ލަލީގާގެ ޔޫތު މުބާރާތުން ސަސްގެ އެކަޑަމީ ތިންވަނަ ހޯދައިފި

މެލޭޝިއާގައި ކުރިއަށްދާ ލަލީގާގެ ޔޫތު މުބާރާތުގެ 16 އަހަރުންދަށުގެ ތިންވަނަ ރާއްޖޭގެ ސުޕަ ޔުނައިޓެޑް ސްޕޯޓްސް (ސަސް) ގެ އެކަޑަމީން ހޯދައިފި އެވެ.

އަށް އަހަރުން ފެށިގެން 21 އަހަރުންދަށުގެ އުމުރުފުރާގައި، އުމުރުފުރާތަށް ވަކިން ބާއްވާ މުބާރާތުގައި ރާއްޖޭގެ ދެ ޓީމު ވާދަ ކުރި އެވެ. އެއީ ސަސްގެ އިތުރުން އާޖީލަކަށް އެކަޑަމީ އެވެ. އެ ދެ ޓީމު ވެސް ވާދަކުރީ 16 އަހަރުންދަށުގެ ބައިގަ އެވެ.

ސެމީ ފައިނަލާ ހަމަ އަށް ސަސް ދަތުރު ކުރި އެވެ. ސެމީގައި އެ ޓީމު ބަލިވީ ތައިލެންޑްގެ ސީނިއާ ފުޓޫބޯޅައިގައި ވެސް އެންމެ ވަރުގަދަ އެއް ކްލަބް ޗަންގްމާއީގެ 16 އަހަރުންދަށުގެ ޓީމު އަތުންނެވެ. އެ މެޗުގެ ސަސް ބަލިވީ 2-1 ންނެވެ. ވަރަށް ކުރީކޮޅު ޗަންގްމާއީގެ ޓީމުން ދެ ލަނޑު ޖެހި އެވެ. ކުޅުމުގެ ތެރެއަށް އެނބުރި އައިސް ސަސްއިން ފަހުން ރަނގަޅު ކުޅުމެއް ދެއްކި އެވެ.

އާޖީލަކަށް ޓީމު، ކުއާޓާ ފައިނަލަށް ދަތުރު ކުރި އެވެ. ކުއާޓާގައި އެ ޓީމު ބަލިވީ މެލޭޝިއާގެ ޕެންގެރެން އަތުންނެވެ. ސެމީ ފައިނަލުގައި މެލޭޝިއާގެ އެންމެ ވަރުގަދަ އެއް ކްލަބް ޖޯހަރު އަތުން ބަލިވެ ޕެންގެރެން އަށް ޖެހުނީ ތިންވަނަ ހޮވި މެޗުގައި ސަސްއާ ދެކޮޅަށް ކުޅޭށެވެ.

މެޗު ފަށަން ހަމަޖައްސާފައިވާ ވަގުތަށް ވުރެ ދެ ގަޑިއރު ފަހުން ކުޅުނު މެޗު ސަސްގެ އެކަޑަމީ ޓީމުން ކާމިޔާބު ކުރީ 1-0 ންނެވެ.

އިއްޔެ ކުޅުނު ފައިނަލް މެޗު ޗަންގްމާއީގެ މައްޗަށް 2-1 ގެ ނަތީޖާ އަކުން ކާމިޔާބު ހޯދައި 16 އަހަރުންދަށުގެ އުމުރުފުރާގެ ޗެމްޕިއަންކަން ހޯދީ ޖޯހަރު އެވެ.

އެ އުމުރުފުރާގެ އެންމެ ގިނަ ގޯލް ޖެހި ކުޅުންތެރިންގެ ތެރޭގައި ސަސްގެ ސާއިން އަލީ ހިމެނެ އެވެ. އޭނާ ވަނީ ފަސް ގޯލް ޖަހައިފަ އެވެ.