މޯދީގެ ކެމްޕެއިން ފެށުން: އާސާރީ މިސްކިތް ތަޅާލުމަށް ފަހު އެޅި ފައްޅި ހުޅުވުން

އިންޑިއާގެ އުތަރް ޕަރްދޭޝްގެ އަޔޯދީގައި ހުރި އާސާރީ "ބާބްރީ" މިސްކިތް ތަޅާލުމަށް ފަހު އެތަނުގައި އެޅި ހިންދީންގެ ފައްޅި "ރާމް މަންދީރް" އަކީ އެ ގައުމުގެ ބޮޑުވަޒީރު ނަރެންދުރަ މޯދީގެ ހަރުކަށި ހިންދީ ސިޔާސީ ފިކުރުގެ ބޮޑު ކާމިޔާބީއެއްގެ ގޮތުގައި މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އިން ދެކެ އެވެ.

ބާބްރީ މިސްކިތަކީ މިތަނުގައި ހުންނަތާ އެތައް ސަތޭކަ އަހަރެއް ފަހުން 1992 ވަނަ އަހަރު ހަރުކަށި ހިންދީން ނުކުމެ އެތަން ތަޅައި ބިމާ ހަމަކޮށްލި އެވެ. އެ މީހުންގެ "ކަލާނގެ" އެއް އުފަންވި ތަނެއްގައި ހުރި ފައްޅިއެއް ތަޅާލުމަށް ފަހު އަޅާފައި ހުރި މިސްކިތެއް ކަމަށް ބުނަމުންނެވެ. ބީޖޭޕީ ސަރުކާރުގެ ފުރިހަމަ ތާއީދާ އެކު އެތަނުގައި މިހާރު އެ ހުރީ 160 ފޫޓް އުސްމިނުގައި ބޮޑު ފައްޅިއެކެވެ.

މިސްކިތް ތަޅާލުމުން އުފެދުނު ހަމަނުޖެހުންތަކުގައި 2،000 އަށް ވުރެ ގިނަ މީހުން މަރުވި އިރު އޭގެ ތެރޭގައި ގިނައީ މުސްލިމުންނެވެ. މިއީ އިންޑިއާގައި މި ފަހުގެ ތާރީހުގައި ހިނގި ދީނީ އެންމެ ބޮޑު ހަމަނުޖެހުމަށް ވިޔަސް މޯދީ އާ ދައުރަކަށް އިންތިހާބު ވުމަށް ނުރަސްމީކޮށް ފަށާ ކެމްޕެއިން ހަރަކާތެއްގެ ގޮތުގައި، މިސްކިތް ތަޅާލުމަށް ފަހު އެޅި ފައްޅި ހުޅުވާނެ އެވެ.

މިއީ އިންޑިއާގައި ޒަމާންތަކެއް ވަންދެން އޮތް، ވަކި ދީނަކަށް އިސްކަން ނުދޭ "ސެކިއުލާ" ވެރިކަމުގެ ސިޔާސަތު ބަދަލުވި ބޮޑު ހަމަނުޖެހުމާ ގުޅިފައިވާ ތަނެކެވެ. އިންޑިއާގައި އެންމެ ގިނައީ ހިންދީން ކަމަށް ވާތީ ވެރިކަން ކުރަން ޖެހޭނީ ވެސް ހިންދީންނަށް އިސްކަން ދީގެން އެ މީހުން ބޭނުންވާ ގޮތަށް ކަމަށް ބުނެ އެ މަގަށް ކެމްޕެއިންކުރާ މީހުންނަށް މި ފައްޅި ހުޅުވުން ވަރަށް ހާއްސަ އެވެ.

ބޮޑުވަޒީރު މޯދީ މިދިޔަ ހަފްތާގައި ވަނީ މި ފައްޅި ހުޅުވާތަން ފެނުމަކީ ބޮޑު ނަސީބެއްގެ ގޮތުގައި ސިފަކުރައްވައިފަ އެވެ. އަދި މިތަން ހުޅުވުމުގެ ކުރިން 11 ދުވަހު "ރޯދަ" ހިފާނެކަން ވެސް އިއުލާނުކުރެއްވި އެވެ.

މޯދީ އެ ދުވަހު ވިދާޅުވި ގޮތުގައި "މުޅި އިންޑިއާ ތަމްސީލްކޮށްދޭނެ މީހެއްގެ ގޮތުގައި ކަލާނގެ ހިޔާރުކުރެއްވި" މީހަކީ އޭނާ އެވެ.

އިންޑިއާގެ ނުފޫޒު ގަދަ މީހުން ބައިވެރިވޭ

ފައްޅި ހުޅުވުމުގެ ރަސްމިއްޔާތަށް އަޔޯދިއާ އަށް ދާ މީހުންގެ ތެރޭގައި ސެލެބްރިޓީންނާއި ބިލިއަނަރުންނާއި އެ ގައުމުގެ ކުރީގެ ކްރިކެޓް ކެޕްޓަން ވިރާޓް ކޯލީ އާއި ބޮލީވުޑްގެ އެންމެ ނުފޫޒު ގަދަ އަމީތާބް ބައްޗަން ވެސް ހިމެނެ އެވެ.

