ލަންކާ އީގަލްސް އަތުން ރެޑް ވިންގްސް ބަލިވީ ފަސް ޕޮއިންޓުން

މާލޭގައި މިހާރު ކުރިއަށްދާ ބާސްކެޓްބޯޅަ ސުޕަ ކަޕް މުބާރާތުގެ ފިރިހެން ޑިވިޝަންގައި، ރާއްޖޭގެ ރެޑް ވިންގްސް ބީސީ، ފަސް ޕޮއިންޓްގެ ތަފާތަކުން ސްރީ ލަންކާގެ އީގަލްސް ކްލަބް އަތުން ބަލިވެއްޖެ އެވެ.

ސޯޝަލް ސެންޓަރުގެ އިންޑޯ ކޯޓުގައި ރޭ ކުޅުނު މެޗުން ލަންކާ އީގަލްސް މޮޅުވީ، 101-96 ޕޮއިންޓުންނެވެ.

ލަންކާ އީގަލްސް ވަނީ ހަތަރު ޓީމު ވާދަކުރާ ފިރިހެން ޑިވިޝަނުގައި މިހާތަނަށް ކުޅުނު ދެ މެޗުން ވެސް މޮޅުވެފަ އެވެ. އެޓީމުން ވަނީ ފުރަތަމަ މެޗުގައި ރާއްޖޭގެ ކިންގްސް ބީސީ ބަލިކޮށްފަ އެވެ.

މުބާރާތުގެ ރައުންޑް ރޮބިން ބުރުގައި އީގަލްސް ކްލަބް ކުޅޭ ފަހު މެޗުގައި، މިއަދު ހަވީރު، ރާއްޖޭގެ އެންމެ ފަހުގެ ޗެމްޕިއަން ޓީރެކްސް ބީސީއާ ދެކޮޅަށް ނުކުންނާނެ އެވެ. އަދި މި ބުރުގެ ފަހު މެޗުގައި މިރޭ ރެޑް ވިންގްސް އާއި ކިންގްސް ބައްދަލުކުރާނެ އެވެ.

ޓީރެކްސް ވަނީ އެ ޓީމުގެ ފުރަތަމަ މެޗުގައި ރެޑްވިންގްސް ބަލިކޮށްފަ އެވެ. ނަމަވެސް އިއްޔެ މެންދުރު އެ ޓީމު ކުޅުނު ދެވަނަ މެޗުގައި ވަނީ ކިންގްސްއާ ވާދަކޮށް 83-73 ޕޮއިންޓުން ބަލިވެފަ އެވެ.

މާދަމާ ރޭ ކުޅޭ ފައިނަލް މެޗުގައި ވާދަކުރާނީ ރައުންޑް ރޮބިން ބުރު ނިމި، ރޭންކިންގެ އެއް ވަނަ އަދި ދެ ވަނަ ހޯދާ ޓީމެވެ.

އަންހެން ފައިނަލަށް ކުއީންސް އާއި ލަންކާ އީގަލްސް

ރާއްޖޭގެ ޗެމްޕިއަން ކުއީންސް ބީސީ އަދި ލަންކާ އީގަލްސް ކްލަބް ވަނީ ސުޕަ ކަޕްގެ އަންހެން ޑިވިޝަންގެ ފައިނަލުން ޖާގަ ހޯދައިފަ އެވެ.

ތިން ޓީމު ވާދަކުރި އަންހެން ޑިވިޝަންގައި ރައުންޑް ރޮބިން ބުރުގެ އެއް ވަނަ ހޯދީ، ދެ މެޗު ވެސް ކާމިޔާބު ކުރި ކުއީންސް އެވެ. ފުރަތަމަ މެޗުގައި އީގަލްސް ކްލަބް ބަލި ކުރުމަށް ފަހު، ދެ ވަނަ މެޗުގައި ހުކުރު ދުވަހުގެ ރޭ ވަނީ 92-31 ޕޮއިންޓުން އެލީޓް ސްޕޯޓްސް ބީސީ ބަލިކޮށްފަ އެވެ.

ރޭންކިންގެ ދެ ވަނަ ޓީމުގެ ގޮތުގައި އީގަލްސް ކްލަބް ފައިނަލުން ޖާގަ ހޯދީ، އިއްޔެ ހަވީރު އެލީޓް އާ ވާދަކޮށް 73-41 އިން މެޗު ކާމިޔާބު ކޮށްގެންނެވެ.

އަންހެން ޑިވިޝަންގެ ފައިނަލް މެޗު ކުޅޭނީ މާދަމާ ހަވީރު އެވެ.