އެމެރިކާގައި މަރުގެ އަދަބު ދިން މީހެއްގެ ޕޯސްޓްމޯޓަމް ހަދަން ކޯޓުން އަންގައިފި

އާކަންސާ (އެޕްރީލް 30) - އެމެރިކާގެ އާކަންސާ ސްޓޭޓުގައި އިންޖެކްޝަން ޖަހައިގެން މަރުގެ އަދަބު ދިން މީހެއްގެ ޕޯސްޓް-މޯޓަމް ހަދަން ފަނޑިޔާރަކު އަންގައިފި އެވެ.

ޑިސްޓްރިކްޓް ޖަޖް ކްރިސްޓީން ބޭކާގެ މި އަމުރު އައިސްފައި ވަނީ އާކަންސާގައި މިދިޔަ ހުކުރު ދުވަހު މަރުގެ އަދަބު ދިން ކެނެތު ވިލިއަމްސް ކިޔާ މީހަކު މަރުވަމުން ދިޔަ އިރު ވަރަށް ވޭން އެޅި ކަމަށް ބައެއް މީހުން ބުނެފައި ވަނިކޮށެވެ. މަންޒަރު ދުށް މީހުން ބުނި ގޮތުގައި އިންޖެކްޝަން ޖެހި ފަހުން އޭނާ ވަރަށް ބޮޑަށް ތެޅި އަދި އަޑުލައްވަމުން ދިޔަ ކަމަށެވެ. ކެނެތު ވިލިއަމްސް އަކީ އާކަންސާގައި ހަފުތާއެއްހާ ދުވަހު ތެރޭ މަރުގެ އަދަބު ދިން ހަތަރު ވަނަ މީހާ އެވެ. އޭނާގެ ވަކީލް އެ މަރު ސިފަކޮށްފައި ވަނީ "ބިރުވެރިކަމެއްގެ" ގޮތުގަ އެވެ.

ކެނެތު ވިލިއަމްގެ ޕޯސްޓް-މޯޓަމް ހެދުމުގެ އިތުރުން އޭނާގެ ލެ އާއި ޓިޝޫ ސާމްޕަލް ޕްރިޒާވް ކުރުމަށް ވެސް ފަނޑިޔާރު ބޭކާ ވަނީ އަންގައިފަ އެވެ. ފަނޑިޔާރު މި އަމުރު ނެރެފައި ވަނީ ކެނެތު ވިލިއަމްއާ އެކު މަރުގެ އަދަބު ދިނުމަށް ހަމަޖެހިފައިވާ މީހެއްގެ ފަރާތުން ކޯޓަށް ހުށަހެޅި ކުއްލި މައްސަލައަކާ ގުޅިގެންނެވެ.

ފަނޑިޔާރު މި އަމުރު ނެރެފައި ވަނީ ކެނެތު ވިލިއަމުގެ މަރުގެ އަދަބު އިތުރަށް ތަހުގީގު ނުކުރާނެ ކަމަށް ސްޓޭޓުގެ ގަވަރުނަރު ވިދާޅުވެފައި ވަނިކޮށެވެ. އެ ސްޓޭޓުގައި 12 އަހަރު ތެރޭ ފުރަތަމަ ފަހަރަށް މަރުގެ އަދަބު ތަންފީޒު ކުރީ މިދިޔަ ހަފުތާގަ އެވެ. މަރުގެ އަދަބު ދީފައި ވަނީ 1993 ވަނަ އަހަރު މީހަކު މެރިކަމަށް ސާބިތުވި މީހަކަށެވެ. އޭނާގެ މައްޗަށް މަރުގެ އަދަބު ތަންފީޒުކޮށްފައި ވަނީ ހުކުމް އިއްވިތާ 20 އަހަރަށް ވުރެ ގިނަ ދުވަސް ފަހުންނެވެ.

އެ ސްޓޭޓުގައި ވަނީ 11 ދުވަސްތެރޭ އަށް މީހަކަށް މަރުގެ އަދަބު ދޭން ނިންމައިފަ އެވެ. އެއީ މަރުގެ އަދަބު ދޭން ޖަހާ އިންޖެކްޝަނުގެ މުއްދަތު މި މަސް ނިމޭއިރު ހަމަވާތީ އެވެ.

އާކަންސާގައި އެންމެ ފަހުން މަރުގެ އަދަބު ދީފައި ވަނީ 2005 ވަނަ އަހަރު އެވެ.