ނ. ޒޯން ސިޔާމް ވޯލްޑްގައި، މިފަހަރު ފަސް ރިސޯޓެއް

ފަސް ޓީމާ އެކު މި އަހަރުގެ ޓެކާސް ރިސޯޓް ފުޓްސަލް ކަޕްގެ ނ. ޒޯނުގެ ކުޅުން އިއްޔެ ސިޔާމް ވޯލްޑް ގައި ފަށައިފި އެވެ.

ޒޯންގެ ފުރަތަމަ މެޗުގައި އެންމެ ފަހުގެ ރަނަރަޕް ސިޔާމް ވޯލްޑް ވަނީ 3-2 އިން ޝާވެލް ބްލާންކް ރަންދެލި ބަލިކޮށްފަ އެވެ. މި މެޗުގެ މޮޅު ކުޅުންތެރިއަކީ ސިޔާމް ވޯލްޑްގެ އާދީ އަބްދުލްޣަނީ އެވެ.

މިދިޔަ އަހަރު މި ޒޯނުގަައި ތިން ޓީމު ވާދަ ކުރި ނަމަވެސް މިއަހަރު ފަސް ރިސޯޓެއްގެ ޓީމުން ބައިވެރިވެފައިވެ އެވެ. އެއީ ސިޔާމް ވޯލްޑް އާއި ޝާވެލް ބްލާންކް ރަންދެލި އަދި އެންމެ ފަހުގެ ޗެމްޕިއަން ވެލާ ޕްރައިވެޓް އައިލެންޑްގެ އިތުރުން ސޮނެވާ ޖާނީ އާއި ސަން ސިޔާމް އިރު ފުށި ރިސޯޓް އެވެ.

މިދިޔަ އަހަރު މި ޒޯންގެ ޗެމްޕިއަންކަން ވެލާ ހޯދީ، ފައިނަލްގައި ޕެނަލްޓީ ޖަހައިގެން ސިޔާމް ވޯލްޑް ބަލިކޮށްފަ އެވެ. އަދި މިދިޔަ އަހަރުގެ މުބާރާޓް ވެސް ކާމިޔާބު ކުރީ ވެލާ އެވެ.

ވެލާގެ ފުރަތަމަ މެޗުގައި އިއްޔެ ވަނީ 3-0 އިން ސޮނެވާ ޖާނީ ބަލިކޮށްފަ އެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެލާގެ އިބްރާހިމް ނަޖާހް އެވެ.

ޝާވެލް ބްލާންކް ރަންދެލި އަދި ސަން ސިޔާމް އިރު ފުށި މިއަދު ހަވީރު ބައްދަލުކުރާނެ އެވެ.

ކޮންމެ ޓީމެއް ކޮންމެ ޓީމަކާ ދެކޮޅަށް ކުޅެ، ޓޭބަލްގެ އެއް ވަނައިގައި ނިންމާ ޓީމެއް، އަންނަ މަހުގެ ދެ ވަނަ ދުވަހު ކުޅޭ ޒޯން ފައިނަލަށް ހޮވޭނެ އެވެ. ފައިނަލްގައި ދެން ވާދަ ކުރާނީ، މި މަހުގެ 30 ވަނަ ދުވަހު ކުޅޭ ސެމީ ފައިނަލުން މޮޅުވާ ޓީމެކެވެ.

ސެމީ ފައިނަލް ކުޅޭނީ، ލީގު ބުރުގެ ދެވަނަ އަދި ތިން ވަނައިގައި ނިންމާ ދެ ޓީމެވެ.

ނ. ޒޯންގެ ޗެމްޕިއަންކަން ހޯދާ ޓީމު، ޗެމްޕިއަންޝިޕް މެޗުގައި ވާދަ ކުރަން ޖެހޭނީ، ޅ. ޒޯންގެ ޗެމްޕިއަންކަން ހޯދި ލެ މެރީޑިއެންއާ ދެކޮޅަށެވެ. މި މެޗުން މޮޅުވާ ޓީމު، ކުއާޓާ ފައިނަލްގައި ނުކުންނާނީ ޖޯލި މޯލްޑިވްސްއާ ދެކޮޅަށެވެ.