މަޝްރޫއުތައް ލަސްވެ އިހަވަންދޫ ކައުންސިލުގެ ކަންބޮޑުވުން އޮއްސާލައިފި

އިހަވަންދޫގައި ކުރިއަށް ގެންދާ ތަރައްގީގެ އެކި މަޝްރޫއުތައް ހުއްޓިފައި އޮތުމުން، އެ ރަށު ކައުންސިލުން ކަންބޮޑުވުން ފާޅުކޮށްފި އެވެ.

ކައުންސިލުގެ ހަތް މެމްބަރުންގެ ސޮޔާ އެކު، ނެރުނު ބަޔާނެއްގައި ބުނީ އެ ރަށުގެ ބިން ހިއްކުމުގެ މަޝްރޫއު 2021 ގައި ފަށާފައިވީ ނަމަވެސް މިހާރު ކުރިއަށް ނުގެންދާ ކަމަށެވެ. ރަށުގެ ކުނިމެނޭޖް ކުރުމާއި ގެދޮރުވެރިކަމާއި އެހެނިހެން އުމްރާނީ ތަރައްގީގެ މުހިއްމު ކަންކަމާ ގުޅިފައިވާ އެ މަޝްރޫއު ނުނި ލަސްވުމަކީ ވަރަށް ކަންބޮޑުވާ ކަމެއް ކަމަށް ބަޔާނުގައި ބުންޏެވެ.

ކައުންސިލުން ބުނީ މީގެ ކުރިން އެމްޓީސީސީއާ އެކު ކުރި މަޝްވަރާގެ ތެރެއިން އެ ކުންފުނީގެ ސީއެސްއާރުގެ ދަށުން އިހަވަންދޫ ހިއްކި ސަރަހައްދުގައި މޫދަށް އެރޭ ސަރަހައްދެއް ހެދުމަށް އިއުލާން ކޮށްފައިވާ ކަމަށާއި އެކަމަކު އެ މަސައްކަތްތަކަށް ވެސް އެއްވެސް އިޖާބައެއް ނުލިބި، ހިއްކި ސަރަހައްދުގައި ރިވެޓްމެންޓުގެ މަސައްކަތް ކުރަމުންދާ ކަމަށެވެ. އެހެންވެ. އެކަމުގައި ވެސް ކައުންސިލުން ނުރުހުން ފާޅުކުރި އެވެ.

އިހަވަންދޫ ކައުންސިލުން ބުނިގޮތުގައި، އެ ރަށުގެ ބަނދަރުގައި ހަދާފައިވާ ފެރީ ޓާމިނަލް ސަރަހައްދުގެ ސިޑި އާއި ސިޑިއާ ގުޅިފައިވާ ސަރަހައްދު ގަނބައިގެންފައިވުމުން ހައްލު ކުރުމަށް ލަސްވެފައި ވުމަކީ ވެސް ކަންބޮޑުވާ ކަމެކެވެ. އެއ. އުޅަނދުފަހަރު ގިނަ ތަނެއް ކަމަށާއި އެ ސަރަހައްދު ބަންދުކުރަން ޖެހިފައިވުމުން އޮޑިދޯނިފަހަރު އެޅުމަށް ދަތިވާ ކަމަށް ބުންޏެވެ.

ކައުންސިލްގެ ބަޔާނުގައި ބުނީ، ބަނދަރު ތޮއްޓަށް ވެސް ވަރަށް ބޮޑަށް ގެއްލުންވެފައިވާއިރު އޭގެ ސަބަބުން ދިމާވާ ދަތިތައް ހައްލުކޮށްދޭން މިނިސްޓްރީގެ ޓީމުތައް ރަށަށް ކުރި ޒިޔާރާތުގައި ލިޔުންތައް ހަވާލު ކޮށްފައިވާ ކަމަށެވެ.

"މި މުއާމަލާތްތަކާ ގުޅިގެން މިނިސްޓްރީގެ ޓީމުތައް އައިސް އެ ސަރަަހައްދަށް ފީނައި އެކަމުގެ ހުރި ނުރައްކާ އަމިއްލަ ނަފްސަށް ވެސް ބަލާފައިވެ އެވެ. ނަމަވެސް މިކަމަށް އަދި އަދާ ޖެހެންދެން ވެސް އެއްވެސް އަލިމަގެއް ލިބިފައި ނުވުމީ މި ކައުންސިލުން ނުހަނު ހިތާމަކުރާ އަދި ކަންބޮޑުވާ ކަމެކެވެ،" އެ ބަޔާނުގައިވެ އެވެ.

ކައުންސިލުން ބުނީ ބަނދަރުގެ ތެރޭގައި ބާނި ދެމޭ ދެމުމަށް ހައްލެއް ހޯދުމަށް ބަނދަރުގެ ކަނޑިންމަ ބަދަލުކުރުމަށް މަޝްވަރާކޮށް، ލިޔެކިޔުންތައް ބަދަލުކޮށްފައިވީ ނަމަވެސް އެކަމަށް ޖަވާބެއް ނުލިބޭ ކަމަށެވެ.

އެ ބަޔާނުގައި ވަނީ އިހަވަންދޫގައި ހޮސްޕިޓަލެއް ގާއިމުކުރުމުގެ މަސައްކަތް މި އަހަރުގެ ތެރޭގައި ފެށޭނެ ކަމަށް ރައީސް ޑރ. މުހައްމަދު މުއިއްޒު އިއުލާންކުރެއްވި ކަމަށެވެ. އެކަމަކު، އަމަލީ މަސައްކަތެއް ފެށިފައި ނުވުމާއި ރަށުގައި ގާއިމުކުރުމަށް ނިންމާފައިވާ ފިޝް ކަލެކްޝަން ސެންޓަރުގެ މަސައްކަތް ނުނިންމުމާއި އައިސްޕްލާންޓުން އައިސް ލިބުމުގައި ހުރި ދަތިތައް ހުރުމަކީ ކަންބޮޑުވާ ކަމެއް ކަމަށް ބުންޏެވެ.