ބާސްކެޓްބޯޅަ ސުޕަ ކަޕް: ރާއްޖޭގެ ކުއީންސް އިން ލަންކާ އީގަލްސް ބަލިކޮށްފި

ބާސްކެޓްބޯޅަ އެސޯސިއޭޝަނުން އިންތިޒާމް ކޮށްގެން އިއްޔެ ފެށި ސުޕަ ކަޕް މުބާރާތުގެ އަންހެން ޑިވިޝަންގެ ފުރަތަމަ މެޗުގައި، ރާއްޖޭގެ އެންމެ ފަހުގެ ޗެމްޕިއަން ކުއީންސް ބީސީ އިން، ސްރީ ލަންކާގެ އީގަލްސް ކްލަބް ބަލިކޮށްފި އެވެ.

ސޯޝަލް ސެންޓަރުގެ އިންޑޯ ކޯޓުގައި ރޭ ކުޅުނު މި މެޗު، ކުއީންސް ކާމިޔާބު ކުރީ ފަހަތުން އަރައި 56-50 ޕޮއިންޓުންނެވެ.

ނަމަވެސް މެޗުގެ މޮޅު ކުޅުންތެރިއަކަށް ހޮވުނީ، އީގަލްސް އަށް 12 ޕޮއިންޓް ހޯދައިދީ، 14 ރީބައުންޑް ނެގި ނިރުމާ ސަސަންތީ އެވެ.

އަންނަ ހޯމަ ދުވަހުގެ ނިޔަލަށް ކުރިއަށް ގެންދާ ސުޕަ ކަޕްގެ އަންހެން ޑިވިޝަންގައި ކުއީންސް އާއި ލަންކާ އީގަލްސްގެ އިތުރުން ދެން ވާދަ ކުރަނީ ރާއްޖޭގެ އެލީޓް ސްޕޯޓްސް ބީސީ އެވެ.

ފިރިހެން ޑިވިޝަނުގައި ވެސް ލަންކާގެ އީގަލްސް ކްލަބް ވާދަ ކުރެ އެވެ. ދެން ވާދަކުރަނީ ރާއްޖޭގެ ޓީރެކްސް ބީސީ އާއި ރެޑްވިންގްސް ބީސީ އަދި ކިންގްސް ބީސީ އެވެ.

ރާއްޖޭގެ އެންމެ ފަހުގެ ޗެމްޕިއަން ޓީރެކްސް ބީސީ ވަނީ ފުރަތަމަ މެޗު ކާމިޔާބު ކޮށްފަ އެވެ. އިއްޔެ ހަވީރު ކުޅުނު މެޗުން ޓީރެކްސް މޮޅުވީ، ރެޑްވިންގްސްއާ ވާދަކޮށް 79-64 ޕޮއިންޓުންނެވެ.

ރެޑްވިންގްސް ބަލިވި ނަމަވެސް، މެޗުގެ މޮޅު ކުޅުންތެރިއަކަށް ހޮވުނީ އެޓީމުގެ އާދަމް ޔާފިއު އިބްރާހިމް އެވެ. އޭނާ ވަނީ 18 ޕޮއިންޓް ހޯދައިދީ، ހަ ރީބައުންޑް ނަގައިފަ އެވެ.

އިއްޔެ މެންދުރު ސުޕަ ކަޕް ފެށި މެޗުގައި ބައްދަލުކުރީ ކިންގްސް އާއި އީގަލްސް ކްލަބެވެ. މި މެޗު އީގަލްސް ކާމިޔާބު ކުރީ 115-99 ޕޮއިންޓުންނެވެ. މެޗުގެ މޮޅު ކުޅުންތެރިއަކަށް ހޮވުނީ ކިންގްސް އަށް 57 ޕޮއިންޓް ހޯދައިދިން އެލައިޖާ ކްރިސްޓިއަން ބެއިލީ އެވެ.