބަޔާނުގައި ބުނީ ކުރީގެ ސަރުކާރުން އެ ތަނުގައި ކެންސަރު ހޮސްޕިޓަލް އަޅަން ނިންމުމަކީ ރަށާއި މުޅި އަތޮޅަށް ލިބުނު ވަރަށް ބޮޑު އުފަލެއް ކަމަށެވެ. އެކަމަކު، ވަކި ބައްޔަކަށް ހާއްސަކޮށްގެން ހަދާ ފުރަތަމަ ހޮސްޕިޓަލް މާލެ ސަރަހައްދަށް ބަދަލުކޮށް، ރާއްޖޭގެ އެންމެ ބޮޑު ރަށުގައި އަޅަން މިހާރު ނިންމާފައިވަނީ މެންޓަލް ހެލްތު ހޮސްޕިޓަލެވެ.

ކުރީގެ ސަރުކާރު ނިމުނުއިރު އޮތީ އެ ހޮސްޕިޓަލް އިމާރާތްކުރާ ބިން ހަމަޖައްސައި، އެ ތަނުގައި ހުރި ރުއްގަހުގެ ބަދަލު ހަމަޖައްސައި، މަސައްކަތް ފެށުމުގެ މަރުހަލައިފަ އެވެ. އެހެންވެ، ގަމުގެ ރައްޔިތުންނާއި ކައުންސިލުން ވެސް ތިބީ ވެރިކަން ބަދަލުވިޔަސް، މި ސަރުކާރުން އެ މަސައްކަތް ކުރިއަށް ވުރެ ބާރަށް މަސައްކަތް ގެންދާނެ ކަމަށް އުންމީދުކޮށްގެން ކަމަށް ކައުންސިލުން ބުންޏެވެ.

އެކަމަކު، އުއްމީދުކުރި ގޮތާ ހިލާފަށް މި ސަރުކާރުން އެ ހޮސްޕިޓަލް މާލެއަށް ބަދަލުކުރަން ނިންމުމަކީ ރަށާއި އަތޮޅުގެ ރައްޔިތުން އަދި ކައުންސިލްގެ ކަންބޮޑުވާ ކަމެއް ކަމަށް ބުންޏެވެ.

"މި ކައުންސިލުން ގަބޫލުކުރާ ގޮތުގައި އާބާދީ 'ތޮއްޖެހިފައިވާ' މާލެ ފަދަ ސަރަހައްދަކަށް ކެންސަރު ހޮސްޕިޓަލް ބަދަލުކުރުމަކީ އެ ތަނުގައި ދިރިއުޅޭ ފަރާތްތަކަށް ވެސް ހުރި ނުރައްކަލެކެވެ. ކެންސަރަށް ދެވޭ ފަރުވާއަކީ ނުރައްކާތެރި ކެމިކަލް ހިމެނޭ ފަރުވާއަކަށް ވާތީ، އެފަދަ ކެމިކަލެއް ރައްކާތެރިކަމާ އެކު ގެންގުޅެވޭނެ ވަސީލަތް ގާއިމްކުރުމަށް ވެސް ލ. ގަން ފަދަ ބިންބޮޑު ރަށެއްގެ މުހިއްމުކަން ބޮޑެވެ."

މިކަންކަން މިހެން ހުރުމާ އެކު ކެންސަރު ހޮސްޕިޓަލް މާލެއަށް ބަދަލުކުރައްވަން ނިންމެވި ނިންމުމަކީ މި ރަށުގެ ރައްޔިތުންނާއި މި ކައުންސިލުން ހަރުކަށި އިބާރާތުން ކުށްވެރިކުރާ ކަމެކެވެ."

ހެލްތު މިނިސްޓަރު ޑރ. އަބްދުﷲ ހަލީލް މިދިޔަ ހޯމަ ދުވަހު "މިހާރު" އަށް ވިދާޅުވީ، ޓާޝަރީ ފަރުވާ ނުލިބޭ ތަނެއްގައި، ކެންސަރު ހޮސްޕިޓަލެއް އިމާރާތް ކުރަން ގޮންޖެހުންތަކެއް އެބަހުރި ކަމަށެވެ. ފަންނީ ބޭފުޅުން ވެސް، ވަސީލަތްތައް ފުރިހަމަވެފައި ނެތް ތަނެއްގައި އެފަދަ ހޮސްޕިޓަލެއް ހަދައިފި ނަމަ ބަލި މީހުންނަށް ބައިވަރު ތަކުލީފުތައް ކުރިމަތިވެދާނެ ކަމަށް ގަބޫލު ކުރައްވާ ކަމަށާއި މާލެ ސަރަހައްދަށް އެތަން ބަދަލުކުރީ އެ ސަބަބުތަކާ ހެދި ކަމަށް އޭނާ ވިދާޅުވި އެވެ. ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައީސް އޮފީހުން އޭރު ބުނީ ކެންސަރު ހޮސްޕިޓަލް އިމާރާތްކުރަން ރާއްޖޭގެ އެންމެ ބޮޑު ރަށުން 20،000 އަކަފޫޓުގެ ބޮޑު ބިމަކާއެކު (50 މިލިއަން ޑޮލަރު) 771 މިލިއަން ރުފިޔާ ކަނޑައަޅާފައިވާ ކަމަށެވެ. އެ މަސައްކަތްތައް ފަށާނެ އެކި ތާރީހުތައް ވެސް ދިނެވެ.