ޓެކާސް ރިސޯޓް ފުޓްސަލް ކަޕް ފައިނަލަށް ހާޑް ރޮކް އާއި ޖޯލި މޯލްޑިވްސް

މިއަހަރުގެ ދިރާގު ޓެކާސް ރިސޯޓް ފުޓްސަލް ކަޕުގެ ފައިނަލަށް ހާޑް ރޮކް ހޮޓެލް އާއި ޖޯލި މޯލްޑިވްސް ދަތުރުކޮށްފި އެވެ.

ކުރުނބާ މޯލްޑިވްސްގައި އިއްޔެ ހަވީރު ކުޅުނު ފުރަތަމަ ސެމީގައި ހާޑް ރޮކް މޮޅުވީ ބަގްލިއޯނީ މޯލްޑިވްސް ވާދަކޮށް 4-3 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ހާޑް ރޮކްގެ މުހައްމަދު ތަޝްމީން އެވެ.

ދެ ވަނަ ސެމީގައި، މިދިޔަ ހަފުތާގައި ނޯތު ކާފު ޒޯންގެ ޗެމްޕިއަންކަން ހޯދި އޮބްލޫ ސިލެކްޓް ސަންގެލި އާ ވާދަކޮށް ޖޯލި މޯލްޑިވްސް ވެސް މޮޅުވީ 4-3 އިންނެވެ. މި މެޗުގެ މޮޅު ކުޅުންތެރިޔާގެ މަގާމު ހޯދީ ޖޯލި މޯލްޑިވްސްގެ މުހައްމަދު ޖުމާން އެވެ.

ހާޑް ރޮކް އާއި ޖޯލި މޯލްޑިވްސް ބައްދަލުކުރާ ފައިނަލް މެޗު އޮންނާނީ މާދަމާ ހަވީރު 4:15 ގައި ކުރުނބާ ރިސޯޓްގަ އެވެ.

މިދިޔަ އަހަރުގެ ޓެކާސް ރިސޯޓް ކަޕް ފައިނަލްގައި ސެއިންޓް ރެޖިސް ވޮއްމުލި ރިިސޯޓް ބަލިކޮށް ޗެމްޕިއަންކަން ހޯދީ ވެލާ ޕްރައިވެޓް އައިލެންޑް ރިސޯޓެވެ.

ހަތް ޒޯނަކަށް ބަހާލައިގެން މިއަހަރުގެ މުބާރާތުގެ ފުރަތަމަ ބުރު ފެށީ މިދިޔަ ޖުލައި މަހު، ސައުތު ކާފް ޒޯނުންނެވެ. ސައުތު ކާފުގެ ޗެމްޕިއަންކަން ހޯދީ ހާޑް ރޮކް އެވެ. އެއަށް ފަހު އޮތް ދ. ޒޯންގެ ޗެމްޕިއަންކަން ހޯދީ ބަގްލިއޯނީ އެވެ.

މިލައިދޫ މޯލްޑިވްސް އާއި ޖޯލި މޯލްޑިވްސް، ބ. ޒޯން އަދި ރ. ޒޯންގެ ޗެމްޕިއަންކަން ދިފާއު ކުރި އިރު، ނޮކްއައުޓް ބުރުގައި ދެ ޓީމުގެ ފުރިމަތިލުން މިއަހަރު ވެސް ކާމިޔާބުކުރީ ޖޯލި މޯލްޑިވްސް އެވެ.

ލެ މެރީޑީއެން އިން ޅ. ޒޯންގެ ޗެމްޕިއަންކަން ހޯދި އިރު، ނ. ޒޯންގެ ޗެމްޕިއަންކަން ހޯދީ ސޮނެވާ ޖާނީ އެވެ. ދެ ޓީމު ބައްދަލުކުރި މެޗުން މޮޅުވެ ސޮނެވާ ޖާނީ ކުއާޓާ އިން ފުރުސަތު ހޯދި އެވެ. ނަމަވެސް ޖޯލި މޯލްޑިވްސް އިން އެ ޓީމު ސެމީ އަށް ދިއުމުގެ ފުރުސަތެއް ނުދިނެވެ.