ފަސްޓް ލޭޑީގެ ބޭބޭފުޅު އިންތިހާބު ކާމިޔާބު ކުރައްވައިފި

ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހަންމަދުގެ ބޭބޭފުޅު އިބްރާހީމް މުހައްމަދު (އިިއްބެ ޖަނާބް) ރައްޔިތުންގެ މަޖިލީހުގެ މައްޗަންގޯޅި އުތުރު ދާއިރާގެ ގޮނޑި މިއަދު ކާމިޔާބުކުރައްވައިފި އެވެ.

ރައްޔިތުންގެ މަޖިލީހުގެ އިންތިހާބުގެ ވަގުތީ ނަތީޖާ ދައްކާ ގޮތުގައި، މައްޗަންގޯޅި އުތުރު ދާއިރާގެ ގިނަ ފޮށިތަކުން ކުރީގައި އުޅެނީ ޕީއެންސީގެ ކެންޑިޑޭޓް އިއްބެ އެވެ.

އެ ދާއިރާ އަށް ފަސް ކެންޑިޑޭޓުން ވާދަކުރެ އެވެ. އެއީ އިއްބެގެ އިތުރުން އަމިއްލަ ގޮތުން ވާދަކުރައްވާ އައްސަދު ޝަރީފް (އައްސަދު) އާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން އަހުމަދު ފާރިސް މައުމޫން އާއި އެމްޑީޕީގެ ޓިކެޓްގައި ވާދަކުރައްވާ ލިރުގާމް ވަހީދު (ނާމު) އާއި ޑިމޮކްރެޓްސް އިން ވާދަކުރައްވާ ހުސެއިން އަމްރު އެވެ.

މައްޗަންގޯޅި އުތުރު ދާއިރާއަށް ވާދަކުރެއްވި ފަސް ކެންޑިޑޭޓުންގެ ތެރެއިން އިއްބެ އެ ގޮނޑި ކާމިޔާބު ކުރެއްވީ 448 ވޯޓުންނެވެ. އައްސަދު ޝަރީފް (އައްސަދު) އަށް 53 ވޯޓު ލިބުނުއިރު ރައީސް މައުމޫން އަބްދުލްގައްޔޫމްގެ ދަރިކަލުން އަހުމަދު ފާރިސް މައުމޫނަށް ލިބިވަޑައިގަތީ 340 ވޯޓެވެ.

އެމްޑީޕީގެ ޓިކެޓްގައި ވާދަކުރައްވާ ލިރުގާމް ވަހީދު (ނާމު) 156 އަށް ވޯޓު ލިބުނު އިރު ޑިމޮކްރެޓްސް އިން ވާދަކުރެއްވި ހުސެއިން އަމްރު ލިބިވަޑައިގަތީ 209 ވޯޓެވެ. އެ ދާއިރާގައި ވޯޓު ދިނުމުގެ ހައްގު ލިބިފައިވާ 2799 މީހުން ތިބެ އެވެ. އެ ދާއިރާ އަށް 34 ވޯޓު ފޮށި ބަހައްޓާފައި ވެ އެވެ.