ޓެކާސް ރިސޯޓް ކަޕް ޗެމްޕިއަންކަން ޖޯލި މޯލްޑިވްސް އަށް

މިއަހަރުގެ ޓެކާސް ރިސޯޓް ފުޓްސަލް ކަޕްގެ ޗެމްޕިއަންކަން ޖޯލި މޯލްޑިވްސް ހޯދައިފި އެވެ.

ޖޯލި މޯލްޑިވްސް ޗެމްޕިއަންކަން ހޯދީ އިއްޔެ ކުރުނބާ މޯލްޑީވްސްގައި ކުޅުނު ފައިނަލްގައި 4-1 އިން ހާޑް ރޮކް ހޮޓެލް މޯލްޑިވްސް ބަލިކޮށްފަ އެވެ.

މުބާތާރުގެ އެންމެ މޮޅު ކުޅުންތެރިޔާގެ އިތުރުން ޖުމްލަ 12 ގޯލު ޖަހައިގެން ޓޮޕް ސްކޯރާގެ މަގާމް ވެސް ހޯދީ ފައިނަލް މެޗުގެ މޮޅު ކުޅުންތެރިއަކަަށް ހޮވުނު ޖޯލި މޯލްޑިވްސްގެ މުހައްމަދު ޖުމާން އެވެ. މުބާރާތުގައި ނުވަ ގޯލް އެސިސްޓް ކޮށްގެން ޕްލޭމޭކާ އެވޯޑް ހޯދީ ހާޑް ރޮކްގެ މުހައްމަދު ތަޝްމީން އެވެ.

އެންމެ މޮޅު ފަސް ކުޅުންތެރިންގެ ތެރޭގައި ހިމެނެނީ ޖޯލި މޯލްޑިވްސްގެ މުސްލިމް މުހައްމަދާއި ކީޕަރު އިބްރާހިމް ނަދީމް އާދަމްގެ އިތުރުން ހާޑްރޮކްގެ ތަޝްމީން އާއި މުހައްމަދު ޝުހެއިލް އަދި އޮބްލޫ ސިލެކްޓް ސަންގެލިގެ އަބްދުﷲ ޒަމީން އެވެ.

އެންމެ މޮޅު ޒުވާން ކުޅުންތެރިއަކަށް ހޮވުނީ ސަންގެލީގެ ކީޕަރު އަރުޝަމް މޫސާ ނައީމް އެވެ. އެންމެ މޮޅު ކީޕަރަކަށް ޖޯލި މޯލްޑިވްސްގެ ނަދީމް ހޮވުނު އިރު، ފެއާޕްލޭ ޓީމަކީ ބަގްލިއޯނީ މޯލްޑިވްސް އެވެ. އަދި އެބްމެ މޮޅު ކޯޗަކަށް ހޮވުނީ ޖޯލި މޯލްޑިވްސްގެ އަބްދުﷲ ހަނީފް (ބެންޖޯ) އެވެ.

މިއީ ޓެކާސް ރިސޯޓް ކަޕް ބޭއްވި ތިންވަނަ ފަހަރެވެ. ހަތް ޒޯނަކަށް ބަހާލައިގެން ކުރިއަށް ގެންދިޔަ މި މުބާރާތުގައި 38 ރިސޯޓަކުން ވާދަ ކޮށްފައިވެ އެވެ.