މީގެ 10 އަހަރު ކުރިން ބޮޑު އަޣުލަބިއްޔަތަކާ އެކު އިންޑިއާގެ ވެރިކަމަށް އައުމަށް ފަހު މޯދީ އާއި އޭނާގެ ބީޖޭޕީން ގެންދަނީ ސިޔާސީ ކޮންމެ ކަމެއްގައި ހިންދީ ދީން އިސްކުރަމުންނެވެ. ޕާޓީގެ އިސް އެތައް ބަޔަކު އެކި ފޯރަމްތަކުގައި ވަނީ އިންޑިއާގައި މުސްލިމުން ވެރިންކުރި ޒަމާނުގެ އެކި ކަންކަން ފާހަގަކޮށް އެއީ ހިންދީން އަޅުވެތިކޮށް އަނިޔާވެރިކަން އިސްކުރި ބޭފުޅުން ކަމަށް ބުނަމުންނެވެ. އެ މީހުން ދެކޭ ގޮތުގައި އަޔޯދިއާ އަކީ މުސްލިމުން ހިންދީންނާ މެދު އަމަލުކުރި ގޮތް އެންމެ ރަނގަޅަށް އެނގެން އޮތް އެއް ތަނެވެ.

އިންޑިއާގެ ހަރުކަށި ހިންދީން ގަބޫލުކުރާ ގޮތުގައި އެ މީހުންގެ އެންމެ ހާއްސަ އެއް "ކަލާނގެ" ރާމް އުފަންވީ މީގެ 7،000 އަށް ވުރެ ގިނަ އަހަރު ކުރިން އަޔޯދިއާގަ އެވެ. ރާމް "އުފަންވި ތަނުގައި" މިސްކިތް އެޅީ 16 ވަނަ ގަރުނުގައި މުސްލިމް ވެރިޔަކު ކަމަށް އެ މީހުން ބުނެ އެވެ.

މިސްކިތް ތަޅާލަން މީހުން ނުކުންނަ ހިސާބަށް މީހުންގެ ވިސްނުން ގެންދިއުމުގައި އެންމެ ބޮޑަށް ކެމްޕެއިން ކުރީ ބީޖޭޕީ އެވެ. ޕާޓީ އިސް އެކްޓިވިސްޓަކު "ރާމް ކަލާނގެ" ގޮތަށް ހެދުން އަޅައިގެން ގައުމުގެ އެކި ކަންކޮޅުތަކަށް ވެހިކަލެއްގައި ދުއްވައި މީހުން އެއްކުރި އެވެ. އެ ދަތުރުތަކާ އެކު އެކި ހިސާބުތަކުގައި ދީނީ ހަމަނުޖެހުންތައް ހިނގި އެވެ.

މި އުފެއްދި ހަމަނުޖެހުންތަކާ އެކު މިސްކިތް ތަޅާލި އެވެ. އިނގިރޭސި އިސްތިއުމާރަށް ފަހު އިންޑިއާއަށް މިނިވަންކަން ލިބުނު ފަހުން މަދު ފަހަރެއްގައި ނޫނީ ކޮންމެ ފަހަރަކު ވެރިކަން ހޯދަމުން އައި ސެކިއުލާ ފިކުރުގެ ކޮންގްރެސް ޕާޓީގެ މައްޗަށް މި ހިސާބުން ބީޖޭޕީ ގަދަވި އެވެ.

"ދީނީ، ވަތަނީ ފިކުރު"

ފައްޅީގެ މަސައްކަތްކުރާ މީހުން ބުނާ ގޮތުގައި ގާތްގަނޑަކަށް 240 މިލިއަން ޑޮލަރު ހޭދަކޮށްގެން ހެދި މިތަނަށް ފައިސާ ދީފައިވަނީ މުޅިން ވެސް އާންމުންނެވެ. މި ފިކުރު އިންޑިއާގައި ވަރުގަދަކުރަން އެދޭ މީހުންގެ ގިނަކަން މިކަމުން ފެނެ އެވެ.

މޯދީ ތިން ވަނަ ދައުރަކަށް ވެސް ހޮވޭނެ ކަމުގެ ބޮޑު ޔަގީންކަމެއް މިހާރު ވެސް އޮތް އިރު ކެމްޕެއިން ރަސްމީކޮށް ފަށާނެ ކަމަށް ބެލެވެނީ އަންނަ އޭޕްރީލް މަހު އެވެ. އެކަމަކު އޭގެ ކުރިން، މި ފައްޅި ހުޅުވުން ވެގެން ދާނީ ހިންދީންގެ އަގީދާ ހިމާޔަތްކޮށްދޭނެ މީހަކީ މޯދީ ކަމަށް އިންޑިއާގެ ނުފޫޒު ގަދަ ފާދިރީން އިއުލާނުކުރުމަށެވެ. މޯދީގެ ދިފާއުގައި މި ފާދިރީން ތިބޭނެ އެވެ.

