ސިޔާމް ވޯލްޑް ބަލިކޮށް ސޮނެވާ ޖާނީ ފައިނަލްގެ ފަހު ޖާގަ ހޯދައިފި

ސެމީ ފައިނަލް މެޗުގައި ސިޔާމް ވޯލްޑް ބަލިކޮށް ސޮނެވާ ޖާނީ، މިއަހަރުގެ ޓެކާސް ރިސޯޓް ފުޓްސަލް ކަޕްގެ ނ. ޒޯންގެ ފައިނަލްގެ ފަހު ޖާގަ ހޯދައިފި އެވެ.

މިދިޔަ އަހަރުގެ ޒޯން ރަނަރަޕް ސިޔާމް ވޯލްޑް އާ ދެކޮޅަށް ސޮނެވާ ޖާނީ، އިއްޔެ ހަވީރު ކުޅުނު މެޗު ކާމިޔާބު ކުރީ 3-1 އިންނެވެ. ހަތަރު ގޯލު ވެސް ފަހު ހާފުގައި ފެނުނު މި މެޗުގެ މޮޅު ކުޅުންތެރިއަކަށް ހޮވުނީ ސޮނެވާ ޖާނީގެ އަހުމަދު ޝަމްވީލް އަބްދުﷲ އެވެ.

މާދަމާ ކުޅޭ ފައިނަލް މެޗުގައި ސޮނެވާ ޖާނީ ނުކުންނާނީ، މިދިޔަ އަހަރުގެ ނ. ޒޯންގެ އިތުރުން، މުޅި މުބާރާތުގެ ވެސް ޗެމްޕިއަަންކަން ހޯދި ވެލާ ޕްރައިވެޓް އައިލެންޑާ ދެކޮޅަށެވެ.

ވެލާ ވަނީ ފަސް ރިސޯޓު ވާދަކުރި ނ. ޒޯންގެ ލީގު ބުރުގައި ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ، އެއް މެޗު އެއްވަރު ކޮށްލައިގެން، އެއް ވަނަ ޓީމުގެ ގޮތުގައި ފައިނަލްގެ ސީދާ ޖާގައެއް ހޯދައިފަ އެވެ. ލީގު ބުރުގައި ވެލާ އެއްވަރުވީ ސިޔާމް ވޯލްޑާ ދެކޮޅަށް ކުޅުނު މެޗެވެ. ސޮނެވާ ޖާނީއާ ދެކޮޅަށް ކުޅުނު މެޗު ވެލާ ވަނީ 3-0 އިން ކާމިޔާބު ކޮށްފަ އެވެ.

ނ. ޒޯންގެ ޗެމްޕިއަންކަން ހޯދާ ޓީމު، އަންނަ ހޮނިހިރު ދުވަހަށް ތާވަލް ކޮަށްފައިވާ ޗެމްޕިއަންޝިޕް މެޗުގައި ވާދަ ކުރަން ޖެހޭނީ، މިދިޔަ މަހު ޅ. ޒޯންގެ ޗެމްޕިއަންކަން ހޯދި ލެ މެރީޑިއެންއާ ދެކޮޅަށެވެ. ޗެމްޕިއަންޝިޕް މެޗުން މޮޅުވާ ޓީމު، ކުއާޓާ ފައިނަލްގައި ޖޯލި މޯލްޑިވްސްއާ ދެކޮޅަށް ނުކުންނާނެ އެވެ.