އުރުދުންގެ "ވިނަ ކެއުމުގެ" އުފާފާޅުކުރުމަށް ޖޯކުޖެހި އިރާގުގެ އައިމަނަށް ރަތްކާޑް

އައް ރައްޔާން (ޖެނުއަރީ 30) - އޭޝިއަން ކަޕްގެ އުރުދުން އާއި އިރާގު ކުޅުނު މެޗުގައި، އުރުދުންގެ "ވިނަ ކެއުމުގެ" އުފާފާޅުކުރުން ކޮޕީކޮށް ޖޯކު ޖެހި، އިރާގުގެ ފޯވާޑް އައިމަން ހުސައިން އަށް ރަތް ކާޑު ދައްކައިފި އެވެ.

ގަތަރުގައި މިހާރު ކުރިއަށްދާ މުބާރާތުގެ ދެވަނަ ބުރުގައި އިއްޔެ ހަވީރު، އިރާގާ ދެކޮޅަށް ކުޅެ އުރުދުން އިން ވަނީ ފަހަތުން އަރައި 3-2 ން މޮޅުވެ ކުއާޓާ ފައިނަލަށް ދަތުރުކޮށްފަ އެވެ.

ރައްޔާން ސިޓީގެ ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މެޗުގައި، ފުރަތަމަ ލީޑް ނެގީ އުރުދުންއިންނެވެ. ފުރަތަމަ ހާފުގެ އިތުރު ވަގުތުގެ ފުރަތަމަ މިނެޓްގައި ޔަޒާން އައް ނައިމަތު ލަނޑުން، ލީޑް ނެގުމަށް ފަހު އުރުދުންގެ ކުޅުންތެރިން ވަނީ އުފާފާޅު ކުރުމުގެ ގޮތުން ދަނޑުން "ވިނަ ކާން" އުޅޭކަން ދައްކައިފަ އެވެ.

ދެވަނަ ހާފުގައި އިރާގުން ނަތީޖާ ހަމަހަމަކޮށް ފަހުން ލީޑް ވެސް ނެގި އެވެ. އެ ޓީމަށް ނަތީޖާ ހަމަހަމަކޮށް ދިނީ 68 ވަނަ މިނެޓްގައި ސައުދު ނާތިގް އެވެ. ލީޑް ނެގި ލަނޑު އައިމަން ޖެހުމަށް ފަހު އުފާފާޅު ކުރުމުގެ ގޮތުން އޭނާ ވަނީ އިސްތިހާރު ބޯޑްތައް މަތިން ފުންމާލައިގެން ގޮސް ސަޕޯޓަރުންގެ ކައިރި އަށް ގޮސް އުފާފާޅުކޮށްފަ އެވެ. އޭގެ ފަހުން ދަނޑަށް އެނބުރި އައިސް ވިނަގަނޑު މަތީގައި އިށީންދެ އޭނާ ވަނީ "ވިނަ ކާން" އުޅޭކަން ދައްކައިފަ އެވެ.

އެ އުފާފާޅު ކުރުމަށް، އިރާނުގެ ރެފްރީ އަލި ރިޒާ ފަޣާނީ ވަނީ، އައިމަން އަށް ދެވަނަ ރީނދޫކާޑަކާ އެކު ރަތް ކާޑު ދައްކައި ދަނޑުން ފޮނުވައިލައިފަ އެވެ.

އިރާގުން އެއް ކުޅުންތެރިޔަކު މަދުކޮށް ކުޅެން ޖެހުމުން، އުރުދުންއިން އެޑްވާންޓޭޖް ނަގައި މެޗުގެ އިތުރު ވަގުތުގައި ދެ ލަނޑު ޖެހި އެވެ. އެ ދެ ލަނޑު ޖެހީ ޔަޒާން އަލް އަރަބާއި ނިޒާރު އަލް ރަޝްދާން އެވެ.

ކުއާޓާ ފައިނަލުގައި، އުރުދުން އަންނަ ހުކުރު ދުވަހު ނުކުންނާނީ ތަޖިކިސްތާނާ ދެކޮޅަށެވެ. ރާއްޖޭގެ ކުރީގެ ކޯޗު ޕީޓާ ސެގަޓް ކޯޗުކޮށްދޭ، ތަޖިކިސްތާނުން ވަނީ، ވޯލްޑް ކަޕް ކޮލިފައިންގައި އުރުދުނާ ދެކޮޅަށް މީގެ ކުރިން ކުޅެފަ އެވެ. މިދިޔަ ނޮވެމްބަރު މަހު ކުޅުނު އެ މެޗު ވީ 1-1 ން އެއްވަރެވެ.