ފައްޅި ހުޅުވުމުގެ ރަސްމިއްޔާތު ބޮއިކޮޓްކުރާނެ ކަމަށް އިދިކޮޅު ޕާޓީތަކުން ވަނީ ބުނެފަ އެވެ. އެއީ މި ރަސްމިއްޔާތަކީ މޯދީގެ ކެމްޕެއިން ހަރަކާތެއްގެ ގޮތުގައި ފެންނަ އޮތަތީ އެވެ.

އިންޑިއާގެ ސިޔާސީ ކަންކަން ދިރާސާކުރާ މީހުން ދެކޭ ގޮތުގައި ފައްޅި ހުޅުވުމަކީ ބީޖޭޕީގެ ދީނީ، ވަތަނީ ފިކުރުގެ ރަމްޒެކެވެ. ބީޖޭޕީ އިންތިހާބަށް މި ދަނީ މި ފިކުރާ އެކުގައިކަން މިކަމުން އަންގައިދޭނެ އެވެ. އެއީ ބީޖޭޕީ ދޭން ބޭނުންވާ މެސެޖެވެ.

"ގަތުލްކުރުމާއި ފަނާކުރުން"

ފައްޅި ހުޅުވާ ދުވަސް ކައިރިވާ ވަރަކަށް ހިންދީންގެ ފޯރި ދަނީ ގަދަވަމުންނެވެ. ނޫކުލައިގެ ހަށިގަނޑެއްގައި، ދުންޏަކާއި ދުނި ދަނޑިއެއް ހިފައިގެން އިންނަ "ރާމް" ގެ ފޮޓޯތަކާއި ދިދަތައް ގެތަކުގައި ދަނީ ނަގަމުންނެވެ. ޓީވީ ޗެނަލްތަކުން ވެސް ކެނޑިނޭޅި މި މަންޒަރުތައް ދައްކައި ހަފްލާގެ ވާހަކަ ވެސް ދައްކަ އެވެ.

އަޔޯދިއާގައި ފައްޅި އެޅުމުން އެ އަވަށަށް އަޅުކަމަށް ކޮންމެ އަހަރަކު އެތައް މިލިއަން ހިންދީންނެއް ދާނެ ކަމަށް ބެލެވޭތީ އަޔޯދިއާގައި އިންޓަނޭޝަނަލް އިތުރު އެއާޕޯޓެއް ވެސް އަޅައިފި އެވެ. މަގުތައް ހަދައި އަވަށުގެ އާބާތުރަ ފިލުވައިފި އެވެ.

އެކަމަކު މި މަންޒަރު ބަލަން ތިބި އިންޑިއާގެ 200 މިލިއަނަށް ވުރެ ގިނަ މުސްލިމުންނަށް އަޔޯދިއާގެ ވަށައިގެން ފެންނަނީ ދީނީ ހަމަނުޖެހުމާއި ތަޅާފޮޅުމާއި ބިރުވެރި ކުރިމަގެވެ. އަނެއްކޮޅުން ހިންދީ އެކްޓިވިސްޓުން ތިބީ މިސްކިތް ހުރި ތަން ނޫން އެހެން ތަނެއްގައި ފައްޅި އެޅުމަށް އަމުރުކޮށްދިނުމަށް އެދި މުސްލިމުން އިސްވެ ކޯޓަށް ހުށަހެޅި މައްސަލަތަކުން ވެސް މުސްލިމުންނަށް ކުރި ނުލިބުމުން ފަހުރުވެރި ވެފަ އެވެ.

އިންޑިއާގައި އަޣުލަބިއްޔަތު އޮތް ހިންދީންނަށް މި ފައްޅި ހުޅުވުން ކިތަންމެ އުފާވެރި ވިޔަސް، މުސްލިމުންނަށް ފެންނަނީ އަހަރުތަކެއް ކުރީގެ އަނިޔާވެރި މާޒީ އެވެ.

"ބައްޕަ ދިރިހުއްޓާ އަންދާލީ ހިންދީންގެ ބަޔަކު ބައްޕަ ފަހަތުން ދުވެ އަތުލައިގަތުމަށް ފަހު، ތެޅިފައި އޮތް ބިއްލޫރި ފުޅިއަކުން ހަމަލާ ދިނުމަށް ފަހު،" އުމުރުން 52 އަހަރުގެ މުހައްމަދު ޝާހިދު އޭއެފްޕީ އަށް ބުންޏެވެ.

"އަހަންނަށް މި ފައްޅިން ރަމްޒުކޮށްދެނީ ގަތުލްކުރުމާއި ފަނާކުރުން."

މިއީ އިންޑިއާގެ އެތައް މުސްލިމުންނެއްގެ އިހްސާސެވެ. އެކަމަކު މި އަނިޔާވެރި މާޒީ މޯދީ ބޭނުންކުރައްވާނީ އަލުން ވެރިކަން ހޯއްދެވުމަށެވެ. -- އޭއެފްޕީ