ސޮނެވާ ޖާނީ ހުއްޓުވައި ޖޯލި މޯލްޑިވްސް ސެމީ ފައިނަލަށް

ކުއާޓާ ފައިނަލްގައި 4-0 އިން ސޮނެވާ ޖާނީގެ މައްޗަށް ކުރި ހޯދައި ޖޯލި މޯލްޑިވްސް އިން މިއަހަރުގެ ޓެކާސް ރިސޯޓް ފުޓްސަލް ކަޕުގެ ސެމީ ފައިނަލުން ޖާގަ ހޯދައިފި އެވެ.

ސިޔާމް ވޯލްޑްގައި އިއްޔެ ހަވީރު ކުޅުނު ކުއާޓާ ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޖޯލި މޯލްޑިވްސްގެ މުސްލިމް މުހައްމަދެވެ.

ޖޯލި މޯލްޑިވްސް މިދިޔަ އަހަރު މުބާރާތުން ކެޓީ، ކުއާޓާ ފައިނަލްގައި ނ. ޒޯންގެ ވެލާ ޕްރައިވެޓް އައިލެންޑް އަތުން ބަލިވެގެންނެވެ. މިދިޔަ އަހަރު ޓެކާސް ކަޕްގެ ޗެމްޕިއަންކަން ހޯދީ ވެސް ވެލާ އެވެ. ނަމަވެސް މިއަހަރު ޒޯން ފައިނަލުގައި ސޮނެވާ ޖާނީ އަތުން ބަލިވެ، ނޮކައުޓް ބުރަށް ވެލާ ކޮލިފައިއެއް ނުވި އެވެ.

ސޮނެވާ ޖާނީ ކުއާޓާ އަށް ދަތުރުކުރީ ޗެމްޕިއަންޝިޕް މެޗުގައި، ޅ. ޒޯންގެ ޗެމްޕިއަންކަން ހޯދި ލެ މެރީޑިއަން ބަލިކޮށްގެންނެވެ.

މިއަހަރުގެ ސެމީ ފައިނަލްގައި ޖޯލި މޯލްޑިވްސް ބައްދަލުކުރާނީ މާލެ އަތޮޅުގެ އުތުރު ސަރަހައްދުގެ ރިސޯޓްތައް ހިމެނޭ ނޯތު ކާފު ޒޯންގެ ޗެމްޕިއަނުންނާ ދެކޮޅަށެވެ.

ޓެކާސް އިން ވަނީ 12 ޓީމާ އެކު ނޯތު ކާފު ޒޯންގެ ކުޅުން މިއަދު ކުރުނބާ މޯލްޑިވްސްގައި ފަށަން ތައްޔާރުވެފަ އެވެ. ވާދަކުރާ ޓީމުތައް ވަނީ ހަތަރު ގުރޫޕަކަށް ބަހާލައިފަ އެވެ.

● ގުރޫޕް 1: ކުރުނބާ މޯލްޑިވްސް، ގްރޭންޑް ޕާކް ކޮއްދިއްޕަރު، ހިލްޓަން އަމިންގިރި

● ގުރޫޕް 2: އޯގާ އާޓް ރިސޯޓް، މީރު މޯލްޑިވްސް، އޮބްލޫ ސިލެކްޓް ސަންގެލީ

● ގުރޫޕް 3: ޖުމެއިރާ މޯލްޑިވްސް، ޖޯއީ އައިލެންޑް ރިސޯޓް ބައި ކޮކޫން، ޝެރެޓަން މޯލްޑިވްސް

● ގުރޫޕް 4: ބަރޮސް މޯލްޑިވްސް، ބަންޔަން ޓްރީ ވައްބިންފަރު، އޮބްލޫ އެކްސްޕީރިއެންސް އާއިލާފުށި

މިދިޔަ އަހަރުގެ ނޯތު ކާފް ޒޯންގެ ފައިނަލްގައި ފަހަތުން އަރައި ކުރުނބާ ބަލިކޮށް ޗެމްޕިއަންކަން ހޯދީ ޖުމެއިރާ އެވެ.