ޑީއެންއޭގެ އާ ހެއްކާ އެކު މަރުގެ އަދަބު ދިނުން ފަހު ވަގުތު މަޑުޖައްސާލައިފި

މިސޫރީ (އޮގަސްޓް 23) - އެމެރިކާގެ މިސޫރީ ސްޓޭޓުގައި މީހަކު މެރި މީހެއްގެ މައްޗަށް އިއްވާފައިވާ މަރުގެ ހުކުމް ތަންފީޒް ކުރުން އެންމެ ފަހު ގަޑީގައި މަޑުޖައްސާލައިފި އެވެ.

މާސެލަސް ވިލިއަމްސްގެ މައްޗަށް 2001 ވަނަ އަހަރު މަރުގެ ހުކުމް އިއްވީ 1998 ވަނަ އަހަރު އަންހެން ރިޕޯޓަރެއް ކަމަށްވާ ލީޝާ ގޭލް މަރާލުމުގެ ކުށުގަ އެވެ. ނަމަވެސް ޑީއެންއޭ އާ ޓެސްޓްތަކުން ވަނީ އަންހެން މީހާ މަރާލުމުގައި ވިލިއަމްސް، 48، ގެ ކުށެއް ނެތް ކަމަށް ސާބިތުވެފަ އެވެ. އޭނާގެ މައްޗަށް މަރުގެ ހުކުމް ތަންފީޒް ކުރަން އޮތީ އިއްޔެ އެވެ. އެކަމަކު ޑީއެންއޭގެ އާ ހެއްކާ އެކު ސްޓޭޓުގެ ގަވަރުނަރު އެރިކް ގްރެއިޓެންސް ވަނީ ހުކުމް ތަންފީޒް ކުރުން މަޑުޖައްސާލަން އަންގައިފަ އެވެ. ގަވަރުނަރުގެ މި އަމުރު އައިސްފައި ވަނީ ސްޓޭޓުގެ ޖަލެއްގައި އިންޖެކްޝަން ޖަހައިގެން ވިލިއަމްސް މަރާލަން ކުޑަ ވަގުތު ކޮޅަކަށްވެފައި ވަނިކޮށެވެ.

ވިލިއަމްސްގެ މައްޗަށް މަރުގެ އަދަބު ދިނުމަށް އެންމެ ފުރަތަމަ ނިންމީ ޖެނުއަރީ 28، 2015 ގަ އެވެ. ނަމަވެސް ކޯޓުން އެ ފަހަރު ވަނީ ޝަރީއަތް ކުރި ދުވަސްވަރު ލިބެން ނެތް ޓެކްނިކްތައް ބޭނުންކޮށްގެން ޑީއެންއޭގެ އާ ތަހުލީލެއް ކުރުމަށް ފުރުސަތު ދޭން މަރުގެ އަދަބު ފަސްކޮށްފަ އެވެ. މި ޓެސްޓުގެ ނަތީޖާ އިން ދައްކާފައި ވަނީ އަންހެން މީހާ މަރާލި ހަތިޔާރުގައި ހުރި ޑީއެންއޭ އަކީ ވިލިއަމްސްގެ ޑީއެންއޭ ނޫން ކަމަށެވެ. އަދި ލެއާ އެކުގައިވާ އިނގިލީގެ ނިޝާނާއި ކުށުގެ ވެށިން ފެނިފައިވާ އިސްތައްޓަކީ ވެސް ވިލިއަމްސްގެ އެއްޗެއް ނޫން ކަމަށް ތަހުލީލުތަކުން ދައްކާފައިވެ އެވެ.

ފޮރެންސިކް އަދި ހާދިސާގެ މަންޒަރު ފެނުނު ބައެއްގެ ހެކި ބަހުގެ މައްޗަށް ބިނާ ނުކޮށް ޝަރީއަތް ކޮށްފައި ވަނީ ދެ ހެކިވެރިއަކު ދިން ހެކި ބަހަށެވެ. ފަހުން އެނގުނު ގޮތުގައި މި ދެ މީހުންނަށް ވަނީ މަރުވި މީހާގެ އާއިލާ އިން ފައިސާ ދީފަ އެވެ.

ނަމަވެސް މި ހެކިތަކަށް ބެލުމެއް ނެތި ކޯޓުން ވަނީ މަރުގެ ހުކުމް ތަންފީޒު ކުރުމައިގެން ކުރިއަށްދާން ނިންމައިފަ އެވެ. އެކަމަކު ސްޓޭޓުގެ ގަވަރުނަރު ގްރެއިޓެންސް ނެރުއްވި ބަޔާނެއްގައި ވިދާޅުވީ މަރުގެ އަދަބަކީ ފަހުގެ އަދަބު ކަމަށާއި އޭގެ ފަހުން ދެން ކުރެވޭނެ ކަމެއް ނޯންނާނެ ކަމަށެވެ. އަދި މަރުގެ އަދަބު ދިނުމުގެ ކުރިން ކުށުގެ ހުކުމާ މެދު މިސޫރީގެ ރައްޔިތުންނަށް އިތުބާރު އޮންނަން ޖެހޭނެ ކަމަށް ވިދާޅުވި އެވެ.

"އާ މައުލޫމާތާއި އާ ހެއްކާ އެކު މި މައްސަލަ އަލުން ބެލުމަށް އިންކުވަޔަރީ ބޯޑެއް އެކުލަވާލަން އަޅުގަނޑު ވަނީ ގަސްދުކޮށްފައި،" ގްރެއިޓެންސް ވިދާޅުވި އެވެ.

ވިލިއަމްސްގެ ވަކީލް ކެންޓް ގިޕްސަން ވިދާޅުވީ ގަވަރުނަރުގެ ނިންމެވުމުގެ ސަބަބުން ވިލިއަމްސް ވަރަށް ބޮޑަށް އުފާވެފައިވާ ކަމަށެވެ. އަދި އެ ނިންމުން ރަނގަޅު ކަމަށާއި އާ ހެކިތައް ބޯޑަށް ހުށަހަޅަން ތައްޔާރަށް ހުރި ކަމަށް އޭނާ ވިދާޅުވި އެވެ.

މައްސަލަ ބަލާ ބޯޑު އެކުލެވިގެން ވާނީ މިސޫރީގައި ފަނޑިޔާރުކަންކޮށްފައިވާ ފަސް ފަނޑިޔާރުންގެ މައްޗަށެވެ. ގަވަރުނަރުގެ ނިންމެވުމުގެ ކުރިން ދެ ލައްކަ އަށް ވުރެ ގިނަ މީހުން ސޮއިކޮށް ޕެޓިޝަނެއް ވަނީ ހުށަހަޅައިފަ އެވެ. އެ ޕެޓިޝަނުގައި ވަނީ މައްސަލައިގެ ތެރެއަށް ގަވަރުނަރު ވަނުމަށް އެދިފަ އެވެ.