ރަހީނުން މިނިވަންކުރަން ހަމާސްއިން ކުރި ޝަރުތަށް ނަތަންޔާހޫ ދެކޮޅު ހަދައިފި

ރަހީނުކޮށްފައިވާ އިޒްރޭލު މީހުން މިނިވަންކުރުމަށް ހަމާސް އިން ކުރިމަތިކުރި ޝަރުތުތަކަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދެކޮޅު ހަދައިފި އެވެ.

ނަތަންޔާހޫ މިކަމަށް ދެކޮޅުހެދީ އިޒްރޭލަށް ހަމަލާ ދިނުން ދިފާއުކޮށް ހަމާސް އިން އިއްޔެ ނެރުނު ރިޕޯޓަކަށް ފަހުގަ އެވެ. އެ ރިޕޯޓްގައި ހަމާސް އިން ބުނެފައިވަނީ އޮކްޓޫބަރު 7 ގައި އިޒްރޭލަށް ހަމަލާދިނުމަކީ އިޒްރޭލުން ފަލަސްތީނުގެ ބިންތައް ހިފައިގެން ތިބެ ހިންގާ ޖަރީމާތަކާ އަޅާބަލާއިރު އެކަށީގެންވާ ރައްދެއް ކަމަށެވެ.

އިޒްރޭލަށް ހަމަލާދީ ހާހަކަށް ވުރެ ގިނަ މީހުން މަރާލި ހަމަލާތަކަށް ފަހު ހަމާސް އިން އިޒްރޭލުގެ 250 މީހަކު ރަހީނު ވެސް ކުރި އެވެ. އޭގެ ތެރެއިން ބައެއް މީހުން މީގެ ކުރިން ވަނީ ފަލަސްތީނުގެ ބައެއް މީހުން ޖަލުން މިނިވަންކުރުމުން އެ މީހުންގެ ބަދަލުގައި ދޫކޮށްލައިފަ އެވެ.

ހަމާސް އިން ބުނީ ރަހީނުން މިނިވަންކުރާނީ އިޒްރޭލުން ޣައްޒާއަށް ދެމުން ގެންދާ ހަމަލާތައް ހުއްޓާލައި ޣައްޒާއިން އިޒްރޭލު ސިފައިން ފައިބައި އަދި ހަމާސްގެ ހަނގުރާމަވެރިން މިނިވަންކުރުމުން ކަމަށެވެ.

މި ހުށަހެޅުމަށް ދެކޮޅު ހަދަމުން ނަތަންޔާހޫ ވަނީ ހަމާސްގެ ހަނގުރާމަވެރިން މިނިވަންކުރުމަކީ "ގާތިލުން މިނިވަންކުރުން" ކަމަށެވެ. އަދި މިކަމަށް އިޒްރޭލުން އެއްބަސްވާ ނަމަ އިޒްރޭލު ސިފައިން ކުރި ހުރިހާ މަސައްކަތެއް ބޭކާރުވީ ކަމަށް ސިފަކުރި އެވެ. އަދި އެ ހިސާބުން އިޒްރޭލުގެ ރައްކާތެރިކަން ވެސް ކަށަވަރު ނުވާނެ ކަމަށް ބުންޏެވެ.

އިޒްރޭލުން މިފަހަރު ޣައްޒާއަށް ހަމަލާދޭން ފެށީ ހަމާސް ނައްތާލާނެ ކަމަށް ބުނަމުންނެވެ. ހަމަލާތަކަށް ތިން މަސް ވެފައި ވާއިރު ޣައްޒާއިން ޝަހީދުވި މީހުންގެ އަދަދު ވަނީ 25،000 އިން މައްޗަށް ގޮސްފަ އެވެ. އދ. އާއި އެކި ގައުމުތަކުން އިޒްރޭލުގެ މި އަނިޔާވެރި ހަމަލާތައް ހުއްޓާލަން ގޮވާލި ނަމަވެސް އިޒްރޭލުން ތަކުރާރުކޮށް ބުނަމުން ދަނީ ހަމަލާތައް ހުއްޓާނީ ހަމާސް ނައްތާލާފައި ކަމަށާއި އެކަމަށް އަދި އެތައް މަހެއް ހޭދަވެދާނެ ކަމަށެވެ.