މަޖިލީހުގެ ގަވާއިދަށް ގެނައި އިސްލާހުގެ ޝަރީއަތް އަވަސްކޮށްފި

ރައްޔިތުންގެ މަޖިލީހުގެ ކޯރަމް ގުނާ ގޮތަށް ގެނައި އިސްލާހު ބާތިލްކުރަން ސަރުކާރުން ހުށަހަޅާފައިވާ މައްސަލައިގެ ޝަރީއަތް ސުޕްރީމް ކޯޓުން އަވަސްކޮށްފި އެވެ.

މަޖިލީހުގެ ގަވާއިދަށް މިދިޔަ އަހަރު އިސްލާހު ގެނެސްފައިވަނީ މަޖިލީހުގެ ޖުމްލަ މެމްބަރުންގެ އަދަދު ގުނާއިރު ހުސްވެފައި ހުރި ގޮނޑިތައް ނުހިމަނާ ގުނާ ގޮތަށެވެ. އެ ބަދަލާ އެކު، ރައީސާއި ނައިބު ރައީސް ފަސޭހައިން ވަކި ކުރުމުގެ ފުރުސަތު އޮވެ އެވެ.

އެ އިސްލާހު ބާތިލްކުރަން އެޓާނީ ޖެނެރަލްގެ އޮފީހުން ސުޕްރީމް ކޯޓަށް ހުށަހެޅި މައްސަލައުގެ ޝަރީއަތް ފަށަން އެންމެ ފުރަތަމަ ތާވަލްކުރީ އަންނަ ހަފުތާގައި ބާއްވާ ގޮތަށެވެ. ނަމަވެސް މިހާރު ވަނީ އަންނަ ބުދަ ދުވަހަށް އެ ޝަރީއަތް އަވަސްކޮށްފަ އެވެ.

އެ މައްސަލަ ސުޕްރީމް ކޯޓުން ނިމެންދެން އެ އިސްލާހަށް އަމަލުކުރުން ފަސްކުރަން ސުޕްރީމް ކޯޓުން ކުރިން އޮތީ ވަގުތީ އަމުރެއް ނެރެފަ އެވެ. ނަމަވެސް މަޖިލީހުން ނިންމީ އެ އަމުރަށް އަމަލު ނުކުރުމަށެވެ.

ސުޕްރީމް ކޯޓަށް މައްސަލަ ހުށަހެޅި ފަހުން ވަނީ، މަޖިލީހުގެ ކޯރަމް ގުނާ ގޮތް ގަވާއިދުން ބަދަލުކުރި ބައި އުވާލައި އެހެން މާއްދާއަކުން ހަމަ އެ ނަތީޖާ އަންނަ ގޮތަށް ހަދައި މަޖިލީހުގެ އާންމު ކޮމެޓީން ފާސްކޮށްފަ އެވެ.