ލަންކާއިން ކޮކާލާއި ފަނިފަކުސަ ބޭރުކުރަން އުޅުނު ދެބަފައިން 200،000 ޑޮލަރުން ޖޫރިމަނާ

ސްރީ ލަންކާގެ ސަފާރީ ޕާކަކުން އެތައް ސަތޭކަ ފަނިފަކުސަ އާއި 99 ވައްތަރެއްގެ ކޮކާ ހިފައިގެން އެ ގައުމުން ބޭރުކުރަން އުޅުނު އިޓަލީ މީހަކާއި އޭނާގެ ފިރިހެން ދަރިފުޅު 60 މިލިއަން ސްރީ ލަންކަން ރުޕީސް (200،000 އެމެރިކާ ޑޮލަރު) އިން ޖޫރިމަނާކޮށްފި އެވެ.

ޔަލާ ނޭޝަނަލް ޕާކުގެ ރޭންޖާސް އިން ލުއިޖީ ފެރާރީ، 68، އާއި އޭނާގެ 28 އަހަރުގެ ފިރިހެން ދަރިފުޅު މަޓިއާ ހައްޔަރުކުރީ މި އަހަރުގެ މެއި މަހުގެ 8 ވަނަ ދުވަހު އެވެ. އެ މީހުން ހައްޔަރުކުރީ އެތައް ސަތޭކަ ފުޅިއަކަށް ފަނިފަކުސަ އަޅައިގެން އުޅެނިކޮށެވެ.

ތަހުގީގަށް އެނގިފައިވާ ގޮތުގައި އެ ދެބަފައިން ވަނީ ޖަނަވާރާއި ފަނިފަކުސަ ޝައުގުވެރިވާ އެކި ފާޑުގެ ކެމިކަލް ބޭނުންކޮށްގެން އެ އެއްޗެހި ހިފައި ކެމިކަލް ބޭނުންކޮށްގެން އެ އެއްޗެހި ޕްރިޒާވްކޮށްގެން ލަންކާއިން ބޭރުކުރަން ރާވައިފަ އެވެ.

މި ދެބަފައިންގެ މައްޗަށް ކުށް ސާބިތުވާ ކަމަށް ނިންމައި މި ދިން އަދަބަކީ ލަންކާގައި މިފަދަ ކަމަކާ ގުޅިގެން މިހާތަނަށް ދިން އެންމެ ބޮޑު އަދަބެވެ.

ޕާކް ބަލަހައްޓާ މީހުން ބީބީސީއަށް ބުނެފައިވާ ގޮތުގައި މި ދެބަފައިންނާ މެދު ޝައްކުވެގެން އެ މީހުންގެ ވެހިކަލް ފާސްކުރި އިރު އެތައް ސަތޭކަ ފުޅިއެއްގައި ފަނިފަކުސަތައް ބަންދުކޮށްފައި ހުއްޓާ ފެނުނެވެ. އަދި ފެނުނު އިރު ވެސް ހުރީ އެ އެއްޗެހި މަރުވެފައި ކަމަށާއި އޭގައި ހުރީ ކެމިކަލެއް ބޭނުންކޮށްފައި ކަމަށް ވެސް ބުންޏެވެ.

މި މައްސަލައިގައި ކުރި ޖޫރިމަނާ މި މަހުގެ 24 ވަނަ ދުވަހުގެ ކުރިން ނުދައްކައިފި ނަމަ ދެ އަހަރަށް ޖަލަށް ލުމަށް ހުކުމް ކުރެވޭނެ އެވެ.