ދިވެހި ސިފައިންނަށް ޑޯނިއާ ދުއްވަން ނުދޭ ސަބަބު ހާމަކުރަން ނިންމައިފި

ރާއްޖެއަށް އިންޑިއާ އިން ހަދިޔާ ކޮށްފައިވާ ޑޯނިއާ މަތިންދާބޯޓުތައް ދުއްވުމުގެ ތަމްރީނު ހަދާފައިވާ ދިވެހި ސިފައިންނަށް އެ އުޅަނދުތައް ދުއްވަން ފުރުސަތު ނުދޭ ސަބަބު ހާމަކުރުމާ ދެކޮޅަށް ސަރުކާރުން ހައި ކޯޓަށް ހުށަހެޅި މައްސަލަ އަނބުރާ ގެނެސް، އެ މައުލޫމާތު ހާމަކުރަން ސަރުކާރުން ނިންމައިފި އެވެ.

ރާއްޖޭގައި ދުއްވާ ޑޯނިއާ އޮޕަރޭޓް ކުރަމުން އައީ އިންޑިއާ ސިފައިންނެވެ. އެކަމަކު، މިހާރު އެ އުޅަނދުތައް ދުއްވަނީ އެ ގައުމުން ފޮނުވާފައިވާ މަދަނީ މީހުންނެވެ.

ނަމަވެސް 2021 ވަނަ އަހަރުގެ ތެރޭގައި އެމްއެންޑީއެފްގެ ދެ އޮފިސަރަކު ޑޯނިއާ ދުއްވުމަށް ތަމްރީނުކުރި އެވެ. އެއީ ސިފައިންގެ ފަސްޓް ލެފްޓިނެންޓް އިބްރާހިމް ޝަރީފާއި ލެފްޓިނެންޓް އަހުމަދު އަލީ އެވެ.

އޭގެ ފަހުން ފަސް ޕައިލެޓަކު އަސްކަރީ އުޅަނދުތައް ދުއްވަން ތަމްރީނުކޮށް، އަދި ހަތަރު ޕައިލެޓަކު ޑޯނިއާ ކޮންވާޝަން ކޯސް ފުރިހަމަކޮށްފައިވާ ކަމަށް ކުރިން އެމްއެންޑީއެފުން ބުނެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" ގެ ނޫސްވެރިޔާ ނާޒިމް ހަސަން ވަނީ ދިވެހި ސިފައިން އަސްކަރީ މަތިންދާބޯޓުތައް ދުއްވާތޯ އާއި ޑޯނިއާ ދުއްވުމުގައި އެ ޕައިލެޓުންގެ ބައިވެރިވުން ނެތް ސަބަބާއި އެ މީހުން ސިފައިންގެ ވަޒީފާ އިން ވަކިވެފައިވާ ނަމަ އެކަން ސާފުކުރުމަށް ޑިފެންސް މިނިސްޓްރީއަށް ހުށަހަޅައިފަ އެވެ. އެކަމަކު ޑިފެންސް މިނިސްޓްރީން ކުރިން އޮތީ އެ މައުލޫމާތު ހާމަ ނުކުރަން ނިންމައިފަ އެވެ.

އެ މައުލޫމާތު ހާމަކުރަން އިންފޮމޭޝަން ކޮމިޝަނަރު އެންގެވުމުން ޑިފެންސް މިނިސްޓްރީން އޮތީ އެ މައްސަލަ މިދިޔަ ހަފުތާގައި ހައި ކޯޓަށް ހުށަހަޅައިފަ އެވެ. ނަމަވެސް އެނގިފައިވާ ގޮތުގައި ރައީސް ޑރ. މުހައްމަދު މުއިއްޒު މިއަދު ވަނީ އެ މައްސަލަ އަނބުރާ ގެންދަން އެ މިނިސްޓްރީ އަށް އަންގަވައިފަ އެވެ.

އެ މައުލޫމާތު ހާމަނުކުރަން ކުރިން ޑިފެންސް މިނިސްޓްރީން ނިންމީ މައުލޫމާތު ހޯދައި ލިބިގަތުމުގެ ގާނޫނުގެ 29 ވަނަ މާއްދާއާ ހަވާލާދީ އެވެ. އެ މާއްދާގައި ވަނީ ގައުމީ ސަލާމަތަށް ނުރައްކާވެދާނެ ފަދަ މައުލޫމާތު ސިއްރު ކުރުމުގެ ފުރުސަތު އޮންނާނެ ކަމަށެވެ.